Read Khoekhoegowab ǂKhoamîdi 27 Bible Online

ǂKhoamîdi 27 - Khoekhoegowab bible

ǂKhoamîdi 27

¹Tā ǁarikam tsēs xa koasen, tsēs nî ǁora xū-ets a ǀū xuige.

²Ab ǃhaokhoeba satsa koa, îts tā ams âts ǂhanis ǀkha koasen; ǀūts a khoeba ab dī, tsî amǁgaukha âtsa tama.

³ǀUis ge a ǃgom, tsî ǀgopab ge a ǃkhanaxa; xawe ǁaixasib gâreb dib ge ǁîra hoara xa a ǃgom,

⁴ǁgôasib tsî ǃnāǂamsib ǁaib dib ge a tsū; xawe tari-e mâ ǁkhā surib aiǃâ?

⁵ǂHaisa ǂgōǀaus ge ǂganǃgâsa ǀnammi xa a ǃgâi.

⁶ǀHapiǂnûidi ǀnamsabeb didi ge a îǂhôa; xawe ǁoadi ǁkhansabeb didi ge a gāxaǃnâ.

⁷ǁÂ hâ ǀoms ra ǀhûdaniba dāǃgâ, xawe ǃâ hâ ǀomsan ge aun hoana a ǂkhonba.

⁸Anis oms âsa xu ra ǁkhanamas ǁkhās xaseb ge ǁnā aoba ī, ǃkhais âba xu ra ǁhapumaba.

⁹Olib tsî ǃgâihamxūb tsîkha ge ǂgaoba ra ǃgâiaǂgao kai; ǁnās ǁkhās khamib ge ǂkhonsib sats khoets di ǀhōsab diba ī ǀoms di ǀapemās ǃaroma.

¹⁰Tā ǁnāxū sa ǀhōsab kas, sa îb di ǀhōsa ge ib kas hoasa, îts sa ǃgâsab di oms ǃoa tā ǃgû tsūǃōb âts di tsēs ai; ǀgūkhoeb ǀgūse hâb ge ǃgâsab ǃnūse hâb xa a ǃgâi.

¹¹Gā-aise ī ti ôa, îts ti ǂgaoba ǃgâiaǂgao kai, î ta tita ga ǃkhāǃkhāba xū-e ǃeream ǁkhā.

¹²Gā-aib ra ǂkhababa mû tsî gaugausen; gâren ǃgûǂgâ tsî ra ǁkharahe.

¹³Khoeb ga ǃhaokhoeba mâba-ao kaibao: ǁNâi sarab âba ū, îts ǀū-ai taras ǃaroma ǁîba ǁauǁauxūna ūtoa.

¹⁴Khoexakhoeb âba ga ǃgari dommi ǀkha ǃnauǁgoaga ǀkhaeb, ǁî ǃkhais ge ǁîba ǀâxareb ase nîra ǃgôabahe.

¹⁵Hâhâ ra ǀnanub, ǀapixa tsēs ai ra ǀapib tsî ǁgaoǃnâ taras tsîra ge ǀguiti-ī;

¹⁶ǁîsa ga ǁkhaedawa ǂgaob hoab ge ǂoaba ra ǁkhaedawa ǂgao, tsî amǀkhāb ǃommi âb ra oliba ǃkhō ǂgao.

¹⁷ǂNūǀurib ra ǂnūǀurib ǀkha ǀāǀāhes ǁkhās xaseb ra aoba ǀgūkhoeb âb di aisa ǀāǀā.

¹⁸ǀNomahaisa ga ǃûib, ǁnāb ge ǂûn âsa nîra ǂû, tsî ǀhonkhoeb âba ga ǂanni, ǁnāb ge nîra ǃgôahe.

¹⁹ǁGammi ǃnâs aisa ais ǃoagu hâs ǁkhās xaseb ge khoeb di ǂgaoba khoeb ǃoagu hâ.

²⁰ǀAmo ǀaeb tsî kāǁōb tsîkha tātsē ǂâu tama hâs ǁkhās khami ra ge khoeb di mûra tātsē ǂâu tama hâ.

²¹Tsunitsunisūs ǀhaiǀuriba hâba, tsî tsunitsuni-omsa ǃhuniǀuriba; ǁnās ǁkhās xaseb ra aoba ǃkhōǀkhās âb ǃoa ǃâitsâhe.

²²Gârebats ga ǃhûǃnâ xū-i ǃnâ ǃhû, ǃhoron ǂkhū hân ǁaegu, xaweb ge gâresib âba ǁîba xu bē tide.

²³Ôasa, îts ǀgoan âts di mâsiba ǂan, îts sa gūna ǃgaoǃgâ-e ūhâba,

²⁴ǁuib ǀamos kōse hâhâ tama, tsî kronsa xare hâhâs nî ǃhaosa xu ǃhaosa ǃoa?

²⁵ǀHai ǀgâb ra kā, tsîn ǃam ǀgâna ra mûhe, tsîn ǁhaona ǃhomgu ai ra ǀhaoǀhaohe,

²⁶ǁnāǃnubain ge ǁkhaona sarase nî ība tsi, tsî pirina ǃhanab di ǁamaǀgause.

²⁷Ots ge ǁkhāti kaise ǀoasa piridai-e nîra ūhâ sa ǂûse, tsî sa ommi di ǂûse, tsî ǃgādi âts di ûixūse.