Read Khoekhoegowab ǂKhoamîdi 12 Bible Online

ǂKhoamîdi 12 - Khoekhoegowab bible

ǂKhoamîdi 12

¹ǂGōsensa ǀnam hâb ge gā-aisiba ǀnam hâ, xawe ǂgōǀausa ga ǁkhanni, ǁnāb ge a ǁnâuǃāoǃnâ.

²ǃGâib ge ǃKhūba xu ǃgâiǂâisa nîra hō, xawe gāxaǃnâxa aobab ge ǁîba nîra ǀâxarexū.

³Khoeb ge eloxoresasiba xu ǁapoǁapohe tide, xawe ǃnomab ǂhanu-ain dib ge gongonhe tide.

⁴ǃGâiǂūxa taras ge a aob âs di kron, xawe ǁîba ra tao kais ge ǂkhōgu âb ǃnâ ra nâ ūb axase ī.

⁵ǂÂidi ǂhanu-ain didi ge a ǂhanu, eloxoresan di ǀape-aidi ge a gāxaǃnâ.

⁶Mîdi eloxoresan didi ge ǀaoba ǃapis ǃoa hâ, xawe ams ǂhauǃnân dis ra ǁîna ore.

⁷Eloxoresan ra dawaǃkhupuhe, ǀkhain ras kōse, xawe ǂhanu-ain di ommi ge nîra mâhâhâ.

⁸Mâb hoab ge ǁnâuǃāxab as kōse nîra ǃkhōǀkhāhe, xawe ǂkhaba ǂgaoba ūhâb ge nîra ǃharaxūhe.

⁹ǁÎ-aitsama ǂkharise ūhâsen hâb, tsî ǁî-aitsama ra ǃgādīsenni ge ǁnāb, ǁî-aitsama ra ǃgôasenni tsî pereba tôasi hâb ǃgâ-ai a ǃgâi.

¹⁰ǂHanu-aib ge ǀgoa-i âb di ǀomsa a ǂan, xawe eloxoresan di ǀkhomxaǃnâsib ge a ǁkhōǁkhōsa.

¹¹ǃHanab âba ga sîsenni, ǁnāb ge pereb xa nîra ǁâ, xawe ǁau xūna ga sauruǃgonni ǁnāb ge a ǁnâuǃāoǃnâ.

¹²Eloxoresab ra ǂhams ǂkhabab disa ǂgao, xawe ǃnomab ǂhanu-ain dib ge ǂûna nîra ūǀkhī.

¹³ǃÛǂams amǁgaugu dis ǃnâb ge ǂkhabab di ǁnoaba hâ, xawe ǂhanu-aib ge ǂōǂōsiba xu nîra ǀkhī.

¹⁴Mâb hoab ra ǂûb ams diba xu xūn xa nîra ǁâ, tsî mādawa-ams khoen ǃomgu disab ge ǁîb ǂûb ai nîra oahā kai.

¹⁵Daob gâreb dib ge ǁîb mûǁae a ǃgâi, xawe ǁnāb, ǃgâi ǀapesa ra ǃgâb ge a gā-ai.

¹⁶ǁAib gâreb dib ra ǁnā tsēs ǁkhās ai ǂhai, xawe taoba ga ǃgū-aib, ǁnāb ge a gā-ai.

¹⁷Amaba ga ūǀkhīb, ǁnāb ge ǂhanu-aisiba ra ǂhaiǂhai, xawe ǃkhō-amaob ǂkhabasigu dib ra gāxaǃnâsiba ǂhaiǂhai.

¹⁸ǀGuib ge hâ, mîdi ǀkha ǂâioǃnâse gôab ra ǃkhā khami ra ǀkhība, xawe nams gā-aigu dis ge a soǀôa.

¹⁹ǂGomǂgomsa amǁgaukha ge ǀamos kōse nîra hâ, xawe ǂkhaba nams ge mûsǀapiros kōse ǀgui nîra hâ.

²⁰Gāxaǃnâsib ge ǁnān, ǂkhababa ra kurun di ǂgaob ǃnâ hâ, xawe ǂkhîba ra kurun, ǁîn ge ǃgâiaǂgaoba ūhâ.

²¹ǂHanu-aib ge tsū-i xare-i xa hāǂamhe tide, xawe eloxoresan ge ǂkhabab xa nîra ǀoa.

²²ǂKhaba amǁgaugu ge ǃKhūba a ǁgaiǁgaisaba, xawe îǂhôase ra dīn ge ǁîba a ǃgâiba.

²³Gā-ai khoeb ra ǂansa gaugau, xawe gâren di ǂgaob ra gâresiba ǂgaiǂui.

²⁴ǃOmmi ôasan dib ge nîra gao, xawe ǀopesan ge ǃgāǁguiba-e nîra mā.

²⁵Tsûaǂgaob khoeb di ǂgaob ǃnâ hâb ra ǁîba ǃgamǃgam, xawe ǃgâi mîs ra ǁîba ǃgâiaǂgao kai.

²⁶ǂHanu-aib ra ǀgūkhoeb âba ǂgaeǂgui-ūnu, xawe daob eloxoresan dib ra ǁîna ǂgaeǂhapu.

²⁷ǀOpesab ge ǃhanab âb di xūna ambasen tide, xawe ǀgapiǃgôasan khoeb din ge a ôasab di.

²⁸Daob ǂhanu-aisib dib aib ge ûiba hâ; tsî ǂhauǂhauhe hâ ǃganni âb aib ge ǁōba hâ tama hâ.