Read Khoekhoegowab Aoǁnâ-aob 1 Bible Online

Aoǁnâ-aob 1 - Khoekhoegowab bible

Aoǁnâ-aob 1

¹Mîdi aoǁnâ-aob, Davib ôab, Jerusalems gao-aob didi ge nēde.

²ǁAusits ǁausigu ditse, tib ra aoǁnâ-aoba mî; ǁausits ǁausigu ditse, xūn hoan ge a ǁau.

³Mâ harebesats kha sats khoetsa ūhâ sa sîsenni, sores ǃnagats ra dīb hoab xa?

⁴Nē ǃhaos ra ǃgû, nau ǃhaos ra hā, xawe ǃhūbaib ge ǀamose ra mâhâhâ.

⁵Tsî sores ra ǁhai tsî sores ra ǂgâ, tsîs ra ǃhae ǁnā ǃkhais, ǁîs tawas ge ǁhaisǀî.

⁶ǁÎs ra ǃgû ǃkhawagasǀî, tsîs ra ūnu ǀapasǀî, ǂoab ge hugaǀgui ra ǃgûǂnamipese ra ī, tsî ǃgûmadi âb ǃoab ra ǂoaba oa.

⁷ǃĀgu hoagu ge hurib ǃnâ ra dâuǂgâ, xawe hurib ge ǀoa tama hâ; ǁnā ǃkhais ǁîsa xu gu ra ǃāga ǀkhīs, ǁnāǀî gu ge ǁkhawa ra dâu-oa.

⁸Nē xūn hoan ra ǀhupu; khoe-i ǁîsa a ǃhoaǂui ǁoas kōse; mûs ge tātsē mûǂâu tama, tsî ǂgaes ge tātsē ǁnâuǂâu tama.

⁹Hâ ge i xū-i, ǁî-i ge hâ nî-e, tsî dīhe ge xū-i, ǁnā-i ge dīhe nî-e; ǀasa xū-i sores ǃnaga a ǀkhais kōse.

¹⁰Xū-i ǁî-i xa: Mû, ǁî-i ge a ǀasa, ti mîhe ǁkhā-e hâ i a? ǀNai i kom hâ ge io, hugakam ǁaegu sada aiǃâ ge hâ igu ǃnâ.

¹¹ǂÂiǂâisen-i xare-i ge a ǀkhai, aibekam xūn xa, tsî ǃgoaxa xūn hîa nî īn on xa i ǂâiǂâisen-i xare-e hâ tide ǁnān, ega nî hân tawa.

¹²Tita aoǁnâ-aota ge Israeli ǂama gao-ao ge i Jerusalems tawa.

¹³Tsî ta ge ti ǂgaoba nēs ai ge ǂnûi, gā-aisib ǀkha ta nî ôaǃnâ tsî hōǂuise ǀhommi ǃnaga ra īn hoana. Nē sîsenai-eb ge Eloba khoen ôana ge mā, ǁî-i ǀkhan nî ǂhansense.

¹⁴Tita ge ǁnā sîsengu sores ǃnaga ra īgu hoaga ge kōǀî, tsî mû, hoan ge ǁau tsî ǂoaba ǃkhoeǃgons axase ge ī i.

¹⁵ǃHoa-i ge a ǂhanuǂhanuhe ǁoa, tsî ǀkhai a xū-i ge a ǃgôahe ǁoa.

¹⁶Tita ge ǃhoa-ūsen tsî ge mî: Tita ge gā-aisiba ǁnāgu, Jerusalems ǃnâ ge hâ igu hoaga ǃnā hâse tsî ǀoasase ge hō, tsî ti ǂgaob ge kai gā-aisib tsî ǂans tsîra ge mû.

¹⁷Tsî tita ge ti ǂâisa nēs ai ge ǂnûi, gā-aisib tsî ǂans, ǃkhausasigu tsî gâresib tsîna mûǂansa, ǃnubai ta ge ge hōǃâ, nēs on ǂoaba ǃaus ase ī ǃkhaisa.

¹⁸Gā-aisib di ǂguib ǃnâ ra tsûaǂgaob ona ǀoasa; tsî ǂansa ga ǂguiǂguib, ǁîb ra tsûba ǂguiǂgui.