Read Khoekhoegowab Jesajab 10 Bible Online

Jesajab 10 - Khoekhoegowab bible

Jesajab 10

¹Tsūba ǁnān, ǂkhaba ǂnûiǂgāde ra ǂnûiǂgāna, ǁnā xoa-aon, tsūǃōna ra xoabana,

²ǀgâsanan nî ǂhanuba xu ūdawase, tsî ǀkhomǀkhomsaben ti ǁaes din di ǂhanuban nî ǀâǀhanase, î di ǃoatarade ǁîn di ǁkhâuǁnâ kai, în ǃoaǀgôana ǂkhôa ǁkhā ti.

³Xawe tare-e du nî dī, ôaǃnâs tsî hîǀhurus ǃnūseba xu ra hās di tsēs ai? Tari-i ǃoa du nî ǁhâ huib ǃaroma? Tsî mapa du nî sadu di ǂkhaisiba ǁnāxū?

⁴Mâ-i hoa-i nîra ǃgamǃgâ ǃkhōsan ǃnâ tsî nîra ǁnā ǃgamhe ran ǃnâ. Nēn hoan tawab ge ǁaib âba ǁkhaedawasen tama hâ, tsî ǃommi âb ge gorose ǀhōǂuihe hâ.

⁵Tsūba, ǁnā Asiriaǁîb, ti ǁaib di ǂnauhaiba, tsî ti ǁgôasib ge ǁîb ǃomǁae a hai.

⁶Tita ge ǁîba nî sî ǁgauoǃnâ-i ǃoa, tsî tita ge ǁîba nî mîmā ti ǁgôasib di ǁaes ǃoagu, ǀâǀhana, îb ǁkhâuǁnâ, îb ǁîna dāǂkhūxūse ǂnûi daogu di ǂgoab khami.

⁷ǁNātib ǂâiǂâisen tama tsî ǂgaob âb ǁnāti ǂâi tama xawe; tsîb ge ǂgaob ǃnâ ǂâi ǀoro tama ǁaedeb nî hîkākā tsî hîǀhuru ti.

⁸Nētib ra mî xui-ao: Ti gaosabega hoatsama gao-ao tamaga?

⁹Kalnosa Karkemis khami ī tamas hâ? Hamatsa Arpads khami ī tamas hâ, tsî Samariasa Damaskus khami ī tamas hâ?

¹⁰Ti ǃommi ge gaosidi ǁgôa-elogu dide hō xase, ǁîn di ǃgaohesa īgu ge Jerusalems tsî Samarias digu ǃgâ-ai ǃgâi i xawe;

¹¹tita ge Samarias tsî ǁîs di ǁgôa-eloga dī-ū khami ta kha ǁnâi Jerusalems tsî ǁgôa-elogu âsa dī-ū tide?

¹²Tsî i ge nîra ī ǃKhūb sîsenni âb hoaba Sions ǃhommi ai tsî Jerusalems tawa dītoao, o ta ge tita nîra ôaǃnâ ǂûtanib Asiriab gao-aob ǂgaob di kaisib diba tsî ǂkhaisib ǁîb mûra di kaisib diba.

¹³Nētib ra mî xui-ao: ǀGaib ti ǃommi dib ǀkha ta ge ǁî ǃkhaisa ge dī, tsî ti gā-aisib ǀkha, ǁnâuǃāxa ta a xui-ao. Tsî tita ge ǀkharigu ǁaedi diga ge ūbē, tsî ūn hâ xūna ge ǃnari; tsî ǀgaisa khoese ǁansabena ge ǂhāǁnâ.

¹⁴Tsî ti ǃommi ge ǁaedi ūhâ ǃkhūsiga ani-oms khami ge hō, tsî ta ge ǃhūbaib hoab dina ge ǁkharoǀhaobasen; sats khoets ra ǃupun, hîa ǁnāxūhe hâna sāǀhaobasen khami, tsî khoe-i xare-i ǁgaboba gongon tsî amsa khowa tsî ra ā-i ge ǀkhai ge i.

¹⁵ǃŌsa xare koasens nî ǁîs ǀkha ra ǁhā-i ǃoagu? Saxaba xare kaikaisenni nî ǁîb ǀkha ra saxa-i ǃoagu? Hais ra ǁnān ǁîsa ra ūkhâina gongon xū-i khami; haisats ra ūkhâi, hai tamas a khami!

¹⁶ǁNā-amagab ge ǃKhūb ǂnubidi di ǃKhūba ǁîb di kausan ǃnâ ǂgabasa-e nîra sî, tsî ǁîb di ǂkhaisib ǃnâb ge ǀae-e nîra khau, ǀaes di khauǃkhūb khami.

