Read Khoekhoegowab ǂKhoamîdi 5 Bible Online

ǂKhoamîdi 5 - Khoekhoegowab bible

ǂKhoamîdi 5

¹Ti ôa, ǃgaoǃgâ ti gā-aisib ai, ǂō sa ǂgaesa ti ǁnâuǃābǀî,

²ǂanǃgâsenxasib hoabats nî ūhâga amǁgaukha âts nî ǂansa sâubasenga.

³Amǁgaukha ǃhao taras dikha xub ra ǀhûdaniba ǂnâ xuige, tsî nams âs ge oli-i xa a ǂkhanu;

⁴xawe ǀams âs ge alsems khami a au, tsî a ǀā hoaǀkhāǀāgôab khami.

⁵ǂAira âs ge ǁōb ǃoa ra ǁgôa; dāǃharodi âs ge ǀamoǀaeba ra ǃkhōǀgaipe.

⁶Sats ûib di daoba hōǃâ tidega di ge ǃgûdi âsa a ǁaeo, sats ǁîsa ǃgaoǃgâ tidese.

⁷Nēsi ǁnâi, ti ôago ǃgâ tita; î go tā ǂgō ti ams di mîde xu.

⁸Sa daoba ǃnūse ǁîsa xu dī, îts dao-ams ǁîs oms disa tā ǀgū,

⁹îts nauna sa ǃgôaba tā mā, tsî tsū khoesa sa kuriga,

¹⁰în ǃhaokhoena ūts hân xa tā ǁâ, îb sa tsûtsûsa xūreba tā ǀū-aisas di oms ǃnâ sī.

¹¹Îts ǀunis ai satsa tā ǃgō, sa ǁgans tsî sa soros tsîra ga toa ǃnubai.

¹²Îts ǁnāǃnubai tā mî: Tare xū-i ǃaromasa ǂgōǀausa ta ge ǁkhansa, tsî ti ǂgaob ge ǂgōǀausa ǃharaxūsa.

¹³Tsî ti ǁgau-aon di domma ta ge ǁnâuǀnam tama isa, tsî ti ǂgaera ti ǁkhāǁkhā-aoga ǂōǀî tama hâsa.

¹⁴Tita ge ǁaupe ǂkhabab hoab ǃnâ ge hâ i, ǀhaohâb tsî ǀhûs tsîra ǁaegu.

¹⁵ǁGam-e ā tsaus âtsa xu, tsî dâu ra ǁgamga sa ǀaus ǁaegub ǃnâ.

¹⁶A di ǀaudi âtsa ǃaugabǀî dâu, tsî ǁgamǃāroga daogu ai:

¹⁷A di ǀguri sa ǀau, î di tā ǃhaokhoe-i on di.

¹⁸As ǀkhaehesa sa ǀausa, îts ǃgâiaǂgao ǂkhamsis âts di taras ǂama.

¹⁹ǁNā îsa ǁkhamas, ǁnā ǀnamǀnamsa ǃaris ǂama; ǁîs di samra a ra hugaǀgui ākhanu kai tsi, îts ǁîs di ǀnammi ǃnâ hugaǀgui ǃkhau.

²⁰Tsî tarexats kha ǁnâi, ti ôa, ǃhaokhoes xa nî ǃkhau, tsî ǀūts as di tîǂamsa nî ǁnam?

²¹Daogu mâb hoab digu ge ǃKhūb di mûra aiǃâ hâ xui-ao, tsî ǁîb ra ǃgûdaogu hoaga kōǃgâ.

²²Eloxoresab ge ǂhanuoǃnâsigu âb xa nîra ǃkhōhe; tsî tsurigu ǁoreb digu ǀkhab ge nîra ǃkhōǀgaiǀgaihe.

²³ǁÎb ge nîra ǁō, ǃkhâis oseb ge hâ i xui-ao, tsî kaisib gâresib âb dib ǃnâb ge nîra ǁhapu.