Read Khoekhoegowab ǀGapiǁnaetsanas 1 Bible Online

ǀGapiǁnaetsanas 1 - Khoekhoegowab bible

ǀGapiǁnaetsanas 1

¹ǀGapiǁnaetsanas Salomob dis.

²Ab ǁîba ǁoa te ǁoadi ǁîb ams didi ǀkha! Sa ǃnâ hâ ǀnammi ge ǂauxûib xa a ǃgâi xuige.

³Sa olin ge ǃgâise ra ham, sa ǀons ge olis ǁhōǂuihe rasa: ǁNā-amaga di ge ǂkhamkhoede satsa ǁâ hâ!

⁴ǂGae te re, îm ǃhaese dī! Gao-aob ge tita ǃnā-omdi âb ǃnâ ge ūǂgâ, o se ge sise dâ tsî sa ǃnâ nî ǃgâiaǂgao, o se ge sa ǃnâ hâ ǁâb xa nî ǃhoa, ǂauxûib ǃgâ-ain ge ǂhauǃnâna satsa ǀnam hâ.

⁵ǂNū ta a xawe ta ge a ǀnamǀnamsa, Jerusalems ôaso, Kedari di tentomdi khami, Salomob di îǂgoan khami.

⁶Tā kōǀî te ǂnū ta asa ǃoa, sores ge ge khau te xuige: ǀGôan ti îs din ge tita ǁaixaǂam, tsî ǂauxûiǂûǃhanagu di ǃûi-aose ge mâi te. Ti ǂauxûiǂûǃhanab ǂûba ta ge ǃûi tama hâ.

⁷Mîba te re, sats ti ǀoms ǁâsatse, mapats ra ǃûi tsî gūna ǂnaumâi ǃkhaisa tsēǃgâǁaeb ai? Tarexa ta kha ǁnâi sa horesagu di gūdi tawa ra ǃkhoema-i ase nî ī?

⁸ǀŪs ka io, ae, sas taradi hoadi xa îsase, îs ǁnâi dāǃharodi gūn dide ǃgûsao, îs piriron âsa ǃûi-aogu di ǁanǃkhaidi tawa ǃûi.

⁹Ti ǀhōsase, tita ge sasa hāgu Faraob kunis digu ǀkha ra ǂkhō.

¹⁰Sa xōǃnâkha ge a ǀnamǀnamsa ǂgaeradi ǃnâ, sa ǃaob di ǃamtsurigu ǃnâ.

¹¹ǃHuniǀuriǂgaerade da ge sasa nî dība, ǀhaiǀuriǃamrodi ǀkha.

¹²Gao-aob tāb âb tawa hâ hîab ra ti ǃgâiham ǂkhauǁnuiba ham.

¹³Ti ǁâsab ge tita mireǃgamirose ība, ti samra ǁaegu ra sâba.

¹⁴Ti ǁâsab ge tita Siprus ǂauxûiǂûrose ība, Engedis di ǂauxûiǂûǃhanagu ǃnâ.

¹⁵Mû, sas ge a îsa, ti ǀhōsase, mû, sas ge a îsa, sa mûra ge ǂnabus dira khami ī.

¹⁶Mû, sats ge a îsa, ti ǁâsatse, ā, ǀnamǀnamsa; tsî kharob am on ra ǃam.

¹⁷ǃNaogu sam omra digu ge a sederhai, sam di ǂnubiǂgoaǃgū-aira ge a siprehai.