Read Khoekhoegowab ǂKhoamîdi 28 Bible Online

ǂKhoamîdi 28 - Khoekhoegowab bible

ǂKhoamîdi 28

¹Eloxoresan ra ǃhū, ǃgôaǃgonao-i a ǀkhai hîa, xawe mâ ǂhanu-aib hoab ge ǂkham xammi khami a ǃgâiǂâixa.

²ǁOreb ǃhūb dib ǃaromas ge, gaosagu âb ra ǂguisa, xawe ǁnâuǃāxa tsî ǂanxa khoen ǃaromas ge ǁîb ra ǂomxase hâsa.

³Aob ǀgâsab, hîa ǀgâsana ga ǁgâiǀāb, ǁîb ge dâubē ra ǀapib, pereba ūǀkhī tamab khami ī.

⁴ǂHanuba ra ǁnāxūn ra eloxoresana ǃkhōǀkhā, xawe ǂhanuba ga ǃkhōǀgaipen ra ǁîna ǂnoagu-ū.

⁵ǂKhaba khoen ge ǂhanuba ǁnâuǃā tama hā, xawe ǃKhūba ra ôan ge xūn hoana ra ǁnâuǃā.

⁶ǀGâsab, ǂhauǃnâsib âb ǃnâ ga tanisenni, ǁîb ge gamaǃgâ daoga ūhâb ǃgâ-ai a ǃgâi, matikōseb ga ǁnāba ǃkhū xawe.

⁷ǂHanuba ga sâub ǁnāb ge a ǁnâuǃāxa ǀgôa; xawe ǁnāb, hîa ǃnāǂamsase a ō-aogu di horesab, ǁîb ra ǁgûba taotao.

⁸Xūn âba hōbasens tsî hōǃnās tsîra ǀkha ga ǂguiǂguib, ǁnāb ge ǁîna ǀgâsaba ǀkhom hâba ra ǀhaoǀhaoba.

⁹ǂGaes âba ga ǂhanuba ǁnâusa xu ūnub, ǁnāb di ǀgores ge ǁgaiǁgaisa xūse nîra ī.

¹⁰ǂHauǃnâna ga ǂkhaba dao-i ai ǂgaeǂhapub, ǁnāb ge ǁî-aitsama tsaus âb ǃnâ nî ǁnā, xawe ǂhauǃnân ge ǃgâiba nî ǀumi.

¹¹ǃKhū hâb ge ǁîb mûǁae a gā-ai, xawe ǁnâuǃāxa ǀgâsab ra ǁîba ôaǃnâǃganu.

¹²ǂHanu-ain ga dâb xa urikhâio, ob ge ǂkhaisiba a kai, xawe eloxoresan ga khâio, ob ra khoeba ǂōse ôahe.

¹³ǃÛǂamdi âba ga gaugaub, ǁnāb ge ǃgâiǃgâ tide, xawe ǁîde ga ǁguiǁnâ tsî ǁnāxūb, ǁîb ge ǀkhomxaǂgaosiba nîra hō.

¹⁴ǃGâiǃō khoeb ge ǁnāb, hugaǀgui ra ǃaoba, xawe ǂgaob âba ga karokarob ǁnāb ge ǂkhabab ǃnâ nîra ǁnā.

¹⁵Eloxoresab ǀgâsa ǁae-e ga gaoǂammi, ǁîb ge ǃguru ra xammi tsî bēri ǃgûma raba.

¹⁶Gaosab, ǁnâuǃāb hoaba tôasi hâb ge ǁgâiǀāga ra ǂguiǂgui, xawe xūǃgunuxasiba ga ǁkhanni, ǁnāb ge tsēde nîra ǃnūǃnū.

¹⁷ǁNā khoeb, ǀaob ǀoms dib ǀkha ǃnaohe hâb ge ābǀî nîra ǁhâ, xawe ab tā mâǃgâhe!

¹⁸ǂHauǃnâse ga tanisenni, ǁnāb ge nîra sâuhe, xawe ǀgam daokha ai ga ǂkhabase tanisenni, ǁnāb ge tsaus ǃnâ nîra ǁnā.

¹⁹ǃHanab âba ga sîsenni, ǁnāb ge pereb xa nîra ǁâ, xawe ǁau khoena ga saob, ǁîb ge ǀgâsib xa nîra ǂâu.

²⁰Hoaragase îǂhôa khoeb ge ǀkhaegu xa nîra ǃkhū, xawe ǃhaese ga ǃkhū ǂgaob, ǁnāb ge ǀhapio tide.

²¹Khoen ǁaegu ǀgorasa dīs ge ǃgâi tama hâ; nē xūb khoeb kom pereǃâro-i ǂama ra ǃûǂam xūbao.

²²Xūn ǃoa ga ǃhaeb, ǁnāb ge ǂkhaba mûsa ūhâ khoeba, xaweb ge a ǀū, tôasib xab nîra hāǂamhe ǃkhaisa.

²³Khoe-e ga ǂgōǀaub ge ega ǀkhomma nîra hō, nams ǀkha ga ǁgoasenni ǃgâ-ai.

²⁴ǁGûs tsî ǁgûb tsîra ǀâǀhana tsî: ǁOre tamab, ti ga mîb, ǁnāb ge a hîǀhuru-aob di horesa.

²⁵ǀGapi ǂâisa ūhâb ra ǂnoagusa ǂkhaiǂkhaikhâi, xawe ǃKhūb ai ga ǂgomaiǂnûib, ǁîb ge nîra kau.

²⁶ǂGaob âb ai ga ǂgomaiǂnûib, ǁnāb ge a gâre; xawe gā-aisib ǃnâ ga tanisenni, ǁnāb ra ûi.

²⁷ǀGâsaba ga ǀkhaeb, ǁnāb ge tôasi tide, xawe mûra âba ga gaugaub, ǁîb ge kaise nîra ǀâxarehe.

²⁸Eloxoresan ga khâio, ob ra khoeba gaugausen; xawe kān kao, on ra ǂhanu-aina ǂgui.