Read Khoekhoegowab Aoǁnâ-aob 2 Bible Online

Aoǁnâ-aob 2 - Khoekhoegowab bible

Aoǁnâ-aob 2

¹Tita ge ti ǂgaob ǃnâ: Î ta ǁnâi ǃgâiaǂgaob ǀkha ǃâitsâ tsi, îts ǃgâiba kōǀî, ti ge mî, xawe kō, ǁîs on ge ǁau ge i.

²Âib ǃoa ta ge: Sats ge a ǃkhausa, ti ge mî, tsî ǃgâiaǂgaob ǃoa: Tare-eb ra nēba dī?

³Tita ge ti ǂgaob ǃnâ ge ôa-am ti ǁgansa ta nî ǂauxûib ǀkha khoakhoasa, ti ǂgaob ra gā-aisib ǀkha ǂgaeǂgui te hîa, tsî gâresiba ta nî ǃkhōǀgaipesa, mû ta nîs kōse, mâ xū-i khoen ôana a ǃgâiba ǃkhaisa, ǀhommi ǃnagan nî dī-e ǁîn di ûitsēdi hoadi kōse.

⁴Tita ge kai xūna gere dībasen, tita ge omde gere kurubasen, tita ge ǂauxûiǂûǃhanaga gere ǂgābasen.

⁵Tita ge ǂûǃhanagu tsî îǃhanagu tsîga gere dībasen, tsî ta ge ǁîgu ǃnâ ǂûhain hoana gere ǂgābasen.

⁶Tita ge ǁgamǁkhaede gere dībasen, ǁîde xu ta nî ǁoes ǃam haidi disa dâudâuǂamse.

⁷Tita ge ǃgāgu tsî ǃgādi tsîna gere hōbasen, tsî ta ge oms di ǃnaesabena ge ūhâ i, tsî ta ge ǁkhāti kaise gomaxa tsî gūxa ge i, ǁnān ti aiǃâ Jerusalems tawa ge hâ in hoan ǃgâ-ai.

⁸Tita ge ǁkhāti ǀhaiǀurib tsî ǃhuniǀurib tsîkha gere ǀhaoǀhaobasen, tsî ǃgomǀgausa xūna ǃhūǃâdi di gao-aoga xu; tita ge ǁnae-aogu tsî ǁnae-aodi tsîna ge mâibasen, tsî ǃgâiǃgâisendi khoen ôan didi, ǀkhōxūn, ā, ǀkhōxūǃnôan hoana.

⁹Tsî tita ge kai tsî ǃaruǀîǀgui ge kai ǁnān, Jerusalems tawa ti aiǃâ ge hâ in hoan ǃgâ-ai; tsî gā-aisib âtab ge ti ǀkha ge hâ i.

¹⁰Tsî ti mûra ge ǂgaon hoan, ǁîna ta ge ǁîra ǂkhā tama ge i; tita ge ti ǂgaoba mâ ǃgâiaǂgao-i hoa-e xu ūdawa tama ge i, tsîb ge ti ǂgaoba ǃgâiaǂgaoxa ge i ti sîsenni hoab ǃaroma, tsî nēs ge ti amǃnâ ge i ti xūreb hoab xa.

¹¹ǃNubai ta ge ge kōǀî ti sîsengu, ti ǃomkha ge dīgu hoaga tsî ǁnā xūreb, sîsen rase ta ge dība, tsî mû ǁîn hoan ge ǁau tsî ǂoaba ǃkhoeǃgons ase ge ī, tsî ǁîn ǃnâ i ge harebe-i xare-e hâ tama ge hâ i sores ǃnaga.

¹²ǃNubai ta ge ge ūnusen, gā-aisib tsî ǃkhausasigu tsî gâresib tsîna ta nî mûse; matib ǁnâi ǁnā khoeb, gao-aob khaoǃgâ ra hāba nî dī? ǀNai ge dīhen, ǁkhā xūn ǀguin.

¹³ǁGoasi ta ge ge mû, gā-aisib gâresiba ǃnā hâ ǃkhaisa, ǃnâb ǃkhaenaba ǃnā hâs ǁkhās xase.

