Read Khoekhoegowab Jesajab 1 Bible Online

Jesajab 1 - Khoekhoegowab bible

Jesajab 1

¹Nēs ge ais Jesajab, Amob ôab dis, hîab ge Judab tsî Jerusalems tsîra ǂama mûsa, Usiab, Jotammi, Axasi, tsî Hiskiab tsîgu, Judab gao-aogu di tsēdi ǃnâ.

²ǁNâu sago ǃhomgo, îts ǃgâ sats ǃhūbaitse, ǃKhūb ra ǃhoa xuige: Tita ge ǀgôana ge kaikai tsî ge ǀgapiǀgapi, xawe ǁîn ge tita ge mâǃoa.

³Gomab ge ǁîb di ǀhonkhoeba a ǂan, tsî eseli ge ǁgorob ǀhonkhoeb âb diba a ǂan, xawe Israeli ge ǂan-i xare-e ūhâ tama hâ, ti ǁaes ge ǁnâuǃā tama hâ.

⁴Tsūba ǁnā ǁorexa ǁaesa, ǃgomse dīsās ǀkha hōhe hâ ǁaesa, ǁnā surib ǂkhabadī-aon diba, ǁgaoǁgaosa ǀgôana. ǁÎn ge ǃKhūba ge ǁnāxū; ǁîn ge ǃAnub Israeli diba gere ǃkhāǃkhā, ǁîn ge ge ǀūǀūsen khaosǀî ra ǂgōse.

⁵Tarexa du kha ǁnâi ǃaruǀî gorose nî ǂnauhe, o du ǁnās ǂamai ǃaruǀîǀgui nî ǁnāǁgôa? Danas hoas ge ǀaesen hâ, ǂgaob hoab ge a ǀaekusa.

⁶ǂAiǃnāba xu danas kōse i ge ǂurusi-i xare-e ǁîs tawa a ǀkhai: ǀHapigu tsî ǃhonagu, ūǀhapigu ǀguigu, ǀāǂuihe tsî ǃgae-aihe tama tsî ǀguib âgu xareb ge olib ǀkha tsautsauhe tama hâ.

⁷Sadu di ǃhūb ge a ǃū-aisa, sadu di ǃādi ge ǀaes ǀkha khauǃkhūhe hâ; sadu di ǃhanagu sadu di ais aiǃâ ǃhao khoen xa ra hapuhe, tsî hîǀhurus ge ǃhao khoena xu ra hā hîǀhuruse ī.

⁸Tsî ǀgôas Sionni dis ge ǁhao-omrose ǃgau hâ ǂauxûiǂûǃhanab ǃnâ tsuxu-omrose tôaǃhanab ǃnâ, xāǂgāhe hâ ǃāse.

⁹ǃKhūb ǂnubidi dib ga ǃgaoro-e ǃgau kaiba da tama hâ io, o da ge ga Sodoms ǀkha ǀguiti-ī hâ, o da ge ga Gomoras khami ī hâ.

¹⁰ǁNâu ǃKhūb di mîsa, sago Sodoms di ǂamsago; ǁnâuǃā ǂhanub sada Elob diba, sas Gomoras di ǁaese!

¹¹Tare-e tita nî harebeba, ǂguisib sadu ǁguibadi diba? tib ra ǃKhūba mî. Tita ge ǁâ hâ ǁguibadi bairagu didi xa, tsî âun kausa gomagu din xa; tsî ta ge ǂgao tama hâ ǀaob ǁgōgu dib kas, ǁkhaogu dib kas, pirigu dib kas hoasa.

¹²Ti aiǃâ du ga hā ǂhaio, tari-e ǁî ǃkhaisa sadu di ǃomma xu nî ǂgao, ti ai-omga du nî dāǀhani ǃkhaisa?

¹³Tā ǃaruǀî ǁause ǁguibade ǁguiba; ǀanǀans ge tita ǁgaiǁgaisa xūse ība. ǂKham ǁkhâgu tsî sâtsēdi tsî ǀhaohâgu di ǂgaiǀhûs tsîna ta ge ǂgao tama hâ, ǁîn ge a ǂhanuoǃnâsi ǃkhâitsēdi ona.

¹⁴Sadu di ǂkham ǁkhâgu tsî sadu di kai ǁaegu tsîgas ra ti ǀomsa ǁkhan. ǁÎn ge tita ge ǃkhana kaiba; ǁîna ǃaruǀî tanisa ta ge ǀhupu hâ.

