Read Khoekhoegowab ǀGapiǁnaetsanas 6 Bible Online

ǀGapiǁnaetsanas 6 - Khoekhoegowab bible

ǀGapiǁnaetsanas 6

¹Mâǀîb kha go ǃgû ǁâsab âsa, ae! Taradi hoadi xa îsase? Mâǀîb kha ǁâsab âsa ǁîb di aisa ge ǂnan, o se sise sas ǀkha ǁîba nî ôa?

²Ti ǀnamsab ge ǃhanab âb ǃoa go ǁgôa ǃgâihamxūn di ǂgāǃkhaidi ǃoa, ǃhanagu ǃnâb nî ǃûse, tsî lelinab nî ǀhaoǀhaose.

³Tita ge ti ǁâsab di ta, tsî ti ǁâsab lelin ǃnâ ra ǃûb ge a ti.

⁴Sas ge a îsa, ti ǀhōsase, Tirsas xase, ǀnamǀnamsa Jerusalems xase, ǃhuriǃhurisa ǂnubidi khami ǃkhaugu âdi ǀkha.

⁵Sa mûra tita xu unu, ǁîra ǀgaidā te hâ xuige. Sa ǀûn ge ǂnubis pirin dis khami ī, Gileadǃhommi ai ǁgoesa.

⁶Sa ǁgûn ge gūdi khami ī, ǁāǃkhaisa xu ra ǀkhīdi, hoatsama ǀgēna ūhâde, tsî ǀguis âdi ge ǀgôao tama hâ.

⁷Sa xōǃnâkha ge granatǂû-i di ǃâs khami ī, ǂgapuhe hâ ǀûn âs ǁaegu.

⁸Gao-aodi ge ǃnanidiside, tsî ǀgamitaradi ge a ǁkhaisadisi, tsî ǀgôadi ge a ǀgauo.

⁹ǀGui khoes ǀguis ge a ti ǂnabu, ti ǂhauǃnâ, ǁgûs ǀguise ūhâ ǀgôas ge a ǁî, ǁîs ge ǃanus ǁîsa ge ǁoras disa: ǀGôadi ga ǁîsa mûo, o di ge ǃgâiǃōse ǁîsa nî ǃkhōǀkhā; gao-aodi tsî ǀgamitaradi tsîde; tsî di ge ǁîsa nîra kare.

¹⁰Tarisa ǁnās ǁgoaǂnobos khami ra ǂkhaisa, ǁkhâb khami a îsas, sores khami a ǃanus, ǂnubidi ǃkhaugu âdi ǀkha hâdi khami a ǃhuriǃhurisasa?

¹¹Tita ge ǂûǂaran di ǃhanab ǃoa ge ǁgôa, ǃamǂûn ǃgoaǃnāb dina ta nî kōse, iseb ra ǂauxûiǂûǃhanaba ǃkhā ǃkhaisa, ise di granathaide ra ǃumi ǃkhaisa.

¹²Tita a ǀū hîas ge ti ǀomsa îkunis ti ǁaes ǀgapiǃgôasas dis ase ge ǀgapiǀgapi te.

¹³Oa re, oa re Sulamǁîse; oa re, oa re, îse sise sasa kōǀî. Tarexa so kha ǁnâi Sulamǁîsa ra kōǀî? ǂNāb ǀgam ǂnubira Mahanaims dira dib khami.