Read Khoekhoegowab ǂKhoamîdi 30 Bible Online

ǂKhoamîdi 30 - Khoekhoegowab bible

ǂKhoamîdi 30

¹Mîdi Aguri, Jakeb ôab didi; ǃkhana-i ge nē-e: Aob ra ǃhoa Itieli ǃoa, Itieli tsî Uxali tsîkha ǃoa:

²Amase, tita ge hoan xa ǁnâuǃāo khoeta, tsî khoe-i di ǁnâuǃāba ta ūhâ tama;

³gā-aisi-i xare-e ta ǁkhāǁkhāsen tama, tsî ǂans ǃanun disa ta a ǀū.

⁴Tariba ǁnāb, ǀhomǃapa tsî ra ǁgôaxaba? Tariba ǁnāb, ǂoaba ǃommi ǃnâ ge ǃkhōba? Tariba ǁnāb, ǁgamga sarab âb ǃnâ ge ǃgae-amma? Tariba ǁnāb, ǃhūbaib di ǀkhâuǀamde ge mâiba? Matib ǀon hâ, tsî matib ǀon hâ ǁîb di ôaba? ǂAnts ka io?

⁵Mâ mîs Elob dis hoas ge a ǃâitsâǃganuhesa; ǁîb ge khōsikhōse ība ǁnān, ǁîb ai ra ǂgomaiǂnûina.

⁶Tā xū-e dīǀaro ǁîb di mîde, îb ǁîba tā ǁkhara tsi, îts tā ǂhumiǃnâse hōhe.

⁷ǀGam xūna ta ge satsa ge ǂgaoǀkhā, tā ǁîna tita ǂkhā, ǁō tama ta hâ hîa:

⁸ǁAusib tsî ǂhumiǃhoab tsîkha dībē tita xu; ǀgâsib tsî ǃkhūsib tsîkha tā mā te: Îts ǂhâ ta hâ tsēkorobe pereba mā te.

⁹Î ta tā ǁâ hâse ǀoa tsi tsî: Tariba ǃKhūba? ti mî; tsî ǀgâsa ta kao, î ta tā ǃnari, î ta tā Elob di ǀonsa tsâǀkhā.

¹⁰ǃGāb xa ǀhonkhoeb âb tawa tā ǀhoe, îb tā ǀâxare tsi, îts tā ǀhapixa.

¹¹ǃHao-i ge hâ, ǁgûba ra ǀâxare-i tsî ǁgûsa ǀkhae tama-e;

¹²ǃhao-i, ǁî-i mûǁae a ǃanu-i tsî xawe ǀurisan â-e xu ǁāhe tama hâ-e;

¹³ǃhao-i ǀgapi mûde ūhâ-i tsî ǃguri mûǃgâkha ūhâ-i;

¹⁴ǃhao-i, ǁgûga ūhâ-i ǃkhamgôase ī-i, ǁgûga ūhâ-i gôase ī-e, ǀkhomǀkhomsaben ǃhūbaib din tsî ǀgâsan, khoen ǁaegu hânan nî haputoaga.

¹⁵ǀAoǀgomaos ge ǀgam ǀgôara ūhâ: Mā, mā, ti ra mî ra. ǃNona xūn ge ǁâ ǁoana; hakan ge tātsē: ǂÂu go, ti mî tama hâ:

¹⁶ǀHobas, ǂganamsen hâ ǃnāb, ǃhūb, ǁgam-i xa ǁâ tamab, tsî ǀaes tsîn ge: ǂÂu go, ti mî tama hâ.

¹⁷ǁNā mûs ǁgûba ga ǃhōs, tsî ǁgûsa ǁnâuǀnamsa ga ǃharaxūs, ǁîsan ge goran ǃgarob dina nîra ǁhoroǂui, tsî ǂkham ǃariǃkhān ge ǁîsa nîra hapu.

¹⁸Nē ǃnona xūn ge tita a buruburuxaba, ā, hakan ge tita ǀūna:

¹⁹Daob ǃariǃkhās dib ǀhommiǀî garub, daob ǀaob dib ǃhaob ai ra īb, daob doe-ommi hurib ǁaegu gaub dib, tsî daob aob dib ǂkhamkhoes tawa.

²⁰Nētib ge ǁkhāti daob ǃgamekhôaxa taras diba i: ǂÛ tsîs ǀomanam tsî: Tsū xū-e ta dī tama, ti ra mî.

²¹ǃNona xūn ǃaromab ra ǃhūbaiba gongonǃnâhe, ā, hakan, hîab a tani ǁoan ǃaroma:

²²ǃGāb ǃaroma, gao-ao kaib kao; tsî gâreb ǃaroma, pereb xab ga ǁâo;

²³ǁkhansabes ǃaroma, ǃgamehes kao; tsî ǃgās ǃaroma, ǀhonkhoes âs di ǀumi-ao kais kao.

²⁴Hakan ge ǂkharina ǃhūbaib ai hân xa, xawen ge a gā-ai, ǃnā hâsen ge a gā-ai:

²⁵ǂGoberun ge a ǀgaio ǁae, xawen ra ǁkhunab ǃnâ ǂûn âna ǂhomibasen;

²⁶ǃâun ge a ǁkhā-o ǁae, xawen ra oms âna ǃhaob ai om;

²⁷ǂhoms ge a gao-ao-o, xawen ra ǀhûpe saogubes ǃnâ ǃgûǂoa;

²⁸ǂnobobats ge ǃomgu ǀkha a ǃkhō ǁkhā, tsî xaweb ge î-omgu gao-aogu digu ǃnâ ra hâ.

²⁹ǃNonan ge ǁnān, ǃgâi dāsa ūhâna, ā, hakan ge ǁîn, anuse ra dāna:

³⁰Xammi ǀgurun ǃnâ a ǀgaisab tsî khoe-i xare-i aiǃâba xu oa tamab;

³¹tsî ǂoa-arib, ǃgâi kamanaba ūhâb, tsî ǂkharapirib, tsî ǁnā gao-aob hîa mâǃoahe ǁoab tsîga.

³²Gâresets ǁî-aitsama go ǀgapiǀgapisens kas, ǂâis ǀkhats ga xū-e dīs kas hoas ǃnâ, ǁnâi ǁamanam.

³³ǁNubus daib dis ra ora ǁnuiba ūǀkhī, tsî ǁgâis ǂguis dis ra ǀaoba ūǀkhī, tsî ǁgâis ǁaib dis ra ǂnoagusa ūǀkhī xuige.