Read Khoekhoegowab ǂKhoamîdi 21 Bible Online

ǂKhoamîdi 21 - Khoekhoegowab bible

ǂKhoamîdi 21

¹ǂGaob gao-aob dib ge ǃKhūb ǃomǁae ǁgamǃārogu axase ī; ǁîb ra ǁîba ǂgaob ra ǀkhāb hoab ai ǂgaeǂgui.

²Daob khoeb dib hoab ge ǁîb mûǁae a ǂhanu, xawe ǃKhūb ra gagade ǀnō.

³ǂHanu-aisib tsî ǂhanub tsîkha dīs ge ǃKhūba ǁguibas xa a ǃkhōǃoasaba.

⁴ǀGapi mûdi tsî ǃguriǂgaoxasib, tsî ǃhūǃgaos eloxoresan dis tsîn ge a ǁore.

⁵ǂÂidi ôasab didi ǀguidi ge ǃnāǂamsiba ra hā kai, xawe ǃhaeb hoab ge tôasib ǀguiba nîra hō.

⁶ǂKhaba nams ǀkha ǁuiga xūrebasens ge a ǁnān, ǁōba ra ôan tawa, ǃgôa-ī ra ǁausi.

⁷Hîǀhurus eloxoresan dis ge ǁîna nîra ǃkhaiǃā, ǂhanuse dīsan ra ǂkhā amaga.

⁸Daob ǂkhaba khoeb dib ge a gama, xawe sîsenni ǃanub dib ge a ǂhanu.

⁹Oms ǂamǃnâb di ǁhôa-i ǃnâ ǁans ge ǂnoaguxa tara-i ǀkha ǀgui oms ǃnâ ǁanǁares xa a ǃgâi.

¹⁰ǀOms eloxoresab dis ra ǂkhababa tura; ǀgūkhoeb âb ge ǁîb mûǁae ǀkhomma hō tama hâ.

¹¹ǃHō-aob ga ǁkharaheo, ob ra gâreba gā-ai, tsî gā-aibats ga ǁgauo, ob ra ǂansa ǃkhōǃoa.

¹²ǂHanu-aib ra ǁnâuǃāxase eloxoresan di ommi ai ǃgaoǃgâ, Elob ga eloxoresana ǂkhabab ǃnâ aoǂgā ǃnubai.

¹³ǂGaes âba ga ǀgâsan di ǃausa xu ǂganni, ǁnāb ge ǁkhāti nîra ǂgai tsî ǁnâuhe tide.

¹⁴ǀKhaexū-i ǂganǃgâsase ra māhe-i ge ǁaiba ra ǂkhîǂkhî, tsî tîǂams ǃnâ ra māhe ǀkhaexū-e ǀgaisa ǁgôasiba.

¹⁵ǂHanuse dīs ge ǂhanu-aiba ǃgâiaǂgaose ība, xawe sîsenaogu ǂhanuoǃnâsib digas ge ǃhurise iba.

¹⁶Khoe-i ǁnâuǃāb di daoba xu ra ǁhapu-i, ǁî-i ge ǀhaohâb ǁō hân dib ǃnâ nîra sâ.

¹⁷ǃGâiaǂgaoba ǀnam hâb ge nîra tôasi; ǂauxûib tsî olib tsîkha ǀnam hâb ge ǃkhū tide.

¹⁸Eloxoresab ge a ǂhanu-ain di xoremari, tsî ǂgomǂgomsa tamaba ǂhauǃnân di.

¹⁹ǃGaroǃhū-i ǃnâ ǁans ge ǂnoaguxa tsî ǁaixa tara-i tawa ǁans ǃgâ-ai a ǃgâi.

²⁰Gā-aib di ǁanǃkhais ǃnân ge ǃgomǀgausa ǁuib tsî olib tsîna hâ, xawe gâre khoeb ra ǁîna hapu.

²¹ǂHanu-aisib tsî ǃgâidīb tsîkha ga sauruǃgonni, ǁîb ge ûib tsî ǂhanu-aisib tsî ǃgôasib tsîna nîra hō.

²²Gā-aib ra ǃās ǁē-aogu disa ǃapa-ai, tsîb ra ǃkhais ǁîgu di ǂgomaiǂnûis disa aoǁgui.

²³Ams âb tsî nams âba ga sâub, ǁîb ra ǀoms âba sâu ǂōǂōsiga xu.

²⁴ǃGuriǂgaoxa anaob di ǀons ge a ǃhō-ao; ǁîb ra ǃguriǂgaoxase ǁaib ǀkha sîsen.

²⁵Turab ǀopesab dib ge ǁîb ǂhaniba nîra ǃgam, ǁîb di ǃomkha sîsensa ra ǂkhā xui-ao.

²⁶Tsēs hoasab ra xūna tura, xawe ǂhanu-aib ge nîra mā, tsîb ge ūdawa tide.

²⁷ǁGuibas eloxoresan dis ge a ǁgaiǁgaisa; matikōse ǁnās ǃgâ-ai i a taotaosa tsū ǂâibasen-i ǀkhas ga ǁguiheo.

²⁸ǂHumiǃnâ ǃkhō-amaob ge nîra kā, tsî ǁnā aob hîa ra ǁnâub ge nîra ǃhoadan.

²⁹Eloxoresa aob ge ais âb ǂûb ǃnâ ra ǀgaiǀgaisen, xawe ǂhauǃnâb ge daob âba ra ǁapoǁapo.

³⁰Gā-aisi-i xare-i, ǁnâuǃā-i xare-i tsî ǀape-i xare-i ge ǃKhūb ǃoa-ai a ǀkhai.

³¹Hāb ra ǃkhamgub di tsēsa ǂhomibahe, xawe dans ge a ǃKhūb di.