Read Khoekhoegowab ǀGapiǁnaetsanas 8 Bible Online

ǀGapiǁnaetsanas 8 - Khoekhoegowab bible

ǀGapiǁnaetsanas 8

¹Ae! Îts satsa ti ǃgâ i, ti îs di samra ra daitsa; daob ai ta ga satsa hō o, o ta ge ga ǁoa tsi; tsî ti i ga ī, xawen ga ǃharaxū te tide.

²Tita ge satsa ga ǂgaeǂgui hâ, tita ge ga satsa ti îs di oms ǃnâ ūǂgâ hâ, os ge ǁîsa tita ga ǁgau hâ; tita ge satsa ǃgâihamxūn di ǂauxûib xa ga āsi hâ, tsî granatapeldi di ǁgam-i xa.

³ǁAreǀkhāb ǃommi âba ab ti danas ǃnaga hâ, îb amǀkhāb ǃommi âba tita ǁnam.

⁴Tita ge saso ra nūba, Jerusalems ôaso, î so tā ǁnā ǀnamma ǂkhaiǂkhaikhâi tsî ǃnoaǂkhai kai, ǁîb ra ǂgaos kōse.

⁵Tarisa ǁnās ǃgaroǃhūba xu ra ǂoaxa tsî ǀnamǀnamsase ǁâsab âs ai ǃgâsen hâsa? ǁNā apelhais ǃgao ta ge tita ge ǂkhaiǂkhaikhâi si; ǁnāpas ge sa îsa tsûb ǀkha sasa ge ūǀkhī, ǁnāpas ge tsûb ǀkha sasa ge hō, ǁîs sasa ge ǁorasa.

⁶ǀGaiǀgaixūse ǂnûi te re ǂgaob âs ai, ǀgaiǀgaixūse ǁôab âs ai; ǁâb ge ǁōb kōse a ǀgaisa, tsî tauxasib ge ǁōb kōse a karosa, ǀamoǀaeb kōse xuige. ǂNomdi âb ge a ǀaexa ǂnom, tsî a ǃKhūb di ǀaeǁhabu.

⁷ǀOasa ǁgamgu ge nē ǁâba ǀari ǁkhā tide; ā, ǃāgu a dâukākā ǁoa: Khoe-i ga ǁî-i di oms ǃnâ hâ xūn hoana mā nē ǁâb ama, xawen ge ga ǃharaxūǃariǃarihe.

⁸Sida ge ǂkham ǃgâsarosa ūhâ, ganupe samra ūhâ tamasa. Tare-e da kha ǁnâi sida di ǃgâsarosa nî dī-ū, ǁîs ga dî-amhe tsēs ai?

⁹ǂNubiǂgoas ka io, o da ge ǁîs ai î-omma ga om ǀhaiǀurib ǀkha. Tsî daos ka io, o da ge ǁîsa sederǃnaogu ǀkha ga hâǂnamipe hâ.

¹⁰Tita ge a ǂnubiǂgoa, tsî ti samra ge ǂgō-omra khami ī. ǁGoasi ta ge ǁîb mûǁae ǀguis hîa ǂkhîba ra hōs khami ge ī.

¹¹Salomob ge ǂauxûiǂûǃhanaba ge ūhâ i Baal-Hamans tawa. ǁÎb ge nē ǂauxûiǂûǃhanaba ǃûi-aoga ge mā, mâb hoab âgu ǂûtanib âb ǂama ǀoadisi ǀhaiǀurimarina nî ūhāga.

¹²Ti ǂauxûiǂûǃhanab tita ūhâb, ǁîb ge ti ais aiǃâ hâ. On ge ǁnā ǀoadisi ǀhaiǀurimarina a sa, Salomotse, xawe ǀgamkaidisin ge a ǃûi-aogu di, ǂûtanib âb xa.

¹³Sas ǃhanagu ǃnâ ǁan hâse, horesan ra sa domma ǃgâ, a ta tita ǁîba ǁnâu.

¹⁴ǃHū, ti ǁâsatse, îts ǁgûse ī, îts ǁkhamadi ôase ī, ǃgâihamxūn di ǃhomgu ai.