Read Khoekhoegowab Aoǁnâ-aob 9 Bible Online

Aoǁnâ-aob 9 - Khoekhoegowab bible

Aoǁnâ-aob 9

¹Amase, nēn hoana ta ge ti ǂgaob ǃnâ ge ǁgui, nēn hoana ta ǃgāsase nî ǁnâuǃāsa, ǂhanu-ain tsî gā-ain tsî ǁîn di sîsengu tsîn Elob ǃomǁae hâ ǃkhaisa; ǀnammi kas, ǁkhanni kas hoasa i ge khoe-e a ǀū, ǁî-i di ais aiǃân ǁnān hoana hâ.

²Mâ xū-i hoa-i xan ra hāǂamhe naun hoan khami. ǀGui xū-i ǀgui-i xa gu ra hāǂamhe, ǂhanu-aib tsî eloxoresab, ǃgâib tsî ǃanub, tsî ǀurisab ona; ǁnāb hîa ra ǁguibaba, ǁnāb hîa ǁguiba tamab khami. ǃGâib ǁkhāb khami ǁore-aob ona; ǁnāb hîa ra nūba, ǁnāb, hîa nūsa ra ǃaob khami.

³Nēs ge ǁnān sores ǃnaga ra īn hoan ǃnâ a ǂkhaba: ǀGui xū-i ǀgui-i xan ra hoana hāǂamhe, tsî khoen ôan di ǂgaob ǂkhabab xa ǀoa hâ, tsî ǁîn di ûib ǃnâ gu ǃkhausasiga ǂgaob ân ǃnâ hâ ǃkhaisa, tsî ǁnās khaoǃgân ge ǁō hân tawa nî sī.

⁴ǁNāb, ûitsaman hoan ǀkha ǃgaeǁaesen hâba i ǂgomaiǂnûi-e hâba xui-ao, ûitsama arib ge ǁō hâ xammi ǃgâ-ai a ǃgâi amaga.

⁵Ûitsaman ge a ǂan xui-ao, ǁōn nî ǃkhaisa, xawe ǁō hân ge xū-i xare-e ǂan tama hâ; tsîn ge ǁkhāti ǃaruǀî amǃnâ-e ūhâ tama hâ, ǂâiǂâisens ân ǀuruhe hâ amaga.

⁶ǁKhātin ge ǀnai ǀnammi ân tsî ǁkhanni ân tsî surib ân tsîna ge kā, tsîn ge ǃaruǀî amǃnâ-e nē ǁaeb ǃnâ ūhâ tama hâ, ǁnān, sores ǃnaga ra īn hoan ǃnâ.

⁷ǃGû, îts ǁnâi pereb âtsa ǂû ǃgâiaǂgaob ǀkha, îts sa ǂauxûiba ā ǃgâiǂâis ǀkha, ǀnaib Eloba dīs âts xa a ǃgâibahe xuige.

⁸An sa sarana mâ ǁaeb hoab ai ǃurise i, îs danas âtsa tā olib xa tôasi.

⁹Ûiba ǁkhoaxa kai ǁnā taras, hîats a ǀnams ǀkha sa ǁau ûib di tsēdi, Elob xats ra sores ǃnaga māhedi hoadi ǃnâ, sa ǁau tsēdi hoadi kōse. Nēs a sa amǃnâ xuige nē ûib ǃnâ tsî ǁnā sîsenni âts hîats ra sores ǃnaga sîsenni ǃnâ.

¹⁰Sa ǃommi ga hō dīxū-i hoa-e ǀgaib ǀkha dī. Sîsenni xareb, tsî ǃereams xares, tsî ǂans xares, tsî gā-aisib xareb ge ǀhobas, ǁîs ǃoats garus ǃnâ hâ tama hâ xuige.

¹¹Tita ge dawasen tsî sores ǃnaga ge mû, ǃkhoes ǃnâ dans ǃhae khoeb di tama, tsî torob ǃnâ dans ǁē-aon di tama, tsî pereb gā-ain di tama, tsî ǃkhūsib ǁnâuǃāxan di tama, tsî ǀkhommi ǂansa ūhân di tama ǃkhaisa, xawen ge hoatsama ǁaeb tsî hâsib tsîkha ī khami ra hōhe.

¹²Khoeb ǁkhāti ǁîb ǁaeba a ǀū xui-ao, tsî ǁaun tsūǃōxa ǂhams ǀkha ra ǃkhōhe tsî anin ǁnoas ǀkha ra ǃkhōhes ǁkhās khamin ge khoen ôana tsūǀkhāb di ǁaeb ai ra gāhe, ǁîb xan ra ǃhaese hāǂamhe ǃnubai.

¹³Nēs ona ta ge sores ǃnaga gā-aisise ge mû, tsîs ge tita ge kaiba i.

¹⁴ǂKhari ǃās ge ge hâ i, ǀoro khoeron ge ǁîs ǃnâ hâ isa, tsî kai gao-aob ge ǁîs ǃoagu hā tsî ǁîsa ge xāǂgā tsî kai ǁapoǁapo-aiga ǁîs ǃoa-ai ge ǂnubi.

¹⁵Ob ge ǀgâsa gā-ai khoeba ǁîs ǃnâ ge hōhe, ǃāsa gā-aisib âb ǀkha ge oreba; xawe khoe-i xare-i ge ǁnā ǀgâsa aob xa ǂâi tama ge hâ i.

¹⁶ǃNubai ta ge tita ge mî: Gā-aisib ge ǀgaib xa a ǃgâi, ǀgâsab di gā-aisib ra ǃharaxūhe tsî mîdi âb ǁnâuhe tama ra i xawe.

¹⁷Mîdi gā-ain didi, ǃnōsasib ǃnâ ra ǁnâuhedi ge ǂgais ǁnāb, gârena ra gaoǂammi disa ǃnā hâ.

¹⁸Gā-aisib ge torob ǀāxūn ǃgâ-ai a ǃgâi, xawe ǀgui ǁore-aob ǀguib ra ǂgui ǃgâina ǁgaoǁgao.