Read Khoekhoegowab ǂKhoamîdi 7 Bible Online

ǂKhoamîdi 7 - Khoekhoegowab bible

ǂKhoamîdi 7

¹Ti ôa, sâu ti mîde, îts ti mîmāde sa tawa sâubasen.

²Sâu ti mîmāde ots ge nîra ûi; îts ti ǂhanuba sa mûsats ra ǁkhaeba khami ǁkhae.

³ǃGae ǁîba sa ǀkhunugu tawa, ǁîba sa ǂgaob di ǀhanni ai xoa.

⁴Mî gā-aisib ǃoa: Sats ge a ti ǃgâ, îts ǁnâuǃāba ti ǀaokhoe ti ǂgai,

⁵în sâu tsi ǃhao tarasa xu, ǀū-aisas, mîdi âs ǀkha ra ǁgoasensa xu.

⁶Mûǂuidaos ti oms disa xu, tralisa xu ta ge ǂuio,

⁷o ta ge gâren ǃnâ kō tsî ǀgôagu ǃnâ ǁnâuǃāoǃnâ ǂkhamkhoeba ge mû.

⁸ǃGanna-ū ra ǃgû-īǀkhāba ǁîs di ǁhôas xōǀkhā, tsîb ge ǁîs di omsǀî garu daob ai ge dā,

⁹ǀhopob ǃnâ tsēs ra toa ǁaeb ai, durutsuxub tsî ǃkhaenab tsîra ǃnâ.

¹⁰Tsî mû, taras ge ǁîba ǀai-aos di anixūn ǃnâ ge ǃoa, ǂanǃgâsenxa ǂgaob ǀkha.

¹¹ǁÎs ge ǂkhupixa tsî mâǃoaxa ge i, ǁîs di ǂaira ge ǁîs di oms ǃnâ hâ ǁoa ge i;

¹²nēsis ge ǃauga hâ, ǁnās khaoǃgâ daogu ai, mâ ǁhôas hoas tawa ra ǂuise.

¹³Tsîs ge ǁîba ǃkhō tsî ge ǁoa, ǃnubais ge ais âsa ǀgaiǀgai tsî ǁîb ǃoa ge mî:

¹⁴Ganganǁguibadi ge ti tawa hâ; nētsē ta ge ti mîmâide go matare;

¹⁵ǁnā-amaga ta ge satsa ta nî ǃoase go ǂoa; ǂōrisase ta nî sa aisa ôase, tsî ta ge go hō tsi.

¹⁶Ti kharoba ta ge anxa anixūn ǀkha go ǀgâi-ai, anxa ǃgū-ain tsî ǀuilineǃkhaib Egipteb dib ǀkha.

¹⁷Ti kharoba ta ge miren tsî aukore-i tsî kanel-i tsîn ǀkha go tsoro-ai.

¹⁸Hā îm ǁâ, ǁâb xa ǁgoas kōse, îm dâ kai ǁâgudi ǃnâ!

¹⁹Aob ge oms ǃnâ a ǀkhai xuige, ǃnūseb ge daob ai go bē.

²⁰Mariǁhōs onab ge ǃomǁae go ū, mîmâisa ǁaeb aib ge ǁkhawa nî ǁaruhā.

²¹Nētis ge ǁgaus âs di ǂguisib ǀkha ge ǂgaeǂhapu bi; ǁgoasens amǁgaukha âs dis ǀkhas ge ǁîba ge doeǁga.

²²Ob ge ǀgui ǃnās ai ǁîba ge sao, gomab ra ǂā-aiǃkhais ǃoa ǃgû khami tsî gâreb ra ǃgae-ūdan ǁkharab din ǃoa ǃgû khami,

²³ǂāb ge âib âba ǂaraǃās kōse, anis ra ǁnoab ǃoa ǃhaeǃhaesen khami, ǁîs di ûib ǃaromas a ǁkhōǁkhōsa ǃkhaisa ǀū tsî.

²⁴Tsî nēsi, ti ôado, ǁnâu î du ǃgâ ti ams di mîde!

²⁵Ab sa ǂgaoba ǁîs di daoguǀî tā ǂgō, îts ǁîs di ǃgangu ai tā ǁhapu!

²⁶ǂGui ǀhapiǂnûihe hânas ge ge ǂnauǁgui xui-ao; tsî ǁîs xa ge ǃgamhen hoan ge kaise a ǂgui.

²⁷ǁÎs di oms ge a ǀhobas di dao, ǁōb di ǃnā-omdi ǃoa garuba.