Read Khoekhoegowab ǂKhoamîdi 8 Bible Online

ǂKhoamîdi 8 - Khoekhoegowab bible

ǂKhoamîdi 8

¹Gā-aisiba ǂgai tamab hâ? Tsî ǁnâuǃāxasiba dommi âba ūkhâi tamab hâ?

²ǀGapi ǃkhaidi di ǂaob ai, daob amǃgâ, daogu ǁîsa-ū garu ǃkhais tawas ra sī mâ.

³ǁĀgu xōǀkhā ǃās aiǃâ, dao-ams ǃnâts ra ǂgâ ǃkhais tawab ra ǃgarise ǂgai:

⁴Sa aogo ǃoa ta ge tita ra ǂgai, tsî khoenôan ǃoab ra ti domma ǂoa.

⁵Sa ǁauxūdo, ǁnâuǃāxasiba ǁkhāǁkhāsen; tsî gâredo ǂâisa ǂnûi.

⁶ǁNâu gao-aosi xūna ta nî ǃhoa xuige; tsî ti amǁgaukha xub ge anusib ǀguiba nî hā.

⁷Ti ams ge amaba ǂâixase nî ǃhoaǂui, tsî eloxoresasib ge ti amǁgaukha a uixasaba.

⁸Ti ams di mîdi hoadi ge a ǂhanu-ai; gamaǃgâ tsî ǂkhaba xū-i xare-i ge ǁîdi ǃnâ hâ tama hâ.

⁹ǁÎdi hoadi ge ǁnâuǃāxa-e ǂhanuse ība; tsî di ge ǂhause ība ǁnān, ǂansa ra hōna.

¹⁰Ti ǂgōǀausa ǃkhōǃoa ǀhaiǀurib ǃgâ-ai, tsî ǂansa ǀui ǁhûiǂuihesa ǃhuniǀurib xa!

¹¹Gā-aisib ge robainǀuidi xa a ǃgâi xuige, tsî sats khoets ga ǂgaon hoan ge ǁîba ǀguiro-ūhe ǁoa.

¹²Tita gā-aita ge ǂâixasib tawa ǁan hâ; tsî ta ge ǂans ǂanǃgâsenxasib hoab disa ra hō.

¹³ǃAoǃgâb ǃKhūb dib ge ǂkhabab tsî ǃguriǂgaoxasib tsî ǃgurib tsî ǂkhaba daob tsîga ǁkhansa, tita ge ǁkhāti ams ǂkhabasigu disa ra ǁkhan.

¹⁴ǀApes tsî dīs tsîra ge a ti; tita ge ǁnâuǃā ta, ǀgaib ge a ti.

¹⁵Tita xus ge gao-aogu ra gaosîsensa, gaosagu ǂhanu-aisiba ra ǂnûisa.

¹⁶Tita xus ge, ǃkhūǁîgu ra gaosa, tsî gaosagu tsî ǃhūbaib di ǂhanuǂhanu-aogu hoaga.

¹⁷Tita ge ǁnān, tita ǀnam hâna ra ǀnam; tsî ǁnān, tita ga ôan ge tita nîra hō.

¹⁸ǃKhūsib tsî ǃgôasib tsîkha ge ti tawa hâ, hâhâ ra ǁuib tsî ǂhanu-aisib tsîga.

¹⁹Ti ǂûb ge ǃanu ǃhuniǀurib xa a ǃgâi, ǀui ǃhuniǀurib xa, tsî ti hōǂgābasens ge ǁhûiǂuihesa ǀhaiǀurib xa a ǃgâi.

²⁰Tita ge ǁnāta, ǂhanu-aisib di daob ai ra ǃgû kai ta, ǂhanub di daogu ǁaegu,

²¹ti ǀnamsabena ta hâhâ ra xū-e nî ǀumi kaiga, tsî tita ge ǁîn di ǁui-omga nî ǀoaǀoa.

²²ǃKhūb ge tita daob âb di tsoatsoas ǃnâ ge ūhâ i, ǁîb di sîsengu aiǃâ, ǁnā ǃnūba xu.

²³Tita ge ǀamosiba xu ǂkhauhe hâ ta, tsoatsoasa xu, hugakam ǁaegu ǃhūbaib diga xu,

²⁴tita ge ǁgamgu ganupe hâ tama hâ hîa ge ǃnae ta, ǀaudi ǁgamxadi ganupe a ǀkhai hîa;

²⁵ǃhomgu nî mâiǁapoǁapohes aiǃâ, ǃnomgu aiǃâ ta ge tita ge ǃnae.

²⁶ǃHūbaibab ǁîba ganupe dī tama hâ, tsî ǃaugu tsî ǃhūbaib di ǂguro tsararogu ganupe a ǀkhai hîa;

²⁷ǀhomgab ge ǁîba hâna a ǁāǁā ǃnubai ta ge tita ge hâ i, sirkeli ǀkhab ǁgammi di ǂgāsa gere ǃkhōǂgā ǃnubai.

²⁸ǃÂudeb ge ǁîba ǀgapise hâna ǁapoǁapo-o, ǀaudi ǃgammi dideb ge dīǁapoǁapo-o,

²⁹huribab ge ǁîba ǀkharib âba mâiba o, ǁgamgu mîmās âba ǃûǂam tidega, ǃgaoǃgaodi ǃhūbaib dideb ge ǁîba ǁgui o:

³⁰ǁNāǃnubai ta ge tita ǁîb tawa kaikaiǀgôase ge hâ i. Tita ge tsēkorobe ǁîb di ǃgâiǃgâisenxū ge i, hugaǀgui ais âb aiǃâ ra ǀhuruse;

³¹ǃhūbaib âb ai ra ǀhuruse, tsî khoen ôan ge ti ǃgâiǃgâisenxū ge i.

³²Tsî nēsi ǁnâi ti ôado, ǃgâ te re: ǃGâiǃōn ge ǁnān, ti daoga ra ǃkhōǀgaipena xuige!

³³ǂGōǀausa ǁnâu, î du gā-ai; î du ǁîsa tā ǁnāxū!

³⁴ǃGâiǃōb ge ǁnā khoeb, tita ra ǁnâuǀnamma, tsēkorobe ti ǁāgu tawa ra ǃûiǃâ, ti dao-amdi di haiga ra ǂanǃâ.

³⁵Tita ga hō-i ge ûiba ra hō, tsî ǀkhomma ǃKhūb tawa ra ǃkhōǃoa xui-ao.

³⁶Xawe tita ǃoagu ga ǁore-i, ǁnā-i ge ǀoms â-e ra ǂkhôa; tita ǁkhan hân hoan ge ǁōba a ǀnam.