Read Khoekhoegowab ǀGapiǁnaetsanas 5 Bible Online

ǀGapiǁnaetsanas 5 - Khoekhoegowab bible

ǀGapiǁnaetsanas 5

¹Tita ge ti ǃhanab ǃnâ go hā, ti ǃgâ, ae! ti ǃgame-aose, tita ge ti mireba go ǃora ti ǃgâihamxūn ǀkha, tita ge ti daniǂgoaba anib âtab ǀkha go ǂû; tita ge ti ǂauxûiba ti daib ǀkha go ā. ǂÛ ti ǀhōsado, î du ā; î du ākhanu, ae! ti ǀnamsabedo.

²Tita ge ge ǁom, xawe ǂgaob âtab ge ge ǃnoaǂkhai; ob ge dommi ti ǁâsab ǃgubu-am rab diba nēti ge mî: ǁKhowa-amba te re, ti ǃgâ, ti ǀhōsase, ti ǂnabuse, ti ǂhauǃnâse. Ti danas ge ǀaub xa ǀoa hâ, ti ǂgomasenǀhaidi tsuxuǂaob ǀkha.

³Tita ge ti saraba go ǂgaeǂui, mati ta kha ǁnâi ǁîba ǁkhawa nî ǂgaeǂgā? Tita ge ti ǂaira go ǁā, mati ta kha ǁnâi ǁîra ǁkhawa nî ǀuriǀuri?

⁴ǃNubaib ge ti ǁâsaba ǃommi âba dao-ams di ǁhūsa-ū ge ǀhōǂgā; on ge ti ǃnākhoesiba ge gon ǁîb ǃaroma.

⁵O ta ge ge khâi, ti ǁâsaba ta nî ǁkhowa-ambaga, tsî ti ǃomkha ge miren xa gere ǂnâ, tsî ti ǀkhunuga dâu ra miren xa, ǃkhōxūs dao-ams dis ai.

⁶ǁKhowa-amba bi ta ge ti ǁâsaba, xawe ti ǁâsab ge ǂnan tsî ge bē hâ i; os ge ti ǀomsa ge soe tita ǀkhab goro ǃhoan xa; o ta ge ge ôa bi, xawe hō bi tama ge i; o ta ge ge ǂgai bi, xaweb ge ǃeream te tama ge i.

⁷ǃNubai gu ge ǃûi-aogu, ǃāsa ra ǃgûmaǃnâga ge hō te, tsî gu ge tita ǂnau tsî ge tsui te; ǃûi-aogu ǂnubiǂgoagu digu ge ti anaǂamsaraba ge ūxu te.

⁸Tita ge ra nūba so, Jerusalems ôaso, ti ǁâsaba so ga hō-o, tare xū-e so ǁîba nî mîba? ǁÂb xa ta ǀaesen hâsa.

⁹Tareba sa ǁâsaba nau ǁâsagu xa. Ae! Taradi ǃgâ-ai îsa tarase? Tareba sa ǁâsaba nau ǁâsagu xa, os sise ǁnāti go nūba?

¹⁰Ti ǁâsab ge a ǃuri tsî a ǀapa, disiǀoadisigu ǃnâb ge a ǃkhōǂuihesa.

¹¹Danas âb ge a ǀui ǃhuniǀuri, ǃgomǀgausa ǃhuniǀuri, ǂgomasenǀhaidi âb ge ǂgomasen hâ, tsî di ge gorab khami a ǂnū.

¹²Mûra âb ge ǂnabudi, ǁgammi amǃgâ hâdi khami ī, dai-i ǃnâ khōsen hâdi, ǀoa hâse ra ǂoaxadi khami.

¹³Xōǃnâkha âb ge kharob ǃgâihamxūn xa ǀoa hâb khami ī, ǃgâise ra ham ǂgāxūn khami. Amǁgaukha âb ge lelin khami ī, dâu ra miren khami.

¹⁴ǃOmkha âb ge ǃhuniǀuriǀkhunuǂnûidara khami ī, tirkiǀuidi ǀkha ǃkhōǂgāhe hâra. ǃNāb âb ge ǂkhai ra ǂkhoaǁgûb khami ī, safirǀuidi ǀkha ǃkhûǀkhāhe hâba.

¹⁵Tîra âb ge marmerǂkhâǃnâse ī, ǀui ǃhuniǀuriǂnû-aidara ai ǃgaoǃgaohe hâra. Īsib âb ge Libanonni khami ī, ǃkhōǂuihesa sederhain khami.

¹⁶Namǃhanab âb ge a ǂkhonsi ǀgui, tsî īsib âb hoab ge a ǀnamǀnamsa. Nēti īb ge ti ǁâsaba, ā, nēti īb ge ti ǀhōsaba, saso Jerusalems ôaso.