Read Khoekhoegowab ǂKhoamîdi 23 Bible Online

ǂKhoamîdi 23 - Khoekhoegowab bible

ǂKhoamîdi 23

¹Gao-ao-i ǀkhats nî ǂûgats ga ǂnûo, ots ge ǁnāb, sa ais aiǃâ hâb ai ǂōrisase nî ǃgaoǃgâ,

²îts gôa-e ǂnûi sa dommi tawa ǁharisa khoets kao.

³Îts ǁîb di ǁkhoaxa ǂûn xa tā tura, ǂhumipereb a amaga.

⁴Tā ǀhupuǀhupusen ǃkhūts nîga, îts nē ǁnâuǃāb âts ǀkha ǀû.

⁵Sa mûra kha ǁkhana kaits nî xū tama-iǀî? Amase i ge ǁî-e ǁgaboga nî dībasen ǃariǃkhās, ǀhommiǀî ra ǁkhanas khami.

⁶Tā ǂû pereb ǂkhaba mûsa ūhâb diba, îts ǁîb di ǁkhoaxa ǂûna tā tura.

⁷ǀOms âb ǃnâb ra ǂâi khamib ī xuige; ǂû îts ā! tib ra mîǀî tsi, xawe ǂgaob âb ge sa ǀkha hâ tama hâ.

⁸Ots ge sa pereǃâro-i, hîats go ǂû-e nî ǀkhûiǂui, o di ge ǀnamǀnamsa mîdi âtsa nî kā.

⁹Tā ǃhoa gâreb di ǂgaes ǃnâ; ǁnâuǃāb sa mîdi dibab nî ǃharaxū xuige.

¹⁰ǀOro ǃkhāǃāhaiga tā mâi-unu, îts ǃoaǀgôan di ǃhanagu ai tā sī,

¹¹ǁîn di Ore-aob ge a ǀgaisa xuige; ǁîb ge ǂnoaguǃkhais âna nîra ǂnoagu-ū tsi.

¹²Sa ǂgaoba ǂgōsa māǁnâ, tsî sa ǂgaera ǂans di mîde.

¹³ǀGôaba ǂgōǀausa tā ǂkhā; haib ǀkhats ga ǂnau bi xaweb ge ǁō tide.

¹⁴Sats ge haib ǀkha ǁîba nî ǂnau, tsîts ge ǀoms âba ǀamoǀaeba xu nî ore.

¹⁵Ti ôa, sa ǂgaob ga gā-aio, ob ge ti ǂgaoba nî ǃgâiaǂgao, ā, ti diba.

¹⁶Tsî ti ǃnaira ge dâb xa nîra urikhâi, sa amǁgaukha ga ǂhauǃnâna ǃhoao.

¹⁷Ab sa ǂgaoba tā suri ǁore-aon ǂama, îts mâ tsēs hoasa ǃaoǃgâb ǃKhūb dib ǃnâ hâ.

¹⁸Amases ge mādawa-amsa nîra hâ xuige, tsî ǂgomaiǂnûis âts ge tātsē kā tide.

¹⁹ǁNâu ti ôa, îts gā-ai, îts sa ǂgaoba daobǀî unu.

²⁰Tā ǂauxûi-ā-aogu ǁaegu hâ, tsî ǁganō-aogu ǁaegu:

²¹Ā-aob kas, ō-aob kas hoas ge nîra ǀgâ xuige, tsî ǂomhîxasib ge ǀkhauhesa sarana ra ana kai.

²²ǁNâuǀnam saob satsa ge ôaba, îts saosa tā ǃharaxū, kairas kao.

²³Amaba ǁama, îts ǁîba tā ǁamaxū tsî gā-aisib tsî ǂgōǀaus tsî ǁnâuǃāb ona.

²⁴ǁGûb ǂhanu-aib dib ge kaise nîra dâ, tsî gā-ai ǀgôaba ga hōb, ǁnāb ge ǁîb ǂama nîra ǃgâiaǂgao.

²⁵Ab saoba ǃgâiaǂgao tsî saos ona, as ǁîs satsa ge ǁorasa dâ.

²⁶Ti ôa, sa ǂgaoba tita mā, î ra mûra âtsa ti daoga ǂan.

²⁷ǀAi-aos ge a ǃgam ā xuige, tsî ǃhaokhoes ge a ǂō tsau xuige.

²⁸Ā, ǁkhâuǁnâ-ao-i khamis ra ǃapi, tsîs ra khoen ǃnâ îǂhôaoǃnâna ǂguiǂgui.

²⁹Tarib dis a okhasa? Tarib dis a tsûsa? Tarib dis a ǂnoagusa? Tarib dis a ǃgaesa? Tarib dide ǀhapiǂnûide ǀhapiǃkhai-i ose? Tarib diba mûra di ǀapaba?

³⁰ǁNāgu, ǂauxûib tawa ra ǀhapegu din ge, ǁnā gu, hîa habaguhe hâ xûiba ra ôagu di.

³¹ǂAuxûiba tā kōǀî, ǀapaseb ga io, āǃnâxapas ǃnâb ga anxao, ǂkhanuseb ga ǁgôao.

³²ǀUnis aib ra nâ ǀao-i khami, tsî ra ǀiri, ǀiriǀaob ra dī khami.

³³O ra ge mûra âtsa ǀkhara xūna nî mû, ob ge ǂgaob âtsa ǂkhabasina nîra ǃhoa.

³⁴Ots ge ǀguib, hurib di ǃnāb ǃnâ ǁom hâb khami nîra ī, tsî ǀguib, huri-ommi di haib ai ǁom hâb khami.

³⁵Ots ge: ǂNauhe ta ge, ti nî mî, xawe ta ge ǀaesen tama; ǂhāhe ta ge, xawe ta ge tsâ tama; ǃnoaǂkhai ta kao, o ta ge ǁîba ǃaruǀî nî ôa.