Read Khoekhoegowab Aoǁnâ-aob 7 Bible Online

Aoǁnâ-aob 7 - Khoekhoegowab bible

Aoǁnâ-aob 7

¹ǃGâi ǀons ge ǃgâi olib xa a ǃgâi, tsî tsēs ǁōb disa khoe-i ǃnaes di tsēs xa.

²ǃOab di ommi ǃnâ ǂgâs ge ǂûǁaes di ommi ǃnâ ǂgâs ǃgâ-ai a ǃgâi; naub ǃnâs ǀams khoen hoan disa hâ xui-ao, tsî ûitsamab ra ǁî ǃkhaisa ǂgaob ǃnâ-ū.

³ǃOas ge âis ǂamai a ǃgâi, ǃoas ais disa xub ra ǂgaoba ǃgâiǃgâihe xui-ao.

⁴Gā-aib di ǂgaob ge ǃoab di ommi ǃnâ hâ, xawe gâren di ǂgaob ge dâb di ommi ǃnâ hâ.

⁵Gā-ain di ǂgōǀausa ǁnâus ge gâren di ǁnaetsanasa ǃgâs ǂamai a ǃgâi.

⁶ǁKhūn ra sūs ǃnaga ǀōs ǁkhās xases ge âis gâreb disa ī. Nēs on ge a ǁau.

⁷Ā, ǁgâiǀāb ra gā-aiba ǃkhauǃkhau, tsî ǀkhaexūb ra ǂgaoba ǁgaoǁgao.

⁸ǀAms xū-i dis ge ǁî-i di tsoatsoas ǃgâ-ai a ǃgâi; ǃnūǃnâxab ge ǃguriǂgaoxab ǂamai a ǃgâi.

⁹Tā gagas âts ǃnâ ǃhaese ǁaixa; ǁaib gâreb di ǃâǃnâb ǃnâ ra sâ xuige.

¹⁰Tā mî: Tarexasa aibekam tsēdi ge nēdi xa ǃgâi isa? Gā-aisiba xu tamas ge nētits ra dîsa xuige.

¹¹Gā-aisib ge a ǃgâi ǀumi-amǃnâ, tsî ǁnān, soresa ra kōǀînab ge a harebeba.

¹²Gā-aisib ge sommi khami ī tsî marib sommi khami ī xui-ao; xawe ǃnāǂamsasib ǂans dib ge gā-aisib ra ǁîba ūhâna ûiba mā ǃkhais khami ī.

¹³ǃGaoǃgâ sîsenni Elob diba. Tari-e ǂhauǂhau ǁkhā ǁÎb ge ǃhoa kai xū-e?

¹⁴ǃGâiǃgâb di tsēs ai ǃgâib ǂama ǃgâiǃgâisen re, îts tsū tsēs ai ǂâiǂâisen ǁîs tsînab Eloba naus khami ge dīsa, ǁîb khaoǃgâ nî hā xū-eb khoeba ǃâu tidese.

¹⁵Nēn hoana ta ge ti ǁausib di tsēdi ǃnâ ge mû: ǂHanu-aib ge hâ, ǂhanu-aisib ǃnâ ra kāba; tsî eloxoresab ge hâ, ǂkhabasib âb ǃnâ tsēde ra ǃnūǃnūba.

¹⁶Tā ǃnāsase ǂhanu-ai, îts tā îbe gā-aise ūhâsen; tarexats kha ǁnâi ǁî-aitsama nî hîǀhurusen?

¹⁷Tā ǃnāsase eloxoresa, îts tā îbe gâre; tarexats kha ǁnâi ǁae tamab ai nî ǁō?

¹⁸ǃGâi i ge a, ǁî ǃkhaisats ga ǃkhōǀgaipeo, tsî ǃommi âtsats ga naus ona xu ǂgaeǁnâ tama io: Eloba ga ǃao-i, ǁî-i nēn hoana ra ûixū xui-ao.

¹⁹Gā-aisib ra gā-aiba disi gaosagu, ǃās ǃnâ hâgu ǃgâ-ai ǀgaiǀgai.

²⁰Amase, khoe-i xare-i ge ǃhūbaib ai a ǀkhai, ǃgâidīs ǀguisa hî tsî ǁore tama-e.

²¹Îts ǁkhāti mîdi hoadi hîa ra mîhedi ai sa ǂâisa tā mâi, ǀnîsits sa ǃgāb ra ǀâxare tsi ǃkhaisa nî ǁnâu xuige,

²²ǂgui ǃnādets ge sats ona ǂants a khami khoena ǀâxare xui-ao.

²³Nēn hoana ta ge gā-aisib ǀkha ge ǃâitsâ, o ta ge tita: Î ta ga gā-ai, ti ge mî, xaweb ge tita xu ǃnūse ge hâ.

²⁴ǃNūse tsî kaise ǃgamse hâ-e, tari-e ǁî-e nî hō?

²⁵Tsî ta ge ge ūnusen ǂgaob âtab ǀkha, gā-aisib tsî ǃereamǁkhāsib tsîkha ta nî mûǂan tsî ôaǃnâ tsî ôaǃgonse, tsî ǂan ta nîga gâresib di eloxoresasib tsî ǃkhausasigu di gâresiba.

²⁶O ta ge ǁōb xa a ǁau xū-e ge hō: Tara-i, ǂgaob âs ǁnoab ase tsî tsurib ase, tsî ǃomkha âs ǃgae-ūdan ase i-e; Eloba a ǃgâiba khoeb, ǁnāb ge ǁîsa xu nîra ûi, xawe ǁore-aob ge ǁîs xa nî ǃkhōhe.

²⁷Mû, nēn ge hō ta gena, tib ra aoǁnâ-aoba mî, ǀgui hōǂuisa xu naus tawa sī tsî, ǃereamǁkhāsiba ta nî ūhâga.

²⁸Ganupes ti ǀomsa ra ôa, xawes ǁî-e hō tama ǃkhai-i ge nē-e: ǀOadisigu ǃnâ ta ge ǀgui aoba ge hō, xawe ta ge ama-ai tara-e ǁîdi hoadi ǃnâ hō tama isa.

²⁹Kō re nēs ǀguisa ta ge ge hō: Elob ge khoeba ǂhanuse kuru ǃkhaisa, xawe ǁîn ge ǂgui ǀape-aina ge ôa.