Read Khoekhoegowab Aoǁnâ-aob 4 Bible Online

Aoǁnâ-aob 4 - Khoekhoegowab bible

Aoǁnâ-aob 4

¹ǁNās khaoǃgâ ta ǁkhawa ǁnā ǁgâiǀāgu, sores ǃnaga ra īgu hoaga ge kōǀî, tsî mû, ǁnāpa gu ge hâ ǁgâiǀāhesan di ǁgamrogu tsî ǁnān, ǁkhaeǂgao-ao-i xare-e ūhâ tama hân diga; tsî ǁgâiǀā-aogu ǀkhāb aib ge ǀgaiba ge hâ i, xawe ǁîn ge ǁkhaeǂgao-ao-i xare-e ūhâ tama ge hâ i.

²O ta ge ǁō hâna ge ǃkhōǀkhā, ǀnai ge ǁō hâ ina, ûitsaman ganupe ûi hân ǃgâ-ai;

³tsî ǁîn hoan ǂamaib ge ǁnāba ǃgâiǃōse nî mîhe hîa ganupe hâ tamab, ǁnāb, tsū sîsenni sores ǃnaga ra ība mû tamaba.

⁴ǃAruǀî ta ge xūreb hoab tsî ǁkhāsib sîsenni dib hoaba kō tsî ge mû, ǁî xūn ǃaromab ra khoeba nau khoeb di surib xa hāǂamhe ǃkhaisa. Nēs on ge a ǁau tsî ǂoaba ǃkhoeǃgons ase ī.

⁵ǃKhausab ra ǁnamanǃom tsî ǁîb di ǁgans ǂûsa ra ǂû.

⁶ǃOmǃnāb ǀoarob hîats ra sâb ǀkha ǂûb ge ǃomǃnākha hoakha di ǀoab, ǀhupub tsî ǂoaba ǃkhoeǃgons ǀkhats ra ǂûb, ǃgâ-ai a ǃgâi.

⁷Tsî ta ge ǁkhawa ge ūnusen, tsî ta ǁausi-e ge mû sores ǃnaga:

⁸ǀGurib ge ǀnîba mâ, ǀgamse khoe-i ǀkha hâ tamase, ǁîb a ǀgôao, tsî ǃgâsao xui-ao. Xawe sîsenni âb ge ǀam tamaba, tsî mûs âb ge ǃkhūsib xa ǂâu tama hâ tsîb: Tari-e ta ra ǃoaba tsî ta ti ǀomsa ǃgâiba ra ǀgî? ti mî tama. Nēs on ge a ǁau tsî a ǂoaba ǃkhoeǃgons ase i.

⁹ǀGuri hâs xas ge ǀgamse hâsa a ǃgâi, ǃgâi amǃnâ-e kha ǀgamkha sîsenni âkha ǀkha ūhâ amaga.

¹⁰ǁÎkha ga ǁnā, xaweb ra ǀguiba horesab âba ūkhâi. Xawe tsūbaheb ge a ǁnā ǀguib hîa ga ǁnāba, ǀgamǁîb ǁîba nî ūkhâib a ǀkhai xui-ao.

¹¹Tsî ǀgamn ga ǀguipa ǁgoe, on ge ra ǃnae. Xawe mati i kha ǁnâi ǀgui-e ǀguri nî ǃnae?

¹²Tsî khoe-i ga ǀguiba ǀgaidāo, xawe kha ge ǀgamkha ǁîb ǃoagu nî mâhō; tsî ǃnonaǃnâgu tsurib, ǁîb ge ǃhaese ǃgâu tide.

¹³ǀGâsa tsî gā-ai ǂkhamkhoeb ge kaira tsî gâre gao-aob hîa aiǃâb ǃoa ǂgōǀaukaisen ǁoab ǃgâ-ai a ǃgâi.

¹⁴ǃKhō-omsa xub ǁnā ǀguiba ra ǀkhī xui-ao, gao-ao kaib nîga, ǁîb gaosib ǃnâ ge ǃnaeb a ǀgâsa hîa.

¹⁵Tita ge ûitsaman sores ǃnaga ra ǃgûman hoana ge mû, ǁnā ǂkhamkhoeb ǀkhan ra ǁaeǁaesensa, naub di ǃās ǃnâ nî mâb ǀkha.

¹⁶ǀAm-e ge mā tama is ge ǁaesa, ǁnān, aiǃâ ge hâ in hoan ǃgâ-ai; xawe hā nîn ge ǁîb on ǂama ǃgâiaǂgao tide. Amase, nēs on ge a ǁau tsî ǂoaba ǃkhoeǃgons ase ī.

¹⁷Sâu re sa ǂaisa, Elob ommi ǃnâts ga ǂgâ ǃnubai! ǁNâuts nîse ǀgūse hâs gâreb di ǂāǁguibade ǁguibas xa a ǃgâi; ǁîn ǂkhabasen ra dī ǃkhaisa a ǀū xuige.