Read Khoekhoegowab ǂKhoamîdi 2 Bible Online

ǂKhoamîdi 2 - Khoekhoegowab bible

ǂKhoamîdi 2

¹Ti ôa, ti mîdets ga ǃkhōǃoao, tsî ti mîmādets ga sâubaseno,

²ǂgaera âts ǀkhats nî gā-aisiba ǃgaoǃgâse, sa ǂgaobats ga ǁnâuǃāba ǂōbao,

³ā, ǁnâuǃābats ga ǂgaiǀîo, dommi âtsats ga gā-aisibǀî ūkhâio,

⁴ǀhaiǀurib khamits ga ǁîba ôao tsî ǁîbats ga ǂganǃgâsa ǁuigu axase ôaǃgono,

⁵ǃnubaits ge ǃKhūb di ǃaoǃgâba nîra ǁnâuǃā, tsî ǂans Elob disa nîra hō.

⁶ǃKhūb ra gā-aisiba mā xui-ao, ǁîb di amsa xu ra ge ǂans tsî ǁnâuǃāb tsîra ra ǀkhī.

⁷ǁÎb ra ǂhauǃnâba ǃgâiǃgâ kai, ǁîb ge khōsikhōse ība ǁnān ǂhauǃnâse ra tanisenna,

⁸daogu ǂhanub digan nî ǃkhōǀgaiǀgaise, tsî ǁîb ge daob ǁîb di ǀkhomsaben diba nîra sâu.

⁹ǃNubaits ge ǂhanu-aisib tsî ǂhanub tsî ǂhauǃnâsigu tsîna nîra ǁnâuǃā tsî mâ ǃgâi tanisen-i hoa-e;

¹⁰gā-aisib ga ǂgaob âts ǃnâ hâo, tsî ǂans ga sa ǀomsa ǀnamǀnamsase ībao,

¹¹ob ge ǂanǃgâsenxasiba satsa nîra ǃûi, ob ge ǁnâuǃāxasiba satsa nîra sâu.

¹²Ore tsi nîse ǂkhaba daoba xu, ǁnā khoeb, ǂkhabasina ra ǃhoaba xu,

¹³ǁnān, ǂhauǃnâsib di daoga ra ǁnāxūna, ǃkhaenab di daogu ǃnân nî ǃgûse,

¹⁴ǂkhabadīs ǃnâ ǃgâiaǂgao hân, tsî ǂkhabab di ǂkhabasin ǃnâ ra dân,

¹⁵daogu ân a gamaǃgân tsî ǃgûdaogu âna xu ra ǂgōna.

¹⁶Ore tsi nîse ǃhao tarasa xu, ǁnās ǂgaeǂhapu ra mîdi ǀkha ra ǁgoasens,

¹⁷ǂkhamsis âs di ǀhonkhoeba ra ǁhâxūs tsî ǁîs Elob di ǃgaeǀhaosa ra ǀurusa.

¹⁸ǁÎs di oms ge ǁōbǀî ra ǂō, tsî daogu âsa kā hânǀî xui-ao.

¹⁹ǁÎs tawa ga ǂgâgu hoagu ge ǁkhawa oa tide, tsî daogu ûib diga hō tide;

²⁰ǃgâin di daob aits nî ǃgûga tsî ǂhanu-ain di daogats nî ǃkhōǀgaipega.

²¹ǂHanu-ain ge ǃhūb ǃnâ nîra ǁan, tsî ǂhauǃnân ge ǁîb ǃnâ nîra hâǃgau;

²²xawe eloxoresan ge ǃhūba xu nîra ǃhūǃnomahe, tsî îǂhôaoǃnân ge ǁîba xu nîra tsubuǂuihe.