Read Khoekhoegowab Aoǁnâ-aob 8 Bible Online

Aoǁnâ-aob 8 - Khoekhoegowab bible

Aoǁnâ-aob 8

¹Tari-e gā-aib khami ī-e? Tsî tari-e xūn di ǁguiǃāsa a ǂan-e? Gā-aisib khoeb dib ra ais âba ǃnâǃnâ, tsî karosasib ais âb dib ra ǀkhara.

²Tita ge: ǃGaoǃgâ ams gao-aob disa ti ra mî, xawe ǁnās ǃgâ-ai nūs Elob disa.

³Ais âba xu ǃgûbēsa tā ǃhaeba; tā ǂkhaba ǃkhai-i ǃnâ mâhâhâ, ǁîb ra ǂgao-i hoa-eb ra dī xuige.

⁴Gao-aob di mîs hâpa, ǁnāpas ge gaosa hâ xuige, tsî tari-e ǁîb ǃoa a mî ǁkhā: Tare-ets ra dī? ti.

⁵Mîmāsa ga ǃkhōǀgaipe-i, ǁnā-i ge tsū ǃkhai-i xare-e hōǃâ tide; tsî ǂgaob gā-aib dib ge ǁaeb tsî dommi tsîkha a ǂan.

⁶Mâ ǂâibasens hoas ge ǁaeb tsî dommi tsîkha ūhâ xui-ao, tsûb khoeb dib ǃgomse ǁîb ai ǁgoe amaga.

⁷ǁÎb tare xū-i nîra ī ǃkhaisa a ǀū xui-ao: Tari-e ǁîba nî ǂanǂan, mâ ǁae i xū-e nîra ī ǃkhaisa?

⁸Khoe-i xare-i ge a ǀkhai, gagasa a gaoǂam ǁkhā-e, gagasa i nî ǃkhōdawaga, tsî i ge tsēs ǁōb dis ǂama gao-e ūhâ tama hâ; tsî khoe-e ǁnāxūs ge ǁkhāti a ǀkhai, nē ǃkhammi ǃnâ; eloxoresasis on ge ǀhonkhoen âsa ore tide.

⁹Nēn hoana ta ge ge mû, ti ǂgaob ge ǁnā sîsenni sores ǃnaga ra īb hoaba ūnusenba ǃnubai: ǁAeb ge hâ, ǁîb ǃnâb ra nē khoeba nau khoeba gaoǂamma ǁîb di tsūǃgâse.

¹⁰ǁNās ǁkhās xase ta ge eloxoresan ra ǁkhōhe ǃkhaisa ge mû, ǁnān, ǂhanuse ge dīn ǃanu ǃāsa xu doebē kaihe tsî ǃās ǃnâ ra ǀuruhe hîa.

¹¹ǀGoraǃgâs ǃhaese ǂkhabadīs khaoǃgâ hā tama amagab ge ǂgaob khoenôan diba tsūdīs xa ǀoa hâ.

¹²ǁOre-aob ga kaidisi ǃnādi kōse tsūdī, tsîb ga ǂomxase dī, xawe ta ge a ǂan ǁnān, Eloba ga ǃaon nîra ǃgâibahe ǃkhaisa, ǁnān, ais âba ga ǃaona.

¹³Xawe eloxoresab ge ǃgâibahe tide, tsîb ge tsēde ǃnūǃnūbasen tide, ǁîb ge sommi khami nîra ī, Elob di aisab ǃao tama amaga.

¹⁴ǀNî ǁau xū-i ge hâ, ǃhūbaib ai ra ī-e: ǂHanu-ain hâ, eloxoresan sîsenni di ǃoaǂuis ī khami ra hāǂamhena; tsî eloxoresan hâ, ǂhanu-ain sîsenni di ǃoaǂuis ī khami ra hāǂamhena. O ta ge tita, ǁîn on a ǁau, ti ra mî.

¹⁵ǁNā-amaga ta ge ǃgâiaǂgaoba ge ǃkhōǀkhā, khoeb sores ǃnaga ǀnî xū-e ūhâ tama amaga, hîa ga ǃgâiba bi-e, ǂûs tsî ās, tsî ǃgâiaǂgaos tsîn ǀguin. ǁNāsa as ība bi xūreb âb amǃnâ, ǁîb di ûitsēdi, Elob nî ǁîba sores ǃnaga mādi kōse.

¹⁶Ti ǂgaoba ta ge ūnuo, gā-aisiba ta nî ǂanga, tsî sîsenǀhupub ǃhūbaib ai ra ība ta nî kōǀîga tsēa tsî tsuxubab khoeba mûra âb ǃnâ ǂom-i xare-e mû tama xui-ao;

¹⁷ǃnubai ta ge Elob di sîsenni hoab xa ge mû, sores ǃnaga ra ǃnae sîsenni Elob dibab khoeba a hōǂui ǁoa ǃkhaisa, matikōseb ga ǁîs ǂama ǀhupuǀhupusen xawe. Tsî gā-aib on, ǁîb nî ǂan ǃkhaisa ra ǂâi, xaweb ge nî hōǂui ǁoa.