Read Khoekhoegowab ǂKhoamîdi 10 Bible Online

ǂKhoamîdi 10 - Khoekhoegowab bible

ǂKhoamîdi 10

¹ǂKhoamîdi Salomob didi. Gā-ai ǀgôab ra ǁgûba ǃgâiaǂgao kai, xawe gâre ǀgôab ge a ǁgûs di tsûaǂgao.

²ǁUigu eloxoresasib digu ge harebe tama hâ, xawe ǂhanu-aisib ge ǁōba xu ra ore.

³ǃKhūb ge ǀoms ǂhanu-aib disa ǃâ kai tama hâ, xawe eloxoresan di turaxasibab ra ǁîba ǂhāxū.

⁴Gāxaǃnâ ǃommi ǀkha ra sîsen-i ge nî ǀgâsa, xawe ôasan di ǃommi ge ra ǃkhū kai.

⁵ǁKhūnab ǃnâ ra ǀhaoǀhaob ge a ǁnâuǃāxa ǀgôa, xawe ǃgaoǁaeb ai ǂkhîse ra ǁommi ge a taotaosa ǀgôa.

⁶ǀKhaegu ge ǂhanu-aib di danas ai hâ, xawe ams eloxoresan dis ge ǂkhababa ra ǃgū-ai.

⁷ǂÂiǂâisens ǂhanu-aib dis ge ǀkhaese nîra hâ, xawe ǀons eloxoresan dis ge nîra ǃgû ī.

⁸Gā-ai ǂgaoba ūhâ-i ǁî-i ge mîmāde ra ǃkhōǃoa, xawe gâre amǁgauga ūhâ-i ǁî-i ge nîra aoǁguihe.

⁹ǂHauǃnâsib ǃnâ ga tanisen-i, ǁî-i ge ǂgause ra tanisen, xawe ǁî-i di daoga ga gamagama-i, ǁî-i ge nîra ǂhaisa.

¹⁰Mûs ǀkha ga nape-i, ǁî-i ge ra tsûaǂgao kai, tsî gâre amǁgauga ūhâ-i ǁî-i ge nîra aoǁguihe.

¹¹Ams ǂhanu-aib dis ge a ûib di ǀau, xawe ǂkhabadīs ge eloxoresan di amsa ra ǃgū-ai.

¹²ǁKhanni ge ǂnoagude ra ūǀkhī, xawe ǀnammi ge ǃûǂamdi hoade ra ǃgū-ai.

¹³Amǁgaukha ǁnâuǃāxab dikha aib ra gā-aisiba hōhe, xawe ǁnâuǃāoǃnâb di ǁâb ai-i ge ǂnauhai-e a anu.

¹⁴Gā-ain ra ǂansa ǁguibēbasen, xawe ams gâreb dis ge hîǀhuruhesa a ǀgū.

¹⁵ǃKhū hâ khoeb di xūn ge a ǁîb di ǁaposa ǃā, ǀgâsib ǂhâ hân dib ge a ǁîn di hîǀhuru.

¹⁶Sîsenni ǂhanu-aib dib ge a ûi, hōǂgābasens eloxoresasib dis ge a ǁore.

¹⁷Daob ûib ǃoa garub ge ǁnāb, ǂgōǀausa ra sâub diba, xawe ǂgōǀausa ga ǁnāxū-i, ǁî-i ge ra ǂgaeǂhapuhe.

¹⁸ǁKhanna ga ǃgū-ai-i, ǁî-i ge a ǂkhaba amǁgaukha di, tsî ǂkhaba ǂgā-amsa ga ūǀkhī-i, ǁî-i ge a gâre.

¹⁹ǂGuisib mîdi dib ǃnâs ge ǃûǂamsa tôasi tama hâ, xawe mîdi âba ga ǃkhōǀgarab, ǁnāb ge gā-aise ra dī.

²⁰Nams ǂhanu-aib dis ge ǁhûiǂuihesa ǀhaiǀuri, ǂgaob eloxoresan dib ge a ǀgauo.

²¹Amǁgaukha ǂhanu-aib dikha ge ǂguina ra ǂûmā, xawe gâren ge ǁnâuǃāoǃnâsib xa ra ǁō.

²²ǀKhaeb ǃKhūb dib ra ǃkhū kai, tsî tsû-i xare-eb ǁîba dīǀaro tama.

²³Taotaosana dīs ge gâreba ǀhuruse ība, xawe khoeba ǁnâuǃābas ge gā-aisiba dīsa ǀhuruse ība.

²⁴ǃAob eloxoresab dib, ǁîb xab ge nîra hāǂamhe, xawe turab ǂhanu-ain dibab ge ǁîba Elob xa nîra māhe.

²⁵Sares ra ǃgomīs ǁkhās xaseb ge eloxoresaba a ǀkhai, xawe ǂhanu-aib ge a ǀamo ǃgaoǃgao.

²⁶ǀKhuruxûib ǁgûgu, tsî ǀanni mûde ības ǁkhās xaseb ge ǀopesaba ība, ǁnān ǁîba ra sîǂuina.

²⁷ǃAoǃgâb ǃKhūb dib ra ûib di tsēde ǂguiǂgui, xawe kurigu eloxoresan digu ge ra ǃnubuǃnubuhe.

²⁸ǃÂubasens ǂhanu-ain dis ge a ǃgâiaǂgao, xawe ǂgomaiǂnûis eloxoresan dis ge nîra kāǁō.

²⁹Daob ǃKhūb dib ge ǂhauǃnâba ǀgaise ība, xawe ǂkhabadī-aoga hîǀhuruse.

³⁰ǂHanu-aib ge tātsēs kōse ǁnobe tide, xawe eloxoresan ge ǃhūbaiba ǁanǃnâ tide.

³¹Ams ǂhanu-aib dis ge ǃnāǂamsase gā-aisiba ra ūǀkhī, nams ǂkhabasigu dis ge nîra ǃhūǃnomahe.

³²Amǁgaukha ǂhanu-aib dikha ge ǃgâi xū-e a ǂan, xawe ams eloxoresan dis ge a ǂkhaba ǀgai.