Read Khoekhoegowab ǂKhoamîdi 4 Bible Online

ǂKhoamîdi 4 - Khoekhoegowab bible

ǂKhoamîdi 4

¹ǁNâu, ǀgôado ǁgûb di ǂgōǀausa; î du ǃgaoǃgâ ǁnâuǃāba du nî hōga.

²ǃGâi ǁkhāǁkhāsa ta ra mā du, xuige ti ǂhanuba tā ǁnāxū.

³Tita on ge ti îb ôa ge i, tsî tsaura tsî ǂguro ǃnae ge i ta ti îs di mûǁae xuige,

⁴tsîb ge ǁîba tita ǁkhāǁkhā tsî ge mî: Ab sa ǂgaoba ti mîde ǃkhōǀgaipe; ti mîmāde dī îts ûi.

⁵Gā-aisiba hōbasen, ǁnâuǃāba hōbasen; tā ǀuru, îts tā ti ams di mîde xu ǂgō.

⁶Tā ǁîba ǁnāxū, ob ge ǁîba nîra sâu tsi; ǁîba ǀnam ob ge nîra ǃûi tsi.

⁷Gā-aisib ge a ǂguro; xuige gā-aisiba hōbasen. Î ūts hân hoan ǀkha ǁnâuǃāba hōbasen.

⁸ǁÎba ǀgapiǀgapi, ob ge satsa nîra ǀgapiǀgapi; ob ge satsa nîra ǃgôa ǁîbats ga ǀnamo.

⁹ǁÎb ge danas âtsa ǀnamǀnamsasib di anixūse nîra ība, îsa kronsab ge nîra mā tsi.

¹⁰ǁNâu, ti ôa îts ti mîde ǃkhōǃoa, o gu ge kurigu sa ûib diga nîra ǂguiǂguihe.

¹¹Tita ge gā-aisib daob ǃnâ ra ǁgau tsi, tita ge ǂhanu dāǃharogu ǃnâ ra dā kai tsi.

¹²ǃGûts kao, os ge dās âtsa ǂōǂōhe tide; tsî ǃkhoets kao, ots ge ǃnôa tide.

¹³ǂGōǀausa ǃkhōǀgara îts tā ǁnāxū si; ǁîsa ǃkhōǀgaipe, ǁîs a sa ûi xuige.

¹⁴Tā eloxoresan daob ai hā, îts ǂkhaban di daob ai tā dā.

¹⁵ǁÎba ǃharaxū, îts ǁîb ǃoa tā ǃgâu; ǂgō ǁîba xu îts ǃgû-īǀkhā bi.

¹⁶ǁÎn ge ǁom tama hâ, ǂkhabaxū-en ga dī tama hâ io xuige; ǂomsan ra ūǀhanahe, khoe-en ga ǃnôa kai tama i hâo.

¹⁷ǁÎn ge eloxoresasib di pereba ǂû tsî ǂauxûib ǁgaris diba ra ā.

¹⁸Xawe daob ǂhanu-ain dib ge ǃnâ ra ǃnâ-i ǃaruǀîǀgui tsēs ra ǀoas kōse ra ǃnâ-i khami ī.

¹⁹Daob eloxoresan dib ge ǃkhaenab khami ī; ǁîn ge a ǀū, mâ xū-i ain ra ǃnôa ǃkhaisa.

²⁰Ti ôa, ǃgaoǃgâ ti mîdi ai; ǂō sa ǂgaesa ti mîdiǀî,

²¹Sa mûra xu a di tā bē, sâu ǁîde ǂgaob âts di ǁaegub ǃnâ;

²² ǁîdi ge ǁnān, ǁîde ra hōn di ûi tsî ǁîn ǁgans hoas di soǀôa.

²³Sâuhe nî xūn hoan ǃgâ-ai sâu sa ǂgaoba, ǁîba xu di ǀaudi ûib dide ra ôa xuige.

²⁴ǂKhabasib ams diba satsa xu dībē; îts gamaǃgâsib amǁgaukha diba ǃnūse satsa xu sîsenbē.

²⁵A ra mûra âtsa ǂhanuse kō, mûǃgâkha âtsa a kha ǁaposase mâ.

²⁶Kōǃgâ ǃgûs sa ǂais disa, îts sa daogu hoaga ǁapoǁapo re.

²⁷Tā ǂgō amǀkhābǀîs kas, ǁareǀkhābǀîs kas hoasa; ūdawa sa ǂaisa ǂkhababa xu.