Read Khoekhoegowab ǂKhoamîdi 15 Bible Online

ǂKhoamîdi 15 - Khoekhoegowab bible

ǂKhoamîdi 15

¹Tsamtsiǃnâ ǃereams ra ǁgôasiba ǂkhîǂkhî; xawe tsûtsûsa mîs ra ǁaiba khâi kai.

²Nams gā-ain dis ra ǂansa ǀnamǀnamsa kai; xawe gâren di ams ra ǃnāǂamsase gâresiba ǂnâǂui.

³Mûra ǃKhūb dira ge ǃkhaidi hoadi tawa hâ; ǂkhaban tsî ǃgâin tsîna ra kōse.

⁴Soǀôab nams dib ge a ûib di hai; xawe ǁîs ǃnâ a ǂkhaban ra gagasa ǂkhôa.

⁵Gâreb ra ǁgûb di ǂgōǀausa ǃharaxū, xawe ǂgōǀausa ga ǃgaoǃgâb, ǁnāb ge gā-aise nîra sîsen.

⁶ǂHanu-ain di ommi ǃnâb ge kai ǁuiba hâ, xawe eloxoresab di hōǂgābasens ge a hîǀhuru.

⁷Amǁgaugu gā-ain digu ge ǂansa nîra tsoroma, xawe ǂgaob gâren dib ge ǁnāti ī tama hâ.

⁸ǁGuibas eloxoresab dis ge ǃKhūba ǁgaiǁgaisase ība, xawe ǀgores ǂhauǃnân dis ge ǁîba a ǃgâiba.

⁹Daob eloxoresan dib ge ǃKhūba ǁgaiǁgaisase ība, xawe ǁnāb, ǂhanu-aisiba ra sauruǃgonnab ge ǁîba nîra ǀnam.

¹⁰ǂGōǀaus ge ǁnāb, daoba ra ǁnāxūba a tsūba; tsî ǂgōǀausa ga ǁkhanni ge nîra ǁō.

¹¹ǀAmoǀaeb tsî kāǁōb tsîkha ge a ǂhaisa ǃKhūb di ais aiǃâ, matikōse ǁnās ǃgâ-ai khoen di ǂgaoga!

¹²ǃHō-aob ge ǁnāb, ǁîba ra ǂgōǀauba ǀnam tide; ǁîb ge gā-ain ǃoa ǃgû tide.

¹³ǃGâiaǂgaoxa ǂgaob ge aisa ra ǀnamǀnamsa kai, xawe tsûaǂgaoba xus ra gagasa ǂkhū.

¹⁴ǁNâuǃāxa ǂgaob ge ǂansa nî ôaǃgon, xawe ams gâren dis ge gâresib ǀkha nîra ǂûsihe.

¹⁵Tsēdi ǁgâiǀāhe hâb didi hoadi ge a tsū, xawe ǃgâiaǂgaoxa ǂgaob ge a hâhâ ra ǂûǁae.

¹⁶ǀOron ǃKhūb di ǃaoǃgâb ǀkhats ūhân ge kai ǁuib, sâoǃnâsib ǀkhats ūhâb ǃgâ-ai a ǃgâi.

¹⁷ǂÛ-ai-i ǃam ǁhaon di-i ǀnammi hâǃnâ-i ge gomab, ǁkhanni ǀkha ra ǂûheb ǃgâ-ai a ǃgâi.

¹⁸ǁAixa khoeb ge ǂnoaguba nîra ǂkhaiǂkhaikhâi, xawe ǃnūǃnâxab ge ǂnoaguba nîra ǂkhîǂkhî.

¹⁹Daob ǀopesab dib ge ǁkhūǃharas khami ī, xawe ǂhauǃnân di ǃganni ge ǂhauǂhauǃgâiǃgâihe hâ.

²⁰Gā-ai ǀgôab ge ǁgûba nîra ǃgâiaǂgao kai, xawe gâre khoeb ra ǁgûsa ǃharaxū.

²¹Gâresib ge ǁnâuǃāoǃnâba ǃgâiaǂgaose ība, xawe ǁnâuǃāxa khoeb ge ǂhanuse nîra tanisen.

²²ǂÂidi ge ra sā, ǀape-i ga ǀkhaio; xawe ǂguisib ǀape-aon diba xus ge mâs hoas âde nîra mâhō.

²³Aob ge ǃgâiaǂgaoba ūhâ, ǂhanuseb ga ams âb ǀkha ǃereamo, tsî matikōse i a ǃgâi ǁaeb ai ra ǃhoahe mî-e!

²⁴Daob ûib dib ge ǁnâuǃāxaba ǀgapise garuba, ǀamoǀaeb ǃnagab diba xub nî ǂgōse.

²⁵Oms ǃguriǂgaoxab disab ge ǃKhūba nîra ǂkhūǂkhū, xawe ǀkharib ǃoataras dibab ge ǁîba nîra mâiǁapoǁapo.

²⁶ǂÂidi ǂkhabab didi ge ǃKhūba ǁgaiǁgaisase ība, xawe ǀnamǀnamsa mîdi ge a ǃanu ǂgaoba ūhân di.

²⁷Xūǃgunuxasiba ra dīb ge oms âba ra gongonǃnâ, xawe ǀkhaexūna ga ǁkhanni, ǁnāb ge nîra ûi.

²⁸ǂGaob ǂhanu-aib dib ra ǂâiǂâisen tare-eb nî ǃereamsa; xawe ams eloxoresan dis ge ǃnāǂamsase ǂkhabana nîra ǁhōǂui.

²⁹ǃKhūb ge eloxorensana xu ǃnūse hâ, xawe ǀgores ǂhanu-ain disab ge nîra ǁnâu-am.

³⁰ǃNâb mûdi dib ra ǂgaoba ǃgâiaǂgao kai, ǃgâi gommi ge ǂkhōga ra kaukau.

³¹ǁNā ǂgaes ûib di ǂgōǀaude ra ǁnâus, ge gā-ain ǁaegu nîra hâ.

³²ǂGōǀausa ga aoxūb ge ǀoms âba ra ǃharaxū, xawe ǂgōǀausa ga ǁnâub ge ǁnâuǃāba ra hō.

³³ǃAoǃgâb ǃKhūb dib ge a gā-aisib di ǂgōǀau, tsî ǃgamǃgamsens ra ǃgôasiba ai-aiba.