Read Khoekhoegowab ǂKhoamîdi 26 Bible Online

ǂKhoamîdi 26 - Khoekhoegowab bible

ǂKhoamîdi 26

¹Tsamaros ǁkhūnaba tsî ǀapib ǃgaoǁaeba anuba tamas ǁkhās xaseb ge ǃgôasiba gâreba anuba tama hâ.

²Kuninis ra ǁkhanabē tsî swabel-ani-i ra doebē khami i ge ǁnā ǀâxare-i, ǃkhai-i ose ga ǀkhī-e hā tide.

³Samib ge hāba hâba, tsî ǂgā-amǃnâxūs ge esela hâba, tsî ǂnauhaib ge gâreb di ǁâba hâba.

⁴Gâreba gâresib âb ǃoa tā ǃeream, îts tā ǁîb ǀkha ǀguiti-ī.

⁵Gâreba gâresib âb ǃoa ǃeream, îb tā ǁîb mûǁae gā-aise ī.

⁶ǁNāb, ǂhôasa gâreb di ǃommi ǀkha ga sîb ge ǂaide ra ǃgaoǁnânai, tsîb ra tsūǃōba tsâ.

⁷ǃHom hâ khoe-i di ǂaira ǀguiti-ī tamas ǁkhās khamis ge ǂkhoamîsa gâren di ams ǃnâ i.

⁸ǁNāb, ǃgomǀgausa ǀuide jaboxū-i ǃnâ ra ǃgaeb khamib ge ǁnāb, gâreba ǃgôasiba ra māba ī.

⁹ǁKhū-i āǁō hâb ǃommi ǃnâ ra ǃkhā-i khamis ge ǂkhoamîsa gâren di ams ǃnâ ī.

¹⁰Kai khoegu ge mâb hoaba ra ǃoa kai, gâre khoega gu ra ǃgae tsî ǃûǂamaoga gu ra ǃgae xui-ao.

¹¹Arib ra ǀkhûib âb ǃoa oas ǁkhās xaseb ge gâreba gâresib âba ǁkhawa ra dī.

¹²Mûts ge aoba ǁîb mûǁae a gā-aiba? Gâreb xats ge ǁîb ǃgâ-ai xū-e ǃâubasen ǁkhā.

¹³ǀOpesab ge: Xammi ge daob ai hâ, xammi ge ǃgangu ai hâ! ti ra mî.

¹⁴Daos ra ǂgāǀurib âs ǃnâ mâ ra gon khamib ra ǀopesaba kharob âb ai dī.

¹⁵ǀOpesab ge ǃommi âba ǃores âb ǃnâ ra ǂgā, xaweb ra ǃgombahe ǁîba ams tawa ǁkhawa ūsīsa.

¹⁶ǀOpesab ge ǁîb mûǁae hûgu, ǁkhā ǃereamde ra ǃereamgu ǃgâ-ai a gā-ai.

¹⁷ǁNā ǃgû-īgarub, ǂnoagus ǁîb di tamasa ra ǁaeǁaesenni ge ǁnā-i, ari-e ǂgaera ai ra ǃkhō-i khami ī.

¹⁸ǃKhau hâ khoeb hîa ǂhubiǂāgu tsî ǁōǁōsa xūna ra ǂnoas ǀguisa hîb:

¹⁹ǁNāb ǁkhāb khamib ge ī ǁnā aob, ǀgūkhoeb âba gāxaǃnâsise sîsenū tsî: Gā ta goro, ti ra mîba.

²⁰ǀAen ga ǀkhaio, os ra ǀaesa ǀari; tsî ǀhoe-ao-i ga kāo, os ra ǂnoagusa ǀû.

²¹ǂNomdi ǀaexa ǂnoms ǂnamipe hâ, tsî ǀaen ǀaesa hâǂnamipe hâs ǁkhās khamib ǂnoaguxa khoeba hâ, ǂnoagusab nî ǂhubi ga.

²²Mîdi ǀhoe-aob didi ge ǁkhoaxa ǂûn ase ī, hîa ǃnāb ǃnâ ra ǂgâna.

²³ǀAexa amǁgaugu tsî ǂkhaba ǂgaob tsîn ge ǂgoasūǃâro-i ǀhaiǀurigoab ǀkha ǃkhûǃgâhe hâ-i axase ī.

²⁴ǁNāb, ǁkhan rab ge amǁgaukha âb ǀkha ǃhaose ra tanisen, xawe ǃnāb âb ǃnâb ra gāxaǃnâse sîsen.

²⁵Dommi âb ǀkhab ga ǀkhomabaseno: Tā ǂgom bi, hû ǁgaidīgu ǂgaob âb ǃnâ hâ xuige.

²⁶Gāxaǃnâse ǂgaob âb ǃnâ ǁkhanna ga gaugaub, ǁnāb di ǂkhabasib ge ǀhaohâb aiǃâ nîra ǂhai.

²⁷Tsau-e ga khaob, ǁnāb ge ǁî-i ǃnâ nîra ǁnā, tsî ǀui-e ga gabab, ǁnāb ai i ge nîra oahā.

²⁸ǂKhaba nams ra ǁnān, ǁîsa ra ǂkhūǂkhūna ǁkhan, tsî ǂkhanu ams ra dawaǃkhupu.