Read Khoekhoegowab ǂKhoamîdi 25 Bible Online

ǂKhoamîdi 25 - Khoekhoegowab bible

ǂKhoamîdi 25

¹Nēdi on ge ǂkhoamîdi Salomob dide, aogu Hiskiab, Judab gao-aob digu ge ǀhaoǀhaode:

²ǃKhai-e gaugaus ge a Elob di ǃgôasi, xawe ǃkhai-e ôaǃnâǂuis ge a gao-aob di ǃgôa.

³ǀGapib ǀhommi dib tsî ǃgammi ǃhūbaib dib tsî ǂgaob gao-aogu dib ge a ôaǃnâǃganuhe ǁoasa.

⁴ǀUrisana dībē ǀhaiǀuriba xu, o i ge soa-e tsunitsuni-aoba nî ǀkhība;

⁵ab eloxoresaba gao-aob di aisa xu ūbēhe, os ge trons âba ǂhanu-aisiba xu nîra ǁapo.

⁶Tā koasen gao-aob di ais aiǃâ, tsî ǃkhais kaigu dis ǃnâts ge mâ tide:

⁷Nēxopa ǂoaxa, tits ga mîǀîhe ǃkhais ge gaosab, mûra âts ge mûb di ais aiǃâts nî ǃgamǃgamhes ǃgâ-ai a ǃgâi.

⁸Tā ǃhaese ǀkhī ǂnoagus ǁga, îts ǀunis ai ǀnîsi tā xū-e dī, ǀgūkhoeb âts nî ǁî-i ǂama taotao tsi-e.

⁹ǂNoaguǃkhais âtsa sa ǀgūkhoeba ǂnoagu-ū, xawe tā ǂganǃgâsan naub dina ǂhaiǂhai,

¹⁰îts ǁî ǃkhaisa ga ǁnâu-i xa tā ǀauhe, tsū gommi âts ǀû tide xuige.

¹¹Mîs, ǁaeb ai ga ǃhoahes ge ǃhuniǀuri-apeldi, ǀhaiǀurixapan ǃnâ hâdi khami ī.

¹²Gā-ai ǂgōǀau-aob ge ǁnâuǀnamxa ǂgaes tawa a ǃhuniǀuri, ǃgom tsî ǀui ǃhuniǀurib ǀkha dīhe hâ ǃaob anixū.

¹³ǂGomǂgomsa sîsabeb ge ǁnān, ǁîba ra sîna ǃkhaib tsamaros dib khami ība ǃgaos di tsēs ai, ǁîb di ǀhonkhoeb di ǀomsab ra khoakhoa xui-ao.

¹⁴Khoeb, ǂkhaba hō-i xa ga koasenni, ǁîb ge ǀnanudi tsî ǂoab tsîn, ǀapib ǁîn ǃnâ hâ taman axase ī.

¹⁵ǂAmkhoeb ra ǃnūǃnâxasib ǀkha ǃhoagaobahe, tsî tsamra nams ra ǂkhōga khôa.

¹⁶Danibats ga hō-o ǁnâi ǂû, ǂâuts nîs kōse, îts tā ǁîb xa ǁâ, îts tā ǁîba ǀkhûiǂui.

¹⁷ǁKhaedawa ǂais âtsa ǀgūkhoeb di omsa xu, îb tā sats xa ǀgui, îb tā ǁkhan tsi.

¹⁸Aob, ǀgūkhoeb âb ǃoagu ga ǂkhabase ǃkhō-ammi, ǁnāb ge a hamer tsî a gôa tsî a ǀā ǂā.

¹⁹ǂGomǂgomsa tamab aits ra ǂōǂōsib di tsēs ai ǂgomaiǂnûi, ǂgomaiǂnûis ge khôa hâ ǁgû-i, tsî ǁnobe ra ǂai-i axase ī.

²⁰ǁNaetsanade, ǃoaxa ǂgaob hâ hîa ga ǁnaeb, ǁnāb ge sarab âba ǃkhai tsēs ai ra ǁhûǁnâb khami ī, tsî ǀkhuruxûib khami ǀhapis ai.

²¹ǁNāb, satsa ǁkhan hâb ga ǃâo, pere-e ǂûmā bi, tsî ǁgâb kao, ǁgam-e āsi bi;

²²nētits ge ǀaexa ǂnomde danas âb ai nîra ǀhaoǀhao, tsî ǃKhūb ge ǁî ǃkhaisa nîra mādawa-am tsi xuige.

²³ǀApas di ǂoab ra ǀapiba hā-ū, tsî ǁaixa ais ra ǂganǃgâsa namsa ǀkhī kai.

²⁴Oms ǂamǃnâs di ǁhôa-i ǃnâ ǁans ge ǁgaoǃnâ tara-i ǀkha ǀgui oms ǃnâ ǁanǁares xa a ǃgâi.

²⁵ǃGâi ǂhôa-i, ǃnū ǃhū-e xu ga hā-i ge ǃkhai ǁgam-i, ǀhupu hâ ǀoms aits ra ǂnâ-i axase ī.

²⁶ǂHanu-aib hîa eloxoresab aiǃâ ga ǁnopeb, ǁnāb ge a ǀgomaxa ǀau tsî a ǁgao hâ ǂgâ.

²⁷Danib xa kaise ǂûs ge ǃgâi tama hâ, xawe ôaǃnâs nēti ī xūn di ǂkhaisib dis ge a ǃgôasi.

²⁸ǁNā aob, gagas âba ūdawa ǁoab ge khôaǃkhowahe hâ tsî ǂnubiǂgoao ǃās ase ī.