Read Khoekhoegowab ǀGapiǁnaetsanas 4 Bible Online

ǀGapiǁnaetsanas 4 - Khoekhoegowab bible

ǀGapiǁnaetsanas 4

¹Mû, sas ge a îsa, ti ǀhōsase; mû, sas ge a îsa: Sa mûra ge a ǂnabus di, ǂgapuhe hâ ǀûn âs ǁaegu, sa ǀûn ge pirin, Gileadi ǃhommi ai ǁgoen khami ī.

²Sa ǁgûdi ge gūdi hîa ǂkhomhe hâdi, ǁāǃkhaisa xu ra ǀkhīdi khami ī, hoatsama ǀgēna ra ūǀkhīdi tsî ǀguis xares âdi ge ǀgôao tama hâ.

³Sa amǁgaukha ge skarlakǀapa tsuri-i khami ī, tsî ǃhoas âs ge a ǀnamǀnamsa. Mûtsowokha danas âs dikha ge granatǂû-i di ǃâs khami ī, ǂgapuhe hâ ǀûn âs ǁaegu.

⁴Sa ǃaob ge Davib di ǂgō-ommi khami ī, ǁâtanin nî ǁîb ǃnâ ǂgāmâiheba, ǀoadisi ǃgupu khōsikhōgu ǁîb ǃnâ ǂgāmâihe hâba, hoatsama ǁē-aogu di khōsikhōga.

⁵Sa samra ge ǁgûron khami ī, ǁgûs di ǀgērora khami, lelin ǁaegu ra ǃûra.

⁶Tsēs ra kara, tsî somgu ra ǁhais kōse ta ge tita mireǃhommi ǁga nî ǃgû, tsî wirokǃnoms ǃoa.

⁷ǃGō-aises ge a îsa, ti ǀhōsase; tsî ū-i xare-i ge sa ǃnâ a ǀkhai.

⁸Tita tawa Libanonna xu hā, ti ǃgame-aose, ǁgôaxa tita ǃoa Libanonna xu; os ge nî ǂui, ǂaob Amanab diba xu, ǂaob Seniri tsî Hermonni tsîkha diba xu, xamgu di ǁanǃkhaisa xu, ǀgarugu di ǃhomga xu.

⁹Sas ge ǂgaoba go ǀâǀhana te, ti ǃgâse, ae! ti ǃgame-aose, sas ge ǂgaoba go ǀâǀhana te, sa mûra di ǀguis ǀkha, ǃaob âs di khedeb ǀkha.

¹⁰Matikōseb a îsa sa ǃnâ hâ ǁâba, ti ǃgâ, ae! ti ǃgame-aose! Matikōseb sa ǁâba ǂauxûib ǃgâ-ai a ǃgâi, tsî ǁamab sa oliǂkhauxūn diba ǃgâihamxūn hoan di ǁamab xa!

¹¹Sa amǁgaukha, ae! ti ǃgame-aose, ǁîkha xub ge ǀhûdaniba ra ǂnâ; danib tsî daib tsîkha ge nams âs ǃnaga hâ. Tsî ǁamab sa saran dib ge Libanonni di ǁamab khami ī.

¹²Ti ǃgâ, ae! ti ǃgame-aose, ǁgâuǂnamihe hâ ǃhanas ge sasa; ǂganamǁapoǁapohe hâ ǀaus ge sasa.

¹³Sa ǂgonagu ge granathaiǂûn di paradaisa, ǃgâi ǂûn ǀkha, Siprus ǃgâihamǂkhauǁnui-i ǀkha,

¹⁴ǃgâihamǂkhauǁnuib, tsî safrans tsî kalmus, tsî kanels tsîn, wiroki di haiǃnôan ǀkha, mireb tsî aukoreb tsîkha, hoan xa ǃgâi ǃgâihamxūn ǀkha.

¹⁵Ae! ǃHanagu di ǀause, ûitsama ǁgamgu Libanonna xu ra dâugu di ǂgâse.

¹⁶ǃNoaǂkhai ǀapas ǂoatse, îts hā ǃkhawagas ǂoatse, ǃgomǃnâǃganu re ti di ǃhanaba, îb ǃgâihamxūn hammi âba dâuǂoaxa. Ab ti ǁâsaba hā ǁîb di ǃhanab ǁga, îb ǂû ǁîb di ǃgâi ǂûn xa.