¹⁷ǃNâb Israeli dib ge ǀaese nîra ī xui-ao, tsî ǁîb di ǃAnuba ǁhabuse; ǁîb di ǁkhūn tsî ǁîb di ǀgamin tsîna ǀgui tsēs ai ǂhubi tsî ra hapu ra.

¹⁸ǁKhātib ge ǁîba ǂkhaisib ǁîb di ǁoes tsî ǁîb di ǂûtanixa ǃaub diba nîra hapu, ǀomsa xu ǁgans kōse; ob ge ǁnāb ǃkhau rab ge tsanaǁkhui khami nîra ī.

¹⁹Os ge ǀgaus ǃgau ge hâ i haidi ǁoes disa nîra ǀoro, ā, ǀgôarob ge ǁîde nîra xoamâi ǁkhā.

²⁰Tsî i ge ǁnātsē nîra ī, ǃgau gen Israeli din tsî ûi gen Jakob ommi din, ǃaruǀî ǁnāb ǁîna ge ǂnaub ai ǂgomǃgâ tama i, tsî nî ǃKhūb Israeli di ǃAnub ai ǂhauǃnâse ǂgomǃgâ ǃkhaisa.

²¹ǃGau gen ge nîra ǃhoba, ǃgau gen Jakob dina, ǀgaisa Elob ǃoa.

²²Sa ǁaes ga, Israeli dido, ǀgopab hurib dib khami ī, xawen ge ǃgau kan âna nîra ǃhoba xui-ao; hîǀhurus ǁapoǁapohe hâ, ǂhanu-aisib xa ra dâuǂamhese.

²³Hîǀhurus hîa ǁapoǁapohe hâsab ge ǃKhūb ǂnubidi di ǃKhūba nîra dī nē ǃhūb hoaragab ǁaegu xui-ao.

²⁴ǁNā-amagab ra ǃKhūb ǂnubidi diba nēti mî: Tā ǃao ti ǁaese, sadu Sions tawa ǁan hâdo, Asiriaǁîn ga ǀhamhaib ǀkha sado ǂnauo, tsî ǀkharub âbab ga sadu ǂama ūkhâio, Egipteǁîn di dommi ai.

²⁵ǂKhari ǁaerob kōse ǀgui ob ge ǁgôasiba nîra ǀoa, ob ge ǁaib âtaba ǁîn di hîkākāsǀî nîra ī xui-ao.

²⁶ǃKhūb ǂnubidi dib ge ǀhamhai-e ǁîba nîra ǂkhaiǂkhaiba, Midianni di ǂāhes ge ī i khami Oreb di ǃhaob tawa; tsî ǀkharus âb ge hurib ǂamǃnâ ī xaseb ge ǁîsa nîra ūkhâiǂam bi Egipteǁîn di dommi ai.

²⁷Tsî i ge ǁnā tsēs ǁkhās ai nîra ī, ǃgommi âb nî sadu di ǃhōga xu ǁgôa ǃkhaisa, tsî ǃnaob âb sadu di ǃaoba xu; ob ge ǃnaoba nîra hîkākāhe ǂkhauǀkhāsabeb ǃaroma.

²⁸ǁÎb ra hā Ajas tawa; ǁîb ra ǃgûǃkharu Migrons ǁga; Mixmas tawab ra xūn âba ǁgui.

²⁹ǁÎn ra daosa ǃgûǃganu, Gebas tawan ra hâǁgoa, Ramas ra ǀkhū, Gibea-Sauls ra ǃhū.

³⁰ǃGarise ǃau dommi âs ǀkha, Galimmi ôase! An ǁîba ǁnâu Lais kōse, ǀkhomǀkhomsa Anatotse!

³¹Madmenas ra ǁhâ; Gebims di ǁansaben ra sâusenǃkhai-e ôa.

³²ǀGui tsēs ǀguisab ra hâ Nobs tawa; ǁîb ge ǃommi âba nîra gongon ǃhommi Sions ôas dibǀî, Jerusalems di ǃnomsǀî.

³³Xawe kō, ǃKhūb ǂnubidi di ǃKhūb ge ǀgaib ǀkha ǂgonaga nîra ǁhāǁnâ, ǁnā ǀgapi īsiga ūhâ gu, ǁîgu nîra ǁhāǁnâhe tsî ǃguriǂgaoxagu, ǁîgu nîra ǃgamǃgamhe.

³⁴Tsî ǁîb ge ǂgapuǃnâgu hâ haidi haiǀgoms dide nîra ǁhāǂui; tsî Libanonni ge nîra ǁnā ǂKhaisiba xu.