Read Khoekhoegowab ǀGapiǁnaetsanas 2 Bible Online

ǀGapiǁnaetsanas 2 - Khoekhoegowab bible

ǀGapiǁnaetsanas 2

¹Tita ge rosǃkhāta Sarons di ta, lelita, ǃgoaǃnāgu di ta.

²Lelis ǁkhūn ǁaegu ī khamis ge ti ǀhōsasa ǀgôadi ǁaegu ī.

³Apelhais ǃaub di haidi ǃnâ ī khamib ge ti ǁâsaba ǀgôagu ǃnâ ī; tita ge sommi âb ǃnâ ǂnûsa ǁkhore hâ, tsî ǂûb âb ge ti namǃhanaba a ǂkhonba.

⁴ǁÎb ra ǂauxûi-ommi ǃnâ ǂgaeǂguiǂgâ te, tsî ǀnammi ge ti ǂama mâ ǃkhaub âba.

⁵ǀGaiǀgai te re ǂauxûiǂûn ǀkha, î khoakhoa te re apeldi ǀkha, ǁâb xa ta ǀaesen hâ xuige.

⁶Îb ǁareǀkhāb ǁôab âba ti danas ǃnaga hâ, îb amǀkhāb ǁôab âba ǁnam te.

⁷Tita ge ra nūba so, saso Jerusalems ôaso, ǃaub di ǁgûn tawas kas, ǁkhaman tawas kas hoasa, î so ǁnā ǁâba tā ǂkhaiǂkhaikhâi, î so ǁîba tā ǃnoaǂkhai kai, ǁîb ra ǂgaos kōse.

⁸ǃGâ, ti ǁâsab ge a ǁnā! Kō, ǁnāb ge ǃgoaxa, ǃhomgu ai ra uri, tsî ǃnomdi ai ra ǂgamse.

⁹Ti ǁâsab ge ǁgû-i khami ī, ǁkhamadi di ǂkham-i khami: Kō, ǁnāb ge mâ, sida di ǂnubiǂgoab ǃgâb ai, mûǂuidaode-ū ra ǂuise, mûǂuidaos ǃgâba xu ra ǃgapase.

¹⁰Ti ǁâsab ǃeream tsî ra mîǀî te: Khâi, ti ǀhōsase, ti îsase, îs hā.

¹¹Mû, saob ge go ǃgôa-ī, ǀapib ge go toa, tsîb ge a ǀkhai.

¹²ǃKhādi ge ǃhūb ǃnâ ra mûhe, ǁaeb ǁnaes dib ra ǀgū, tsî dommi ǂnais dib ra ǁnâuhe sida di ǃhūb ǃnâ.

¹³ǀNomahais ra ǂkham ǂûn âsa ūǀkhī, tsî ǂauxûiǂûhaidi ge ǂkham ǂauxûiǂûron âdi ǃnâ a ǁamaxa: Khâi, ti ǀhōsase, ti îsase, îs hā.

¹⁴Ti ǂnabuse, ǃhaogu di ǁhāgu ǃnâ ǂganǃgâsis ǀgapiǃkhais dis ǃnâ hâse, sa ai-īsiba ǁgau te re, î ta sa domma ǁnâu re: Sa dommi ge a ǂkhon, tsî sa ai-īsib ge a ǀnamǀnamsa xuige.

¹⁵ǀGirina ǃkhōba da re, ǁnā ǂkham ǀgirin, ǂauxûiǂûǃhanaga ra hîǀhuruna; sida di ǂauxûiǂûǃhanagu ge ǂkham ǂauxûiǂûrona ūhâ xuige.

¹⁶Ti ǁâsab ge a ti, tsî tita ǁîb di, ǁnāb, lelidi ǃnâ ra ǃûba.

¹⁷Tsēs ra kara tsî somgu ra ǁhâis kōse oa, ti ǁâsatse, îts ǁgûse ī, îts ǁkhamadi di ǂkhamse ī, Beters di ǃhomgu ai.