¹⁵Tsî sadu di ǃomga du ga khoraǂui xawe ta ge ti mûra sado xu nî gaugau; tsî ǀgoresa du ga ǂguiǂgui xawe ta ge ǁnâu tide, sadu di ǃomgu ǀaob xa ǀoa hâ xui-ao.

¹⁶ǁĀnai î du ǃanuǃanusen, î du ǂkhabasib sadu sîsengu diba ti mûra aiǃâba xu dībē, î du ǂkhabadīǀû,

¹⁷ǃgâidīsa ǁkhāǁkhāsen, î du ǂhanuba ôa, î du ǁgâiǀāhe rana hui, î du ǃoaǀgôana ǂhanuse dī-ū, î du ǂopagu ǃoataras diga dī-unu.

¹⁸Hā, î da ǁnâi ǂhanuse dī-ūgu, tib ra ǃKhūba mî: Sadu di ǁoren ga skarlakǃkhaib khami ǀapa xawen ge tsamaros khami nîra ǃuri; tsî karmosain-i khamin ga ǀapa xawen ge gūǀûn khami nîra ǃuri.

¹⁹Māsenxase ī tsî du ga ǁnâuo, o du ge ǃgâib nē ǃhūb diba nîra ǂû,

²⁰xawe ǂkhā tsî du ga mâǃoao, o du ge gôab xa nîra hapuhe; ǃKhūb di ams ǁî khaisa go ǃhoa xui-ao.

²¹Matis kha ge ǀai-ao kai ǁnā îǂhôa ǃāsa? ǁÎs ǂhanub xa ge ǀoa hâ isa; ǂhanu-aisib ge ǁîs ǃnâ ǁan hâ is xawe nēsi ǃgamaosa.

²²Sadu di ǀhaiǀurib ge ge goa kai, sadu di ǂauxûib ge ǁgamǂnâhe hâ.

²³Sadu di gaosagu ge a ǁnāǁgôasa tsî a ǃnari-aon di horesa, mâb hoab âgu ge ǀkhaexūna ǀnam hâ tsî gu ge mādawa-amde ra sauruǃgon. ǃOaǀgôana gu ge ǂhanudība tama hâ; tsî ǂnoaguǃkhais ǃoataras dis ge ǁîgu aiǃâ sī tama hâ.

²⁴ǁNā-amagab ra ǃKhūb ǂnubidi di ǃKhūb Israeli di ǀgaisaba mî: Ae, tita-e, tita ge nîra ǁkhaeǂgaosen ti mâǃoasaben tawa, tita ge nîra ǀkhaobasen ti khākhoen tawa.

²⁵Tsî tita ge ti ǃomma sadu ǃoagu nîra ǀhōǂui; tsî tita ge sadu di goaba nîra ǀkhaiǀkhaiǃari, tsî tita ge sadu di tinna nîra ūbē.

²⁶Tita ge sadu di ǂhanuǂhanu-aoga ǁkhawa nîra mā du, aibes khami, tsî sadu di ǀapemā-aoga tsoatsoas ǃnâs khami. ǁNās khaoǃgâs ge ǃāsa ǂhanu-ai tsî îǂhôa ǃāse nîra ǂgaihe.

²⁷Sions ge ǂhanub ǀkha nîra orehe, tsî ǁîs di oaǀkhī gena ǂhanu-aisib ǀkha.

²⁸Xawe ǂkhūǂkhūs ǃûǂam-aon tsî ǁore-aon tsîn dis ge nîra hâ, tsî ǃKhūba ge ǁnāxūn, ǁîn ge nîra kāǁō.

²⁹ǁÎn ge nîra taotaohe xui-ao, ǁnā aik-haidi sadu ge ǂgaodi ǃaroma; tsî sadu ge nîra taob xa ǀapa ǁnā haiǃhanagu sadu ge ǃkhōǂuibasengu ǃaroma.

³⁰Sadu ge ǁnā aik-hais ǂgaen âs ra ǁnās khami nîra ī xui-ao tsî ǁnā ǃhanab, hîa ǁgamob khami.

³¹Tsî ǀgaisab ge ǀkhora ǁapase nîra ī; tsî sîsenaob âb nanib ase, tsî kha ge ǀhûpe nîra khau, tsî ǀari-ao-i xare-i ge nîra ǀkhai.