Read Khoekhoegowab ǂKhoamîdi 6 Bible Online

ǂKhoamîdi 6 - Khoekhoegowab bible

ǂKhoamîdi 6

¹Ti ôa, sa ǀgūkhoebats ga mâba-ao kaibao, ǃhaokhoebats ga mîmâibao,

²sa ams di mîdi ǀkhats ga ǃgaeseno, ǃkhōsents kao ams âts di mîdi ǀkha,

³ǁnâi nēti dī ti ôa, îts oresen sa ǀgūkhoeb ǃomǁaets go ǂgâ xuige ǃgû, îts ǃgamǃgamsenba bi, îts sa ǀgūkhoeba ǀgaisase ǀkhoma:

⁴Sa mûra tā ǁomsa mā-am, tsî mûǃgâkha âts ona ǂomhîsa!

⁵Oresen ǁgû-i khami ǃau-aob di ǃomǁaeba xu, ani-i khami aniǃkhō-aob di ǃomǁaeba xu.

⁶ ǂGoberub ǃoa ǃgû, sats ǀopesatsa; kō ǁîb di daoga îts gā-ai.

⁷ǁÎb hîa ǂamkhoeb, ǂhanuǂhanu-aob tsî gaosab tsînab ūhâ tama hâ,

⁸xawe ǂûna ǁkhunab ǃnâ ra ǁāǁāb, tsî ǂhâb âba ǃgaoǁaeb ǃnâ ra ǀhaoǀhaoba.

⁹Matikōsets kha ǁnâi, sats ǀopesatsa, nî ǁgoe? Mâ ǁaeb aits ǂoms âtsa xu nî khâi?

¹⁰Î ta ǂkharirose ǁom, î ta ǂkharirose ǂomhî, î ta ǂkharirose ǃomkha ǀhaoǀhao, î ta ǂkharirose ǁgoe, tits ga ǂâi o.

¹¹Ots ge ǀgâsib xa ǃgûkhoeb khami nîra hāǂamhe, tsî tôasib âts xa ǁâtanisen hâ aob khami.

¹²Beliali khoeb ge ǂkhaba khoeb ams di ǂkhabasiba ra sîsenūb,

¹³mûra âb ǀkha ra napeb, ǂaira âb ǀkha ra ǃhoab, ǀkhunugu âb ǀkha ra ǁgauba,

¹⁴ǂkhabasib ge ǂgaob âb ǃnâ hâ; mâ ǁaeb hoab aib ra ǂkhabaǃkhai-e kuru, ǂnoagu- aideb ra hā kai.

¹⁵ǁNā-amagab ge tsūǃōb âba ǃhaese nîra hā; ǃnubaib ge ǁîba nîra ǂkhūǂkhūhe, ǂuruǂuruǃkhai-i nî ǀkhais kōse.

¹⁶Nē ǃnani ǃkhaideb ra ǃKhūba ǁkhan, ā hûǁîs ge ǁîb di ǀomsa a uixaba:

¹⁷ǀGapi mûdi, ǂhumi nams tsî ǃomgu ǀhapioǀaoba ra ǂnâxū gu,

¹⁸ǂgaob ǂkhaba ǂâibasende ra kurub, ǂaidi ǀaoǂnâxūsa a ǃhaeba di,

¹⁹ǂkhaba ǀhûǀguitimî-ao-i hîa ǂhumiba ra ǃhoa-i tsî ǃgâsan ǁaegu ǂnoagu-aide ra tsoro-i tsîna.

²⁰ Ti ôa, sâu mîs saob disa, îts saos di ǂhanuba tā ǁnāxū!

²¹ǃGae ǁîra ǂgaob âts ai; îts ǁîra ǃaob âts ai ǂgāmâi.

²²O ra ge ǃgûts ka ǃnubai nîra ǁnū tsi, ǁgoets kao, o ra ge nî ǃûi tsi, ǃnoaǂkhaits kao, o ra ge nî ǃhoa-ū tsi.

²³Mîmās ge a ǃamamǀae, tsî ǂhanub ge a ǃnâ, tsî ǂgōǀaudi ge a ûib di dao xui-ao,

²⁴satsan nî ǂkhaba tarasa xu sâuga, ǃhao nams di ǂkhanu ǁgoasensa xu.

²⁵ǁÎs di îsasiba tā tura ǂgaob âts ǃnâ, îs ǁîs di mûǃgâkha ǀkha tā ǃkhō tsi,

²⁶ǀai-aos ǃaromats ra sats khoetsa pereǃâ-i kōse sī ǁgôa xuige, tsî nau khoeb di taras ra ǃgomǀgausa ǀomsa sauru.

²⁷Khoe-i ga ǀae-e ūo ǁkhaib â-i ǃnâ, ǁî-i di sarana kha ǂhubin tide

²⁸Khoe-i ga ǂnomdi ai ǃgûo, ǁî-i di ǂaira dâu ra tide?

²⁹ǁNātib ge ī, ǁnāb ǀgūkhoeb âb di taras tawa ra ǂgâba; ǁîsa ga tsâǀkhāb hoab ge ǀhapiose ūhâhe tide.

³⁰ǃNari-aoba kha sorahe tama hâ ǁîb ga ǃnario, ǁîb di ǀomsab nî ǁâǁâse, ǃâsab a hîa?

³¹Hōheb ra, ob ra hû ǃnādi kōse mādawa-am; oms âb di xūn hoanab ra mā.

³²Xawe tara-i ǀkha ga ǃgamekhôab: ǁÎsa ra dīb ge ǁîb di ǀoms ǂûsa ra hîkākā.

³³ǁÎb ge ǀhapiǀhapihes tsî taosib tsîkha nîra hō, tsî ǃharaxūb âb ge ǀari tide.

³⁴Tauxasib ge a aob di ǁai xui-ao; tsîb ge ǀkhaob di tsēs ai ǀûba si tide.

³⁵ǂKhîbagus xaresab ge ǃkhōǃoa tide; tsîb ra ǂkhā, matikōsets ga ǀkhaexūba kaikai xawe.