Read Khoekhoegowab Aoǁnâ-aob 5 Bible Online

Aoǁnâ-aob 5 - Khoekhoegowab bible

Aoǁnâ-aob 5

¹Tā ǃhae ams âts ǀkha, îb sa ǂgaoba tā ǃnoe, Elob di ais aiǃâ mî-e ūǀkhīsa. Elob ge ǀhommi ǃnâ hâ, tsî sats ge ǃhūbaib ai hâ xuige; ǁnā-amaga a di mîdi âtsa ǀoro.

²ǁHapodi kai sîsenxasiba xu ra hās ǁkhās xaseb ge dommi gâreb diba ǀoasasib mîdi diba xu hâ.

³Mîmâi-ets ga Eloba mîmâibao, ǁnâi ǁî-ets nî matare ǃkhaisa tā mâiǂui. ǁÎb ge gâren xa ǃgâibahe tama hâ, xuige mîmâits ka xū-i, ǁî-e matare.

⁴Mîmâits tide ǃkhais ge mîmâi tsîts matare tama ǃkhais ǃgâ-ai a ǃgâi xuige.

⁵Sa amsa tā mā-am sa ǁgansas nî ǁore kai ǃkhaisa, îts tā ǀhomǃgāb aiǃâ: ǁHapuǃkhai-i ǀgui-i komo, ti mî! Tare xū-i ǃaromab Eloba ǁnâi kaise nî ǁaixa sa dommi ǂama, tsî sîsenni sa ǃomkha diba nî hîǀhuru?

⁶ǂGuisib ǁhapodi dib ǃnâ gu ǁausiga hâs ǁkhās xase ǂguisib mîdi dib ǃnâ, xawe satsa Eloba ǃao!

⁷ǃHūǃâ-i ǃnâts ga ǀgâsab di ǁgâiǀāb tsî ǂhanub tsî ǂhanu-aisib tsîkha di ǀâǀhanahesa mûo, ǁnâi nēti ī ǂâibasens xa tā buru, ǀgapib ǂamai a ǀgapib ra ǁî ǃkhaisa ǃgaoǃgâ tsî hoan xa ǀgapib ge ǁîna ǃnā hâ xuige.

⁸Nēn hoan tawa i ge ǃhūba harebeba hâ, gao-ao-i ga ǃhūba mâiǂamheo.

⁹Mariba ǀnam hâ-i ge marib xa ǂâu tama hâ; tsî ǃnāǂamsasiba ǀnam hâ-i ge hōbasens xa ǂâu tama hâ. Nēs on ge a ǁau.

¹⁰Xūn ra ǂguio, on ra ǁnān, ǁîna ra hapun tsîna ǂgui. Mâ harebe-en kha ǁnâi ǁnān, ǁîna ūhâna ǁîn tawa ūhâ? Kōǀîs mûdi dis ǀguis.

¹¹ǂOms sîsenaob dis ge a ǂkhon, ǀoroseb ga ǂûs kaiseb ga ǂûs hoasa; xawe ǁâ hâsib ǃkhū hâb dib ge ǁîba ǁom kai tama hâ.

¹²Ama tsū ǀaesenai-i ge hâ, sores ǃnaga ta ge mû-e: ǃKhūsiba ūhâ khoeb ga ǁîba sâuo, ǁîb ǂûb di tsūǃōse.

¹³Nēti ī ǃkhūsib ra kā tsū ǃnaeǃkhaide-ū; tsî ǀgôabab ga hō xawe xū-i xare-i ge ǁîb ǃomǁae a ǀkhai.

¹⁴ǁGûs di ǃnāba xub ge ǀkhīs ǁkhās khamib ge ǀōǀkhā hâse nîra oa, hāb ge khami ra bēǃâ; tsîb ge xūreb âb xa ǃomǁaeb âb ǃnâb tani ǁkhās kōse xawe ūbē tide.

¹⁵Tsî nēs on ge a tsū ǀaesenai: Hāb ges ǁkhās xaseb ra bē ǃkhaisa; tsî mâ xū-e harebeba bi hâ, ǂoabab ge sîsenba ǃkhais xa?

¹⁶ǁKhātib ge ǁîb di tsēdi hoade ǃkhaenab ǃnâ ǂûsa, tsî kaiseb ge ǃoa ge hâ i tsî ǁîb di ǀaesenni tsî kai ǁaibab ge ūhâ isa.

¹⁷Mû, ǃgâi ǃkhaise ta ge mûǂuis ge nēsa: ǂÛ, tsî i khoe-e ā tsî ǁnā ǃgâiba nî ǂûsa, sîsenni âb, sores ǃnagab ge sîsenǂuib hoaba, Elob xab ûib âb tsēdi di ǀgausa māhe hâs kōse. Nēs ge a ǁîb di amǃnâ.

¹⁸Tsî mâ khoeb hoab, ǃkhūsib tsî xūn tsîna Elob xa māhe hâb, tsî ǁîn xab nî ǂû tsî amǃnâs âba nî ūsa mā-amhe hâb, tsî sîsenni âb ǃnâb nî ǃgâiaǂgaosa: ǁNāti īb ǃaromas ge ǁnāsa a Elob di ǀkhommā.

¹⁹ǁÎb ge ûib âb di tsēdi xa kaise ǂhansen tide xui-ao, Elob ra ǁîba ǁnâu-am amaga, ǂgaob âb di ǃgâiaǂgaob ǃnâ ǁîba hâ kai tsî.