Read Khoekhoegowab ǂKhoamîdi 29 Bible Online

ǂKhoamîdi 29 - Khoekhoegowab bible

ǂKhoamîdi 29

¹Khoeb ǃnuri ǃnāde ǁkharahe hâǃâ ǃaob âba ra karokarob, ǁnāb ge ǃhaese nîra khôaǂkhūǂkhūhe, ǂgauǂgau-i a ǀkhais kōse.

²ǂHanu-ain ga ǂguio, os ra ǁaesa ǃgâiaǂgao; xawe eloxoresab ga gao-o, os ra ǁaesa ǀhâimâinǀom.

³Aob, gā-aisiba ǀnam hâb ge ǁîb di îba ra ǃgâiaǂgao kai, xawe ǁnāb, ǀai-aodi ǀkha ga ǀhōgub ge xūna ra dītoa.

⁴Gao-aob ge ǃhūba ǂhanuba xu ra mâhō kai, xawe aob, ǀkhaexūna ǀnam hâb ra ǁîna hîkākā.

⁵ǁNā aob, ǀgūkhoeb âba ga ǁgoasenni, ǁîb ge dāǃharogu âba ǂhamsa ra ǃāba.

⁶ǃÛǂams ǂkhaba-aob dis ǃnâb ge ǁnoaba hâ, xawe ǂhanu-aib ra dâ tsî ra ǃgâiaǂgao.

⁷ǂHanu-aib ge ǂhanuǂhanuǃkhais ǀgâsan disa a ǂan; xawe eloxoresab ge ǂansa ǃkhā tama hâ.

⁸ǃHō-aon ra ǃāsa ǂhubi, xawe gā-ain ra ǁaiba ǁkhaedawa.

⁹Gā-ai aob ga gâre aob ǀkha ǂhanuǂhanuǃkhai-e ǂharuguo, ǁaixab kas, âib kas hoasa: Sâ-i ge a ǀkhai.

¹⁰ǀAoǁharisa khoen ra ǂhauǃnâba ǁkhan, xawe ǂhanu-ain ra ǀoms âba ôa.

¹¹Gâreb ra gagas âba ǁhōǂuitoa, xawe gā-aib ra ǁîsa ūdawa.

¹²Gaosab, ǂhumiǃhoab ai ga ǃgaoǃgâb di ǃgāgu hoagu ge a eloxoresa.

¹³ǀGâsab tsî ǃkhū hâb tsîkha ra ǀhao, ǃKhūb ra ǁîkha hoakha di mûde ǃnâǃnâ.

¹⁴ǁNā gao-aob ǀgâsana îǂhôasib ǃnâ ǂhanuse ga sîsenūb, ǁîb di trons ge ǀamos kōse nî ǁapoǁapohe.

¹⁵ǀHamhaib tsî ǁkharab tsîkha ge gā-aisiba ra ǀkhae, xawe ǀgôab ǁîb ǂgao hâ khami ra xūheb, ǁîb ra ǁgûsa taotao.

¹⁶Eloxoresan ga ǂguio, os ra ǃûǂamsa ǀoasa; xawe ǂhanu-ain ge ǁîn di ǁnāsa nîra ǃgapaǀî.

¹⁷ǁKhara ǀgôab âtsa, ots ge ǁîb xa nîra sâ kaihe, ob ge ǁîba ǀoms âtsa nîra ǃgâiaǂgao kai.

¹⁸Kēbosi-i ra ǀkhai, os ra ǁaesa ǀkhaiǀkhā; xawe ǃgâiǃō i ge ǁnā-i, ǂhanuba ga sâu-e.

¹⁹ǃGāb ge mîdi ǀguidi ǀkha ǂgōǀauhe ǁoa; ǁnâuǃāb ra xaweb ge ǃeream tsi tide.

²⁰Aob, mîdi ǀkha a ǃhaeba mûts ge? Gâreb xats ge ǁîb ǃgâ-ai xū-e ǃâubasen ǁkhā.

²¹Sa ǃgābats ga ǂkhamsisa xu ǂause sîsenūo, ob ge ega nî ǀgôa kai ǂgao.

²²ǁAixa khoeb ra ǂnoagude ǂkhaiǂkhai, tsî ǁgôasib ra ǃnāsase ǃûǂam.

²³ǃGurib khoeb dib ge ǁîba nîra ǃgamǃgam; xawe ǃgamǃgamsensa gagasa ūhâb ge ǃgôasiba nîra hō.

²⁴ǃNari-aob ǀkha ga amǃnâxab, ǁnāb ge ǀoms âba ra ǁkhan; ǀâxarebab ra ǁnâu, xaweb hā tsî ǁîsa ǂanǂan tama.

²⁵Khoen ǂama ǃaos ra ǁnoa-e ǁgui, xawe ǃKhūb ai ga ǂgomaiǂnûib ge ǀgapi hâǃkhai-i ǃnâ nîra ǂnûihe.

²⁶ǂGuin ge ǁnān, gaosab di aisa ra ôana; xawe mâ-i hoa-i di ǀgoraǃgâs ge ǃKhūba xu ra hā.

²⁷ǂHanuoǃnâ khoeb ge ǂhanu-aiba ǁgaiǁgaisase ība; xawe ǂhanu daoba ūhâb ge eloxoresaba ǁgaiǁgaisase ība.