Read Khoekhoegowab Aoǁnâ-aob 11 Bible Online

Aoǁnâ-aob 11 - Khoekhoegowab bible

Aoǁnâ-aob 11

¹Sa pereba aoǂui ǁgammi ai, ots ge ǀoasa tsēdi khaoǃgâ ǁîba nîra hō.

²Amǃnâ-e mā hûna, ā ǁkhaisan kōse, mâ ǂkhaba-i ǃhūbaib ai nîra hā ǃkhai-ets a ǀū xuige.

³ǃÂudi ga ǀapib xa ǀoao, o di ge ǁîba ǃhūbaib ai ra ǁhōǂui; tsî haib ga ǁnāo, ǃkhawagasǀîs kas, ǀapasǀîs kas hoasa: Hais ra ǁnā ǃkhais ai, ǁnāpas ge ra ǁgoehâhâ.

⁴ǂOab ai ga ǃgaoǃgâb, ǁnāb ge tsoro tide; tsî ǃâude ga kōb, ǁnāb ge ǃgao tide.

⁵Mâb a ǂoab di dao, tsî mati gu ǂkhōga ǀgamǀkhā hâs di ǃnāb ǃnâ ra ǀkhīsats a ǀūs ǁkhās khamits ge satsa Elob nēn hoana ra dīb di sîsenga a ǀū.

⁶ǁGoas ai tsoro sa ǃkhomma, îts ǃuia ǃommi âtsa tā ǂgaedawa, sats a ǀū xuige, mâ xū-i nî ǃgâiǃgâ ǃkhaisa; nēs kas, naus kas hoas, ǁî ǀgamra hoara īse nî ǃgâi ǃkhaisa.

⁷ǃAruǀî: ǃNâb ge a ǂkhon, tsî soresa kōǀîs ge mûde a ǃgâiba;

⁸tsî khoe-i ga ǀoasa kuriga ûio, a-i ǁnâi ǁîgu hoagu ǃnâ ǃgâiaǂgao, î-i ǃkhaenab di tsēdi xa ǂâi, ǁîdi nî ǂgui ǃkhaisa; hā nîran hoan a ǁau xuige.

⁹ǃGâiaǂgao re, ǂkhamkhoetse, ǂkhamsis âts ǃnâ, îts ǃgû sa ǂgaob ra ǂnanǀî daoga ǃoa, tsî kōǀîs sa mûdi dis ǃnâ; xawe ǂan Elob nî nē xūn hoan ǃaroma ǀgoraǃgâ tsi ǃkhaisa.

¹⁰Îts ǁnâi ǁaixasiba bē kai ǂgaob âtsa xu, îts ǂkhababa dībē sa ǁgansa xu, ǂkhamsis tsî ǂkhamkhoesis tsîra a ǁau xuige.