Read Khoekhoegowab ǂKhoamîdi 16 Bible Online

ǂKhoamîdi 16 - Khoekhoegowab bible

ǂKhoamîdi 16

¹Khoeb di xūdi ge ǂâibasendi ǂgaob dide, xawe ǃereams nams dis ge ǃKhūb disa.

²Daogu khoeb digu hoagu ge a ǀkhaisa ǁîb mûǁae, xawe ǃKhūb ra gagade ôaǃnâ.

³ǃKhūb ai gawa sa sîsenga, o di ge ǂâidi âtsa nîra ǁapoǁapohe.

⁴ǃKhūb ge xūn hoana ǁîb ǂûb ǃaroma ge dī, ā, eloxoresab ona tsēs ǂkhabab dis ǁga.

⁵ǀGapi ǂgaoba ūhâ-i hoa-i ge ǃKhūba ǁgaiǁgaisaba, ǃomǃkhōgub ka, xaweb ge ǀhapio tide.

⁶ǃGâiǃgâxasib tsî ǂgomǂgomsasib tsîkha ǀkhas ra dīsāsa ǀûbagu kaihe, tsî ǃaoǃgâb ǃKhūb diba xuts ra ǂkhababa xu ǂgō.

⁷Khoe-i di daogu ga ǃKhūba ǃgâibao, ob ge ǁîba ǁî-i di khākhoen ona ǁî-i ǀkha ra ǂkhî kai.

⁸ǀOroron hîats ǂhanu-aisib ǀkha ūhân ge ǂgui hōǂgābasendi hîats ǂhanu tamase ūhâdi ǃgâ-ai a ǃgâi.

⁹ǂGaob khoeb dib ra daob âb xa ǂâiǂâisen, xawe ǃKhūb ra daob âba ǂgaeǂgui.

¹⁰Elosi mîs ge gao-aosi amǁgaukha ai hâ, ǁîb di ams ge ǀgoraǃgâs ǃnâ ǃûǂam tide.

¹¹ǂHanu ǀnō-ūdas tsî ǀnō-ūǀuis tsîra ge a ǃKhūb di, ǁhōs di ǀnō-ūǀuidi hoadi ge a ǁîb di sîsenai.

¹²Gao-aogas ge eloxoresase sîsensa a ǁgaiǁgaisaba, ǂhanu-aisiba xus ra tronsa ǁapoǁapohe xui-ao.

¹³Amǁgaugu ǂhanu-aisib digu ge gao-aoga a ǃgâiba, tsî mâb hoab âgu ge ǁnāb, ǂhanu xūna ra ǃhoaba nî ǀnam.

¹⁴ǁGôasib gao-aob dib ge ǁōb di sîsabeb khami ī, xawe gā-ai khoeb ge ǁîba nî ǂkhî kai.

¹⁵ǃNâb, gao-aob di ais dib ǃnâb ge ûiba hâ, tsî ǃgâiǃgâibasens âb ge ǀnanus ǃnaresib dis khami ī.

¹⁶Matikōseb kha gā-aisiba khauǂuihesa ǃhuniǀurib ǃgâ-ai a ǃgâi tsî matikōses ǁnâuǃāba hōsa ǀhaiǀuriba hōs xa a ǃnāsa.

¹⁷ǃGûdaob ǂhauǃnân dib ge: ǂKhababa xu ǂgōsa; ǁnāb, daob âba ga sâub ge ǀoms âba ra sâu.

¹⁸ǃGuriǂgaoxasib ge khôaǂkhūs aiǃâ ra hā, tsî ǀgapisib gagas diba ǁnās aiǃâ.

¹⁹Tsamtsiǃnân ǀkha ǃgamse hâs ge ǃguriǂgaoxan ǀkha ǁkhâuǁnâxūna ǀgoragus ǃgâ-ai a ǃgâi.

²⁰ǁNâuǃāxase mîs ai ga ǃgaoǃgâ-i, ǁnā-i ge ǃgâiba nîra hō, tsî ǃKhūb ai ga ǂgomaiǂnûi-i, ǁnā-i ge a ǃgâiǃō.

²¹Gā-ai ǂgaoba ūhâb ge nîra ǁnâuǃāxa, tsî ǂkhonsib amǁgaugu dib ra ǁkhāǁkhāsa ǃnāǃnā.

²²ǁNâuǃāba ūhân ge ǁîba ûib di ǀause ūhâ, xawe ǂgōǀaus gâreb dis ge a gâresi.

²³ǂGaob gā-aib dib ra ams âba ǁnâuǃāxa kai, tsîb ge amǁgaukha âb ai ǁkhāǁkhāsa nîra ǃnāǃnā.

²⁴ǀNamǀnamsa mîdi ge a ǀhûdani, tsî di ge ǀomsa a ǂkhonba, tsî di ge soǀôase ǂkhōga ība.

²⁵Dao-i ge hâ, sats khoetsa ǂhanu khami ība-e, xawe ǁî-i di ǀams ge a ǁōb di dao.

²⁶ǁÎ-aitsamasa xub ra sîsenaoba sîsenbasen, ams âb xab ra ǁgarihe xui-ao.

²⁷Beliali aob ra ǂkhababa khaoǂui, tsî ǁîb di amǁgaukha ai i ge khau hâ ǀae-i axase ī.

²⁸ǂKhaba aob ge ǂnoagu-aide ra ūǀkhī, tsî ǀhoe-aob ra ǃgâi ǀhōsaga ǀgora.

²⁹Aob ǁgaridīs dib ra ǁîb di ǀgūkhoeba nanaǁnâ, tsîb ra ǁîba daob hîa ǃgâi tamab ai ǂgaeǂgui.

³⁰ǁÎb ra mûra âba ǂganam, ǂkhabasinab nî ǂâiǂuise, nânam raseb ǂkhababa ra dī.

³¹ǀHaiadanasib ge a anisa kron, ǁîb ra ǂhanu-aisib di daob ai hōhe.

³²ǃNūǃnâxab ge ǁē-aob xa a ǃgâi, tsî ǁnāb gagas âba ra ǃgē kaiba, ǃā-e ra ūb ǃgâ-ai.

³³ǀKhūs ra tîǂams ǃnâ ǂnauhe, xawes ra ǃKhūb ǂâis xase ī.