Read Khoekhoegowab ǂKhoamîdi 22 Bible Online

ǂKhoamîdi 22 - Khoekhoegowab bible

ǂKhoamîdi 22

¹ǀOns ge kai ǃkhūsib ǃgâ-ai a ǃkhōǂuihesa, tsî ǃgâiǃnâxasib ge ǀhaiǀurib tsî ǃhuniǀurib xa a ǃgâi.

²ǃKhū hân tsî ǀgâsan tsîn ra ǀhao; ǃKhūb ge ǁnāb, ǁîn hoana ge kuruba.

³Gā-ai khoeb ǂkhababa mû tsî ra gaugausen, xawe gâren ge ǃgûǂgâ tsî ra ǁkharahe.

⁴Amǃnâs ǃgamǃgamsens tsî eloǃaoǃgâsib tsîra dis ge ǃkhūsib tsî ǃgôasib tsî ûib tsîna.

⁵ǁKhūn tsî ǁnoagu tsîn ge ǂkhaban di daob ǃnâ hâ; ǀoms âba ga sâu ǂgaob ge ǁîna xu ǃnūse nî hâ.

⁶ǀGôaba ǂguro ge tsoatsoana ǁkhāǁkhā, ǁîb di daob nî ī xase; tsî kairab ka, xaweb ge ǁîna xu ǁgôa tide.

⁷ǃKhū hâb ra ǀgâsaba gaoǂam, tsî ǀkhupi kab ge a ǁîb tawab ra ǀkhupib di ǃgā.

⁸ǂKhababa ga tsorob, ǁîb ge ǂkhababa nîra ǃgaobasen, tsî ǁgôasib âb di ǀhamhaib ge nîra ǀamǀam.

⁹ǃGâiǃnâxa mûsa ūhâb ge nîra ǀkhaehe: ǁÎb ra pereb âb xa ǀgâsana mā xui-ao.

¹⁰ǃHō-aoba ǃhaebē, ob ra ǂnoaguba bē, ob ge ǃkhamgub tsî taob tsîkha nîra ǀû.

¹¹ǃAnusib ǂgaob diba ǀnam hâb tsî amǁgaukha âb a ǀnamǀnamsab, ǁnāb di ǀhōsab ge gao-aoba.

¹²Mûra ǃKhūb dira ge ǂansa ra sâu, xawe ǂgomoǃnân di ǃkhaideb ge nîra dawaǃkhupu.

¹³ǀOpesab ge: Xammi ge ǃauga hâ, ti ra mî, ǀnîsi ta ge daogu ǃnâ nî ǃgamhe.

¹⁴Ams ǃhao taradi dis ge a ǃgam ā; ǃKhūb ǁîb ǂama ǁaixa hâb, ǁnāb ge ǁîb ǃnâ nîra ǁnā.

¹⁵Gâresib ge ǀgôab di ǂgaob ǃnâ ǃgaehe hâ; ǀhamhaib ǂgōǀaus dib ge ǁîba, ǁîba xu nîra dībē.

¹⁶ǀGâsaba ga ǁgâiǀāb, ǁîb dinab nî ǂguiǂguise, tsî ǃkhū hâba ga māb, ǁîb ge amase nîra tôasi.

¹⁷ǂŌ sa ǂgaesa îts ǁnâu gā-aigu di mîde, îts unu sa ǂgaoba ti ǂansǀî;

¹⁸ǀnamǀnamsa ǃkhais ge nēsa, ǁîdets ga sa ǃnāb ǃnâ sâuo; î di ǁîdi hoade amǁgaukha âts ai ǂhomisen hâ.

¹⁹ǂGomaiǂnûis âts nî ǃKhūb ai hâse ta ge sats ona nētsē ra ǁkhāǁkhā, ā, satsa.

²⁰ǀNai ǂkhaisa xūna xoaba tsi tama ta hâ, ǀapedi tsî ǂans hoas ǀkha?

²¹ǂAnǂan tsi ta nîga ǁaposasib amab di mîdi diba, amab di mîdets nî ǃeream ǁkhāse ǁnān, satsa ra sîna.

²²ǀGâsaba tā ǀâǀhana, ǀgâsab a amaga, îts ǀkhomǀkhomsaba ǁāb ǃnâ tā ǂkhūǂkhū.

²³ǃKhūb ge ǁîna ǂnoaguǃkhais âna nîra ǂnoaguba xuige, tsî ǁîb ge ǁnān, ǁîna ra ǀâǀhanana ǀomsa nîra ǀâǀhana.

²⁴Tā ǁaixab ǀkha ǁaeǁaesen, îts kaise a ǁgôasa aob ǀkha tā ǀhao,

²⁵daogu âbats ǁkhāǁkhāsen tidese, tsî ǁnoa-ets sa ǀoms ai ūhā tidega.

²⁶Tā satsa hâ ǁnāgu, ǃomma ra māgu ǃnâ, ǁnāgu, surudena ra mâba-ao kaibagu ǃnâ.

²⁷Matarets nî xū-ets ga ūhâ tama io, tarexats kha ǁnâi kharob âtsa sa ǃnagaba xu nî ūbē-aihe?

²⁸ǁNā ǀoro ǃkhāǃāhaigu, sa îgu ge dīga tā mâi-unu.

²⁹Aob, hîa sîsenni âb ǃnâ a ôasaba mûts ge? ǁÎb ge gao-aogu di ais aiǃâ nîra mâihe; ǁkhoatsama khoegu di ais aiǃâb ge mâihe tide.