Read Khoekhoegowab Aoǁnâ-aob 10 Bible Online

Aoǁnâ-aob 10 - Khoekhoegowab bible

Aoǁnâ-aob 10

¹ǁŌ hâ ǀgîna-i ra ǁnuikuru-aob di ǁnui-i ǀō tsî ham kais ǁkhās xase i ge ǂkhari gâsiro-e, gā-ai tsî ǃgôahesa khoeba ība.

²ǂGaob gā-aib dib ge amǀkhāb ǁôab âbǀî hâ, xawe gâreb di ǂgaob ge ǁareǀkhāb ǁôabǀî hâ.

³Daob tsîn ai, tsî ǁîb ǃgûǀgaus hoasab ge gâreba ǁnâuǃāba ra tôasi, tsîb ge mâ-i hoa-e gâreb a ǃkhaisa mîbas ǀguisa ra hî.

⁴Gagas gaosab dis ga sa ǃoagu khâio, tā ǁnāxū sa ǃkhaisa; ǃnōs tsîn a sōǀôa, tsîs kai tsūǃōba ra aihāba xuige.

⁵Tsî ǀnî tsū-ai-i ge hâ, sores ǃnaga ta ge ǁhapu-i ase mû-e, ǂamsaba xu ra ǀkhī-e:

⁶Gâreb ǀgapi ǃkhain ai ra ǂnûihe, xawe ǃkhū hân ǃgammi ǃnâ ra ǂnû ǃkhaisa.

⁷Tita ge ǃgāga ge mû, hān ai ra ǃgapise, tsî gaosaga, ǃgāgu khami ǃhūb ai ra ǃgûse.

⁸Tsau-e ga khao-i, ǁî-i ǃnâ nîra ǁnā, tsî ǂnubiǂgoaba ga ǃkhopa-i, ǁî-i ge ǀao-i xa nîra nâhe.

⁹ǀUide ga garibē-i, ǁnā-i ge ǁîdi xa nîra tsû; ǀaena ga ǁhā-i, ǁî-i ge ǁîn tawa nî ǀhapiǂnûisen.

¹⁰ǃŌs ga ǂubuo, tsîs ga amsa ǀāǀāhe tama io, ob ge ǁnās ǃgâ-ai nî ǀgaib ǀkha sîsenhe; xawe gā-aisib ge ǃnāsa harebesa ūhâ dī-aidi âts tawa.

¹¹Nūbas ī tama hâ hîab ga ǀaoba nâo, os ge nūbas hoasa nūba-aoba hui tama.

¹²Mîdi gā-ai ams didi ge ǀnamǀnamsa, xawe amǁgaukha gâreb dikha ge ǁîb ǂûba ra hapu.

¹³Tsoatsoas ǁîb ams mîdi dis ge a gâresi, tsî ǀams ǁîb ams dis ge a ǁgaora ǃkhausasi.

¹⁴Gâreb ra ǀoasa mîde ǃhoa, xawe tare-i nî ī ǃkhai-ets khoetsa a ǀū; tsî ǁîb khaoǃgâ nî hā-e tari-e nî ǂanǂan bi?

¹⁵Sîsenni gâren dib ra mâ-i hoa-i âna ǀhupuǀhupu, matin nî ǃās ǃoa ǃgûsan a ǀū xui-ao.

¹⁶Tsūba tsi, ǃhūts, gao-aob âts a ǀgôa, gaosagu âts ra ǃnauǁgoaga ǁgoa-amtsa!

¹⁷ǃGâiba tsi, ǃhūts, gao-aob âts a ǀgapiǃgôasagu di ôa, tsî gaosagu âts ǁaeb ai ra ǂûtsa, ǀgaiǀgaisens ǃoa tsî āǁōs ǃoa tama!

¹⁸Kai ǀopesasiba xu gu ge oms ǃnaoga ra ǂkhabu, tsî ǃoposib ǃomgu diba xus omsa ra ǂnâ.

¹⁹Ā nîsen khoena ǂûǁaega ra dī, tsî ǂauxûib ûitsamana ra ǃgâiaǂgao kai, tsî marib ra nēn hoana ǁîna ǃoaba.

²⁰Tā gao-aoba ǀâxare sa ǂâidi ǃnâ, îts ǃkhū hâba sa ǃnā-oms ǃnâ tā ǀâxare; anin ǀhommi din ge ǀōba nîra tanibē, tsî ǁgaboxan ge mîsa nîra ǂanǂan xuige.