Read Khoekhoegowab Aoǁnâ-aob 3 Bible Online

Aoǁnâ-aob 3 - Khoekhoegowab bible

Aoǁnâ-aob 3

¹Mâ xū-i hoa-i ge ǁî-i di ǁaeba ūhâ, tsî mâ ǂâibasens hoas ge ǁîs di ǁaeba ūhâ ǀhommi ǃnaga:

²ǁAeb ǃnaes dib ge hâ, ǁaeb ǁōs dib, ǁaeb ǂgās dib, tsî ǁaeb ǂgāhe hân ra ǃhomǂuihes dib,

³ǁaeb ǃgams dib, ǁaeb ǂuruǂurus dib, ǁaeb khôaǁnâs dib tsî ǁaeb ǂnubis dib,

⁴ǁaeb ās dib, tsî ǁaeb âis dib, ǁaeb ǃgaes dib tsî ǁaeb dâb xa urikhâis dib;

⁵ǁaeb ǀuide aoxūs dib, tsî ǁaeb ǀuide ǀhaoǀhaos dib, ǁaeb ǁnams dib tsî ǁaeb ǁnamsa xu ǃnūse hâs dib,

⁶ǁaeb ôas dib, tsî ǁaeb kā kais dib, ǁaeb sâus dib tsî ǁaeb aoxūs dib,

⁷ǁaeb ǀkhauǃās dib tsî ǁaeb ǂomǀhaos dib, ǁaeb ǃnōsase hâs dib, tsî ǁaeb ǃhoas dib,

⁸ǁaeb ǀnams dib tsî ǁaeb ǁkhans dib, ǁaeb torob dib, tsî ǁaeb ǂkhîb diba.

⁹Mâ harebe-eb kha ǁnâi ǁnāb hîa ra sîsenna ūhâ, ǁîb ra sîsen-i xa?

¹⁰Tita ge ge mû ǁnā sîsenxasib, Elob ge khoen ôana māba, ǁî-aitsaman nî ǁîb ǀkha ǀhupuǀhupusenga.

¹¹ǁÎb ge mâ xū-i hoa-e ǁaeb â-i ai îsase ge dī tsîb ge ǁkhāti ǀamosiba ǁîn di ǂgaob ǃnâ ge ǁguiǂgā; xaweb ge khoeba ǁnā dīs, Elob tsoatsoasa xu ǀams kōse gere dīsa a hōǂui ǁoa.

¹²Tita ge a ǂan ǀnî ǃgâi-i xare-i ǁîna hâba tama ǃkhaisa, ǃgâiaǂgaos tsî ûib ân ǃnâ ǃgâidīs ǀguis.

¹³Tsî nēs on, î-i mâ khoe-i hoa-e ǂû, î-i ā, î-i ǃgâib ǁîb di sîsenni hoab diba sîsenū. Nēs ge mās Elob disa.

¹⁴Tita ge a ǂan, Elob ra dī-i hoa-i ge ǀamosib kōse ra hâhâ-e, xū-i xare-ets ge dīǀaro ǁoa, tsî xū-i xare-ets ge ūbē ǁoa; tsî Elob ra ǁî-e dī sats khoets nî ais âb aiǃâ ǃaoga.

¹⁵Hâ ge i-i ge ǁkhāti nēsi hâ, tsî hâ nî-i ge ǀnai ge hâ i; tsî Elob ge ǃgôa-ī gena ǁkhawa ra ôa.

¹⁶ǃAruǀî ta ge ǁkhāti sores ǃnaga ge mû, ǃkhais ǂhanub dis tawa, ǁnāpab ǂhanuoǃnâsiba hâ ǃkhaisa; tsî ǃkhais ǂhanu-aisib dis tawa, ǁnāpab eloxoresasiba hâ ǃkhaisa.

¹⁷Tita ge ti ǂgaob ǃnâ ge mî: Elob ge ǂhanu-aib tsî eloxoresab tsîkha nîra ǀgoraǃgâ; ǁnāpas ge ǂâibasens hoasa ǁîs di ǁaeba ūhâ, tsî mâ sîsenni hoab ona.

¹⁸O ta ge ti ǂgaob ǃnâ ge mî: Khoen ǃaromas ge ǁnāsa, ǁînab nî Eloba ǃâitsâga, în mû, ǁîn ǃnammi ai ǀgoan khami īsa.

¹⁹ǁÎn xan khoen ôana ra hāǂamhen, ǁnān xan ra ǁkhāti ǀgoana hāǂamhe tsî ǀgui ǀgaus ain ra ǁîn hoana hāǂamhe xui-ao. Nē-i ra ǁō khami i ge ǁkhāti nau-e ra ǁō, tsîn ge ǁkhāti hoatsama ǀgui ǀoms ǀguisa ūhâ, tsî khoeb ge ǀgoana ǃnā tama hâ, hoatsaman a ǁau amaga.

²⁰Hoan ge ǀgui ǃkhais ǀguis ǃoa ra ǃgû, hoan ge tsaraba xu ge ǀkhī, tsî hoan ge tsarab ǃoa ǁkhawa ra oa.

²¹Tari-e a ǂan khoenôan di ǀommi ǀgapiseb ǃoa ra ǃapa tsî ǀgoan di ǀommi ǃhūb ǃnâ ra ǁgôa ǃkhaisa?

²²O ta ge ge mû, ǀnî ǃgâi-i xare-i hâ tama ǃkhaisa, nēs ǀguis; ab khoeba ǃgâiaǂgao sîsengu âb ǃnâ, ǁîs a ǁîb di amǃnâ xuige. Tari-e ǁîba ǁnāpa nî ūsī, ǁnān, ǁîb khaoǃgâ nî ǃnaenab nî mûse?