Read Khoekhoegowab ǂKhoamîdi 19 Bible Online

ǂKhoamîdi 19 - Khoekhoegowab bible

ǂKhoamîdi 19

¹ǁNā ǀgâsab, ǂhauǃnâsib ǃoa ra tanisenni ge ǂkhaba amǁgaukha ūhâb, hîa gâreb ǃgâ-ai a ǃgâi.

²ǁKhātib ge ǂans ose ra sîsenna ǃgâise dī tama hâ tsî ǃhae ǂaira ūhâb ge ra dāsā.

³Gâresib khoeb dib ge daob âba nîra dawa, tsî ǂgaob âb ge ǃKhūba nîra ǁaixaǂam.

⁴ǃKhūsib ra ǀhōsana ǂguiǂgui, xawe ǀgâsab ra ǀhōsab âba xu ǀgorahe.

⁵ǂKhaba ǀhûǀguitimî-aob ge ǀhapio tide, tsî ǂhumiga ga ǀhapub ge ûiǂoa tide.

⁶ǂGuin ra gaosab di aisa ǀkhoma, tsî mâb hoab ge a ǁnāb, ǀkhaexūna ra māb di ǀhōsa.

⁷ǃGâsan ǀgâsab din hoan ge ǁîba ra ǁkhan, matikōsen ǁnās ǃgâ-ai ǀhōsan âba ǁîba ǃnūse hâxū! Mîdi ǀkhab ra ǁîna ǃkhoeǃgon, xawen ge a ǀkhai.

⁸ǁNâuǃāba ga hōbasenni, ǁnāb ge ǀoms âba ǀnam hâ; ǁnâuǃāxasiba ga ǂanni, ǁnāb ge nîra ǃgâiǃgâ.

⁹ǂKhaba ǀhûǀguitimî-aob ge ǀhapio tide, tsî ǂhumiga ga ǀhapub ge nîra ǁō.

¹⁰ǃGâi ûib ge gâreba anuba tama hâ, matikōses ǁnās ǃgâ-ai ǃgāba anuba tama hâ, gaosaga gaoǂamsa!

¹¹ǁNâuǃāb khoeb dib ra ǁaib âba ǃnūǃnâxa kai, tsî ǃûǂamsa ǃgû-īǀkhās ge a ǁîb di anixū.

¹²ǁGôasib gao-aob dib ge ǂkham xammi di ǃgurub axase ī, xawe ǀaub, ǀgâb ai hâb axases ge ǃgâiǃgâibasens âba ī.

¹³Gâre ǀgôab ge ǁgûba kai ǂkhôab ase ība, tsî ǂnoagu-aidi taras didi ge ǀû tama ǂnâ-i ase ī.

¹⁴Oms tsî xūn tsîn ge a ǁgûga xu ra hā ǀumi, xawe ǁnâuǃāxa taras ge ǃKhūba xu ra hā.

¹⁵ǀOpesasib ra ǃgam ǂoms ǃnâ ǁnā kai, tsî ǁause ga hâ ǀoms ge nîra ǃâ.

¹⁶Mîmāsa ga sâub, ǁnāb ra ǀoms âba sâu; ǁîb mîmāsa ga ǃharaxūb, ǁîb ge nîra ǁō.

¹⁷ǀGâsaba ga ǀkhommi, ǁnāb ra ǃKhūba ǀkhupi, tsî ǁîb ge ǃgâidīb âba nîra mādawa-am bi.

¹⁸ǀGôab âtsa ǁkhara, ǃâubasens ganupe hâ hîa; xawe tā ǃgam bits nî ǃkhaisa ôa-am.

¹⁹Kai ǁgôasiba ūhâb ge ǁkharaba nîra tani; ǁîbats ga ǂkhā, xawets ge ǁkhā xū-i ǁkhā-ets hugaǀgui ǁkhawa nî dīsa nî ǁgarihe.

²⁰ǀApesa ǁnâu, îts ǂgōǀausa ǃkhōǃoa, îts ǀunis ai gā-ai.

²¹Aob di ǂgaob ǃnâ di ge ǂâide a ǂgui, xawe ǀapes ǃKhūb dis ge nîra mâhâhâ.

²²Khoeb ra tura xub ge ǃgâidīb âba; tsî ǀgâsab ge ǂhumi-aob ǃgâ-ai a ǃgâi.

²³ǃAoǃgâb ǃKhūb dib ge ûiba hâba: ǁÂ hâsets ge nîra hâǁgoa xui-ao, ǂkhabab xats ge sarihe tide.

²⁴ǀOpesab ra ǃommi âba ǁîb di ǁkhaib ǃnâ gaugau, tsîb ge ǁîba ams âb tawa ǁkhawa ūsī tide.

²⁵ǃHō-aoba ǂnau, ob ge gâreba nîra gā-ai; îts ǁnâuǃāxaba ǂgōǀau, ob ge ǂansa nîra hōbasen.

²⁶ǁGûba ga hîkākāb tsî ǁgûsa ga ǃhaexub, ǁnāb ge a ǀgôa, tao kai tsî taoba ra dība.

²⁷ǂGōǀausa ǁnâus ǀkha ǀû, ti ôa, îts ǂans di mîde xu ǁhapu!

²⁸Beliali ǀhûǀguitimî-aob ra ǂhanuba ǃhō, tsî ams eloxoresan dis ra ǂhanuoǃnâsiba hapu.

²⁹ǀGoraǃgâdi ge ǃhō-aona ǂhomibahe hâ, tsî gâren di ǁâba ǂnausa.