Read Khoekhoegowab ǂKhoamîdi 18 Bible Online

ǂKhoamîdi 18 - Khoekhoegowab bible

ǂKhoamîdi 18

¹ǁÎ-aitsama ga khaisenni, ǁîb ge turab rana ra ôa, mâ gā-aisib hoabab ra ǁîba mâǃoa.

²Gâreb ge ǁnâuǃāxasib ǃnâ turaba ūhâ tama hâ, tsîb ge ǂgaob âb nî ǂhaiǂhaisens ǀguis ǃnâ turaba ūhâ.

³Eloxoresab ga hāo, ob ra ǃharaxūb ona hā, tsî taob ǀkha ǃhōba.

⁴Mîdi aob di ams didi ge a ǃgam ǁgam, tsî ǀaus gā-aisib dis ge a dâu ra ǃāro.

⁵ǃGâi tama i ge hâ ais eloxoresab disa ǃkhōǃoasa, ǂhanu-aiba ǀgoraǃgâs ǃnâ gamagamas ǃaroma.

⁶Amǁgaukha gâreb dikha ge ǂnoagus ǃnâ ra sī, tsî nams âb ra ǂnauhesa ǂgaihā.

⁷Ams gâreb dis ge ǁîb ǂhaniba hîǀhuruse ība, tsî ǁîb di amǁgaukha ǀoms âb di ǁnoase.

⁸Mîdi ǀhoe-aob didi ge ǁkhoaxa ǂûn ase ī, hîa ǃnāb di ǁaegub ǃnâ ra ǂgâna.

⁹Sîsenni âb ǃnâ a ǂoposab, ǁnāb ge a hîǀhuru-aob di ǃgâsa.

¹⁰ǀOns ǃKhūb dis ge a ǁaposa ǂgō-om; ǂhanu-aib ra ǁnāǀî ǃkhoe tsî sâuhe.

¹¹Xūn ǃkhūǁîb din ge a ǀgaib âb di ǃā, tsî a ǀgapi ǂnubiǂgoa ǂâis âb ǃnâ.

¹²Khôaǂkhūǂkhūs aiǃâb ra khoeb di ǂgaoba ǀgapiǀgapisen, tsî ǃgôab ra ǃgamǃgamsensa ai-aiba.

¹³ǁNâu tamab hâ hîa ga ǃereammi, ǁnābas ge ǁî ǃkhaisa gâresib tsî taob ase nîra ība.

¹⁴Gagas aob dis ge ǁîba ǀaesenni âba nîra tanihui, xawe ǂkhūǂkhūhesa gagasa tari-e ǁîsa nî tani?

¹⁵ǂGaob ǁnâuǃāxab dib ra ǂansa hō, tsî gā-ain di ǂgaes ra ǂansa ôa.

¹⁶Hōs khoeb dis ra ǁîba harasi-e kuruba, tsîs ra ǁîba kaikhoegu di ais aiǃâ ūsī.

¹⁷ǂNoaguǃkhai-i ǃnâ ǂguro mâb ge ǂhanuba ra māhe, xawe nau khoeb ra hās ǃnâb ge ǁîba ra hōǂuihe.

¹⁸ǀKhūǂnaus ra ǂnoaguǃkhaide ǀû kai tsîs ra ǀgaisagu ǁaegu ǀgorasa dī.

¹⁹ǃGâsab, hîa ǂgomǂgomsa tamase ra sîsenūheb ge ǀgaisa ǃā-i ǃgâ-ai a mâǃoaxa, tsî ǂnoagudi ge î-ommi di daoǁkhaese ī.

²⁰ǂÛb ǁîb di ams dib xab ge mâb hoab di ǃnāba nîra ǁâ, ǁîb ge hōǂgābasens amǁgaukha âb dis xa nîra ǁâ.

²¹Ûib tsî ǁōb tsîkha ge nams di ǀgaib ǃnâ hâ, tsî mâb hoab, ǁîsa ǀnam hâb ge ǂûb âs xa nîra ǂû.

²²Tara-e ga hōb ge ǃgâi xū-e hō hâ, tsîb ge ǃKhūb xa ǀkhommāsa go māhe.

²³ǀKhomabasen raseb ra ǀgâsaba ǃhoa, xawe ǃkhūkhoeb ra karosa xūna ǃeream.

²⁴ǂGui ǀhōsanab kom ūhâo, xawe ǁkhāti nî tôasio; xaweb ge ǁkhāti ǀnamsabeba ǃgâsa-i ǃgâ-ai ra ǂae-ai tsi.