Read Khoekhoegowab ǂKhoamîdi 24 Bible Online

ǂKhoamîdi 24 - Khoekhoegowab bible

ǂKhoamîdi 24

¹Tā tauxa ǂkhaba khoen ǂama, îts ǁîn ǀkha hâsa tā tura;

²ǂgaob ân ra hîǀhurus xa ǂâi, tsî amǁgaugu an ra tsūǃōb xa ǃhoa xuige.

³Gā-aisiba xus ra omsa ǂnubihe, tsî ǁnâuǃāba xus ra ǁapoǁapohe:

⁴ǂAnsa xu di ge ǃnā-omde mâ ǃgomǀgausa tsî ǀnamǀnamsa xū-i hoa-i ǀkha ra ǀoaǀoahe.

⁵Gā-ai khoeb ge a ǀgaisa, tsî ǂansa ūhâ khoeb ra ǀgaiba ǁapoǁapo.

⁶Gā-ai ǀapedi ǀkhats ge satsa nî torodī, tsî ǂguisib ǀapemā-aogu dib ǃnâs ge dansa hâ.

⁷Gā-aisib hoab ge gâreba a ǀgapiba; ǁîb ge ams âba ǁāb ǃnâ khowa tide.

⁸ǂKhabadīs xa ga ǂâib, ǁnāpan ge khoena taotaosa ǂâiǂâisendi di kuru-ao, ti nî ǂgai.

⁹ǂÂis gâreb dis ge a ǁore, tsî ǃhō-aob ge khoeba ǁgaiǁgaisase ība.

¹⁰ǃOposasets ga ǂōǂōsib di tsēs ai ǁgauseno, ob ge ǀgaib âtsa ra toa.

¹¹Ore ǁnān, ǁōn nîga ǃkhōhe hâna; ǃgamhen nîgan ra ǁîna ǃgû, sats ga ūdawaseno xuige.

¹²Sats ga: Mû, sida ge ǁîsa a ǀū, ti mî o: Xareb kha ǁnāb ǂgaoga ra ǀnōba ǁîsa hōǃâ tide? Tsî ǀoms âtsa ra ǃgaoǃgâba xareb kha ǁîsa ǂan tide? ǁÎb ge sats khoetsa sîsenni âts ǃoa nîra mādawa-am xui-ao.

¹³ǂÛ, daniba ti ôa, ǁîb a ǃgâi xuige; tsî ǀhûdanib ge sa namǃhanaba a ǂkhonba xuige.

¹⁴Nēti gā-aisiba sa ǀomsa ǀhaoǀhaoba; ǁîbats ga hō-o, ots ge nîra mādawa-amhe tsî ǃâubasens âts ge kā tide.

¹⁵Tāts eloxoresatsa ǃapi ǂhanu-aib di ǁanǃkhais ǁga, îts ǁgoeǃkhais âba tā hîǀhuru.

¹⁶ǂHanu-aib ge hû ǃnādi kōse ǁnā tsî ǁkhawa nîra khâi xuige, xawe eloxoresan ge ǂkhabab ǃnâ nîra ǃnôa.

¹⁷Tā ǃgâiaǂgao khākhoeb âts ga ǁnāǃnubai; tsî ǃnôab kao, tā dâ:

¹⁸Îb ǃKhūba ǁîsa tā mû, îs tā ǁîb mûǁae tsū, îb tā ǁaib âba ǁîba xu ǁkhae.

¹⁹Tā ǁaixa ǂkhabadī-aon ǂama, îts eloxoresan ǂama tā tau;

²⁰ǂkhabab ge mādawa-am-e ūhâ tide xuige; ǃamamǀaes eloxoresan dis ge nîra ǀarihe xuige.

²¹Ti ôa, ǃKhūba ǃao, tsî gao-aob ona, tā ǁaeǁaesen ǁnāgu hîa ǀkharaǀkharasisa ra ôa-amga.

²²ǁÎgu di kāǁōb ge ǃhaese nîra ǀkhī xuige, tsî ǁîkha hoakha di kāsa tari-e ǁîsa a ǂan?

²³Nē ǂkhoamîdi on ge a gā-aigu di. Aisa ǂans ge ǂhanub ǃnâ ǃgâi tama hâ.

²⁴Eloxoresab ǃoa ga: Sats ge a ǂhanu-ai, ti a mîb, ǁnāba di ge ǁaede nîra ǀâxare, ǃhaodi ge ǁîba nîra ǁaixaǂam,

²⁵xawe ǁnāgu hîa ǁîba ra ǁkharagu ge nîra ǃgâibahe, tsî ǀkhaeb ǃgâiǃōb dib ge ǁîgu ǂama nîra hā.

²⁶ǁNāb, ǂhanu mîde ga ǃereammi di amǁgaukhan ge khoena nîra ǁoa.

²⁷Dī sa sîsenna ǃauga, îts ǁîba ǃhanab ai ǂhomibasen, îts ǁnās khaoǃgâ oms âtsa ǂnubi.

²⁸Îts tā ǃkhai-i ose ǀgūkhoeb âts ǃoagu ǀhûǀguitimî-ao kai: ǁNâi amǁgaub âts ǀkhats kha nî ǂgaeǂhapu?

²⁹Îts tā: ǁÎb ge tita dī-ūs ǁkhās xase ta ge tita nî dī-ū bi, tsî ta ge mâb hoaba sîsenni âb ǃoa nî dīdawa-am, ti mî!

³⁰Tita ge ǀguitsē ǀopesab di ǃhanaba ge ǃgû-īǀkhā, tsî ǂauxûiǂûǃhanab ǁnâuǃāoǃnâ khoeb on diba;

³¹tsî mû, ǁîb ge hoaragase ǁkhūn xa ǁhaoǂganhe hâ i, īb âb ge ǀomatsân xa ǃgū-aihe hâ, tsî ǀuiǂgoab âb ge khôaǂkhūǂkhūhe ge hâ i.

³²ǁÎsa ta ge kōǀîo, o ta ge ǁîsa ǂgaob ǃnâ ge ū, mû, tsî ta ge ǁîsa ǁgaus ase ge ūbasen:

³³ǂKharirose ǁoms, ǂkharirose ǂomhîs, ǂkharirose ǃomkha ǀhaoǀhaos, sâts nîga,

³⁴ob ge ǀgâsib âtsa ǀgūkhoeb axase nîra hāǂam tsi, tsî ǂguiǃnâgu ǂūgu âtsa ǁâtanisen hâ khoeb axase.