Read Khoekhoegowab ǂKhoamîdi 3 Bible Online

ǂKhoamîdi 3 - Khoekhoegowab bible

ǂKhoamîdi 3

¹Ti ôa, tā ǀuru ti ǂhanuba, îb sa ǂgaoba ti mîmāde sâu,

²ǁîdi ge ǂomxa tsēdi tsî kurigu ûib digu, tsî ǂkhîb tsîna nîra ūhāba tsi.

³ǀKhomxaǂgaosib tsî ǂgomǂgomsasib tsîkha ǁnāxū tsi tidega; sa ǃaob ai ǁîde ǃgae, îts ǁîde sa ǂgaob di tāb ai xoa.

⁴Ots ge ǀkhommi tsî ǃgâiǂâis tsîra nîra hō, Elob tsî khoen tsîn mûǁae.

⁵ǂGomaiǂnûi ǃKhūb ai sa ǂgaob hoab ǀkha, îts tā sa ǁnâuǃāb ai ǂgomǃgâ;

⁶ǁîba ǂan sa daogu hoagu ǃnâ, ob ge ǁîba daogu âtsa nîra ǂhauǂhau.

⁷Tā gā-aise ūsen sa mûǁae; ǃKhūba ǃao, îts ǂkhababa xu ǂgō.

⁸Os ge ǁnāsa satsa soǀôase nî ība, tsî khoakhoase sa ǂkhōga.

⁹ǃKhūba ǀkhae sa xūn xa tsî sa hōǂgābasendi hoadi di ǂgurosan xa;

¹⁰o gu ge sâu-omgu âtsa ǃnāǂamsib xa nîra ǀoa, o di ge ǀāǃnâǃoredi âtsa ǂkhon ǂauxûib xa nîra ǃnāǂam.

¹¹Ti ôa, ǃKhūb di ǃkhâisa tā aoxū, îts ǁîb di ǁkharab xa tā ǀara,

¹²ǃKhūb, ǁîb ǀnam hâba ra ǁkhara xui-ao, ā, ǁgûb ra ǁnā ǀgôab, hîab a ǀnamma ǁkharas xase.

¹³ǃGâiǃōb ge ǁnā khoeb, gā-aisiba ra hōb tsî ǁnā khoeb, ǁnâuǃāxasiba ra ūǀkhība.

¹⁴ǁÎb di ǁamagus ge ǀhaiǀurib di ǁamagus ǃgâ-ai a ǃgâi, tsî hōǂgābasens âb ǀui ǃhuniǀurib xa.

¹⁵ǁÎb ge robainǀuidi xa a ǃgomǀgausa; tsî ūts ga hâ ǃgomǀgausan hoan ge ǁîb ǀkha ǀguiti-ī tama hâ.

¹⁶ǂOmxasib tsēdi dib ge amǀkhāb ǁôab âb ǃnâ hâ, ǁareǀkhāb ǁôab âb ǃnâ ǃkhūsib tsî ǃgôasib tsîkha.

¹⁷ǁÎb di daogu ge a ǀnamǀnamsa dao, tsî ǃgangu âb hoagu ge a ǂkhî.

¹⁸ǁÎb ge ûib di haise ība, ǁnān ǁîba ra ǃkhōna; tsî ǁîba ga ǃkhōǀgaipe-i hoa-i ge a ǃgâiǃō.

¹⁹ǃKhūb ge ǃhūbaiba gā-aisib ǀkha ge ǃgaoǃgao, ǀhomga ǁnâuǃāb ǀkha ge ǁāǁā;

²⁰ǂans âba xu gu ge ǁgamga ge ǂkhawe, tsî ǀnanudi ge ǀauba ge ǂnâ.

²¹Ti ôa, ab ǁîba tā ǂgō mûra âtsa xu, sâuhâhâ re gā-aisib tsî ǂanǃgâsenxasib tsîkha;

²²ǁîkha ge sa ǀomsa ûise nîra ība xuige, tsî ǀnamǀnamsasiba ǃaob âtsa.

²³ǃNubaits ge daob âtsa sâusase nîra ǃgû, tsîs ge ǂais âtsa ǃnôa tide;

²⁴ǁgoets kao, ots ge ǃhuri tide; tsî ǁgoets kao, os ge sa ǂomsa nîra ǂkhonba tsi.

²⁵Tā ǃao ǃhae ǃhuriǃhuris kas, hîǀhurus eloxoresan dis kas hoasa, hās ka ǃnubai,

²⁶ǃKhūb ge ǃâubasens âts ǀkha nîra hâ xuige, tsî ǁîb ge ǂais âtsa ǃkhōsa xu nîra sâu.

²⁷Tā xūna ǂkhā ǁnāb ǁîna anu hâba, ǃomkha âts ǃnâb ga dīts nî ǀgaiba hâo.

²⁸ǃGûkhoeb âts ǃoa: ǃGû îts ǁkhawa hā, î ta ǁari mā tsi, ti tā mî, xū-i sa tawa hâ hîa.

²⁹Tā ǂkhabaxū-e kuru sa ǀgūkhoebǀî, ǂgomaiǂnûis ǀkhab sa tawa hâ hîa.

³⁰Tā khoe-i ǀkha ǂnoagu ǃaromaoǃnâse, tsūseb ga dī tama io.

³¹Tā suri ǁgari-aoba, îts ǁîb daogu di ǀguib xaweba tā ǁhûiǂuibasen,

³²ǁnāǁgôa-aob ge ǃKhūba ǁgaiǁgaisase ība xuige, xawe ǂganǃgâsib âb ge ǂhauǃnâb ǀkha hâ.

³³ǀÂxareb ǃKhūb dib ge eloxoresan di ommi ǃnâ hâ, xawe ǂhanu-ain di ǁanǃkhaisab ge ǁîba nîra ǀkhae.

³⁴Amaseb ge ǁîba ǃhō-aona nîra ǃhō xawe tsamtsiǃnânab ge ǁîba ǀkhomma nîra mā.

³⁵Gā-ain ge ǃgôasiba nîra ǀumi xawe gâren ge nîra taob xa hāǂamhe.