¹⁴Mûra gā-aisib dira ge danas âb ǃnâ hâ, xawe gâreb ra ǃkhaenab ǃnâ ǃgûǂgâ. ǃNubai ta ge ǁkhāti ge mûǂan ǀgui ǃkhai-i ǀgui-i xan ra hoatsama hāǂamhe ǃkhaisa.

¹⁵O ta ge ti ǂgaob ǃnâ ge mî: Gâreb ra hāǂamhes ǁkhās khami ta ge tita ona nîra hāǂamhe; tsî tare xū-i ǃaroma ta kha ǁnâi nētikōse gā-aisiba ge ǁgūba? O ta ge ti ǂgaob ǃnâ ge mî, ǁîs on a ǁau ǃkhaisa.

¹⁶Tātsēs kōseb ge gā-aiba gâreb ǃgâ-ai ǂâihe tide, nēsi hân ge ǃgoaxa tsēdi ǃnâ hoatsama nîra ǀuruhe xui-ao. Tsî amaseb kha gā-aiba gâreb khami ǁō tama hâ?

¹⁷ǁNā-amaga ta ge nē ûiba ge ǁkhan, nē sîsenni, sores ǃnaga ra īb ge tsūba te i xui-ao; ǁîn hoan a ǁau tsî ǂoaba ǃkhoeǃgons ase ī amaga.

¹⁸Tsî ta ge ǁkhāti ti sîsenni, sores ǃnaga ta ge sîsenni hoaba ge ǁkhan, ǁîba ta ǁnā khoeb, ti khaoǃgâ nî hāba nîra ǁnākhaoba amaga.

¹⁹Tari-e a ǂan, iseb nî gā-ais, iseb nî gâresa? Tsî ti i ī xaweb ge ti sîsenni hîa ta ge sîsenni tsî gā-aisib ǀkha ta ge sores ǃnaga ǃkhō-unuǃgâba nîra gaoǂam, ǁîs on ge a ǁau.

²⁰ǁNā-amaga ta ge ge ūnusen, ti ǂgaoba ta nî ǀûsense ǁnā sîsenni, sores ǃnaga ta gere sîsenni hoab ǃaroma.

²¹Khoeb hâ xui-ao, gā-aisib ǃnâ tsî ǂans ǃnâ tsî ǁkhāsib ǃnâ sîsenni âba gere dība, xaweb ge ǁnāba khoe-i, ǁîba sîsen tama-e ǁî-i di amǃnâse nîra mā. Nēs on ge a ǁau tsî kaise a tsū.

²²Tare xū-eb kha khoeba ǁîb di sîsenni hoab amǃnâs ai ūhâ, tsî ǂgaob âb di tsûgu, sores ǃnagab ra sîsengu di amǃnâs ai?

²³ǁÎb di tsēdi hoadi ge a tsû, tsî ǀhupub âb ge a ǃoa xui-ao; tsuxub ǂûb ǃnâb ge ǂgaob âba sâ tama hâ. Nēs on ge a ǁau.

²⁴Khoeba kha ǃgâiba bi tama i hâ, ǂû tsîb nî ā ǃkhaisa, tsî ǀoms âb nî ǃgâiba ǂû ǃkhaisa xūreb âb ǃnâ? Tita ge ǁkhāti ge mû, nēs on ra Elob di ǃomma xu hā ǃkhaisa.

²⁵ǁÎb ose ǁnâi tari-e ǂû ǁkhā, tsî tari-e ǃgâiǃgâisen ǁkhā?

²⁶ǁÎb ra ǁnā khoeb, ais âb aiǃâ a ǃgâiba gā-aisib tsî ǂans tsî ǃgâiaǂgaob tsîna mā xui-ao, xawe ǁore-aobab ra sîsenǀhupuba mā, ǀhaoǀhao tsîb nî ǂguiǂguise, ǁnāb, Elob di ais aiǃâ a ǃgâibab nî māga. Nēs on ge a ǁau tsî ǂoaba ǃkhoeǃgons ase ī.