Read Khoekhoegowab Aoǁnâ-aob 12 Bible Online

Aoǁnâ-aob 12 - Khoekhoegowab bible

Aoǁnâ-aob 12

¹Îts sa Kuru-aob xa ǂâi ǂkhamkhoesis âts di tsēdi ǃnâ, ǂkhaba tsēdi nî hās aiǃâ, tsî ǁnā kurigu ǁîgu xats nî: ǁÎgu xa ta ǃgâibahe tama, ti mîga;

²sores tsî ǃnâb tsî ǁkhâb tsî ǀgamirodi tsîn nîra ǃkhaes aiǃâ, tsî ǃâudi ǀapib khaoǃgâ ǁkhawa nîra oahās aiǃâ;

³ǁnātsē, ǃûi-aogu oms digu ga ǀkhū, ǀgaisa aogu ga ǃgamǃgâ, tsî ǁkhami-aodi ga ǃnōmâ ǃnubai, ǀorodi a amaga, tsî mûǂuidaode-ū ra ǂuin nîra ǃkhaeǃkhaehe ǃnubai.

⁴Tsî ǀgam ǁākha, daobǀî garukha ga ǂganamhe ǃnubai, ǁkhamis di ǀōb ra ǂkhari amaga, tsî anib ās aits ga khâi, tsî ǁnae-aodi hoadi ga ǃgamse hâ ǃnubai.

⁵Tsî ǀgapib aiǃân ga ǃao-o, tsî ǃhuriǃhuridi ge daob ai hâo, tsî amandelhais ga ǃkhāo, tsî ǂhoms ga ǃkhanaxao tsî turab ga kāo: Khoeb ra ǀamo ommi âb ǃoa ǃgû tsî ǃgae-aon ra daob ai ǃgûma xui-ao.

⁶ǀHaiǀuritsurib nî xorehes aiǃâ tsî ǃhuniǀuriǃores nî khôaǂkhūǂkhūhe tsî xapasa ǀaus tawa khôaǂkhūǂkhūhe tsî ǀnūsa tsaus tawa ǂkhūs aiǃâ;

⁷tsî tsarab ra ǁkhawa ǃhūb ǃoa oas aiǃâ, īb ge i khami, tsî gagas ra Elob ǁîsa ge māb ǃoa oas aiǃâ.

⁸ǁAusits, ǁausigu ditse, tib ra Aoǁnâ-aoba mî, hoan ge a ǁau!

⁹Tsî ǃaruǀîb ge aoǁnâ-aoba gā-ais ǀguisa hî tama i, tsîb ge ǁaesa ǁkhāti ǂansa ge ǁkhāǁkhā, tsîb ge ge ǃgaoǃgâ, tsîb ge xūna ôaǃnâ tsî ǀoasa ǂkhoamîde domse ge mâiǀhao.

¹⁰Aoǁnâ-aob ge ǀnamǀnamsa mîde hōǂuisa ge ôa-am, tsî xoahe hâdi ge a ǂhanu, tsî di ge a amab di mî.

¹¹Mîdi gā-aigu didi ge ǃkhari-ūdan axase ī, tsî ǀuridan, ǃgamse ǃgâuǂgāhe hân axase di ge ǀhûǀhûhe hâ ǂkhoamîde hâ, tsî di ge hoatsama a ǀgui ǃÛi-aob di.

¹²Nēsi, ti ôa, ǁnamakaisen re; ǂkhanide dīs ge ǀam-e mā tama, tsî ǁîde ǁkhāǁkhāsens ge sorosa ra ǀhupuǀhupu.

¹³ǁNān, hîa da go ǁnâun di danaǃkhais ge nēsa: Eloba ǃao îts ǁîb di mîmāde ǃkhōǀgaipe; nēs ge khoen hoana anu hâsa.

¹⁴Elob mâ dīs hoasa ǀgoraǃgâs ǃnâ nîra ūsī xui-ao, ǂganǃgâsan hoan ǀkha, ǃgâin kas, ǂkhaban kas hoasa.