Read Khoekhoegowab ǂKhoamîdi 11 Bible Online

ǂKhoamîdi 11 - Khoekhoegowab bible

ǂKhoamîdi 11

¹Gāxaǃnâ ǀnō-ūda-i ge ǃKhūba ǁgaidīse ība, xawe ǀoa hâ ǃgom-i ge ǁîba a ǃgâiba.

²ǃGuriǂgaoxasib ga hāo, ob ra taoba ǁkhāti hā, xawe gā-aisib ge ǃgamǃgamsen hân ǀkha hâ.

³ǂHauǃnâsib ǂhanu-ain dib ra ǁîna ǂgaeǂgui, xawe ǂkhabasib îǂhôaoǃnân dib ra ǁîna hîkākā.

⁴Xūn ge ǁgôasib di tsēs ai hui tama hâ, xawe ǂhanu-aisib ra ǁōba xu ore.

⁵ǂHanu-aisib ǂhauǃnâb dib ra daob âba ǂhauǂhau, xawe eloxoresab ra eloxoresasib âba xu ǁnā.

⁶ǂHanu-aisib ǂhauǃnân dib ra ǁîna ore, xawe ǂgomǂgomsa taman ge ǂkhabasib ân ǃnâ ra ǃkhōhe.

⁷Eloxoresa khoeb ga ǁō-o, os ge ǃâubasens âba a ǀkhai; ā, hoan xa ǀgaisa ǂgomaiǂnûis ge ra kā.

⁸ǂHanu-aib ra ǂōǂōsiba xu orehe, tsî eloxoresab ra sī ǁîb di ǃkhais ǃnâ.

⁹Hînaxaǃnâb ra ǀgūkhoeb âba hîkākā ams âb ǀkha, xawe ǂansa xun ra ǂhanu-aina orehe.

¹⁰ǃĀs ra dâb xa urikhâi ǂhanu-ain di ǃgâihâb xa; tsî eloxoresan ga ǁō ǃnubaib ge dâba hâ.

¹¹ǀKhaeb ǂhauǃnân diba xus ra ǃāsa ǀgapiǀgapihe, xawe ams eloxoresan disa xus ra ǂkhūǂkhūhe.

¹²ǁNâuǃāoǃnâb ra ǀgūkhoeb âba ǃharaxū, xawe ǁnâuǃāxa aob ge a ǃnōsa.

¹³ǀHoe-aose ra ǃgûmab ra ǂganǃgâsana ǂhaiǂhai, xawe îǂhôa ǂgaoba ūhâb ra ǃkhaisa ǃgū-ai.

¹⁴Gā-ai ǀape-aidi a ǀkhaipas ra ǁaesa ǁgôa, xawe ǂguisib ǀapemā-aogu dib ǃnâs ge sâusa hâ.

¹⁵Khoeb hîa ra ǃhaokhoeb di mâba-ao kaib, ǁîb ge ǂanǂansase nîra khôaǂkhūǂkhūhe, xawe ǃomma māsa ga ǁkhanni, ǁnāb ge a sâusa.

¹⁶ǀNamǀnamsa taras ra ǃgôasa ǃkhōǃgaipe, ǃgari-aon ra ǃkhūsiba ǃkhōǀgaipes xase.

¹⁷ǀKhomxaǃnâ khoeb ra ǁîb di ǀomsa ǃgâidība, xawe ǀkhomoǃnâb ra ǁîb di ǁgans ǂûsa tsûtsû.

¹⁸Eloxoresab ra ǂkhabasîsenna dī, xawe ǂhanu-aisiba ga tsorob, ǁnāb ge ama-ai amǃnâsa ra hō.

¹⁹ǂHanu-aisib ge ûise ība tsi, ǁnās ǁkhās xaseb ra ǁnāb ǂkhababa ra sauruǃgonna ǁōba sauruǃgon.

²⁰ǂKhaba ǂgaoga ūhân ge ǃKhūba ǁgaisi xūse ība, xawe ǂhauǃnân ge ǁîba a ǃgâiba.

²¹ǂKhababa ra dīb ge ǀhapio tide, xawe ǂhanu-aib di surib ge nîra ûi.

²²Hāgūb di ǂguis ai hâ ǃhuniǀuri-anixūs xases ge îsa tarasa ī, ǂgōsenǂâisa xu ra ǁgôasa.

²³ǂHanu-ain ra tura turab ge ǃgâib ǀguiba, xawe ǃâubasens eloxoresan dis ge a ǁgôasi.

²⁴ǀGuib ge hâ, tsoro rab ǃaruǀîǀgui ǁîb xa ra dīǀarobaheba; tsî ǀnîb ge hâ, ǂhanu i as ǃgâ-ai a ǀgîxaba xaweb ra tôasi.

²⁵ǀKhae ra ǀoms ge nîra kau; tsî ǁnāb, hîa ra āsikhanukhanub, ǁîb ǂûb ge ǁkhāti nîra āsihe.

²⁶ǃHoroba ga ǃkhōǀgarab, ǁnāb ra ǁaes xa ǀâxarehe, xawe ǀkhaeb ge nîra hā ǁnāb hîa ra ǁamaxūb ǂama.

²⁷ǃGâiba ga ǃnauǁgoaga ôab, ǁnāb ra ǃgâib xa hāǂamhe, xawe ǂkhababa ga ôab ge ǁîb xa nîra hāǂamhe.

²⁸ǃKhūsib âb ai ga ǂgomaiǂnûib, ǁnāb ge nîra ǁnā, xawe ǂhanu-ain ge haiǂgaen khami nîra ǃam.

²⁹ǁÎb di ommi ǂûba ga gongonǃnâb, ǁîb ge ǂoaba nîra ǀumi, tsî gâreb ge nîra gā-aib di ǃgā kai.

³⁰ǂÛb ǂhanu-aib dib ge a ûib di hai, tsî ǀomde ga ǃkhōb, ǁnāb ge a gā-ai.

³¹Mû, ǂhanu-aib ra mādawa-amhe ǃhūbaib ai, matikōse ǁnās ǃgâ-aib eloxoresab tsî ǁore-aoba nîra mādawa-amhe.