Read Khoekhoegowab Jesajab 13 Bible Online

Jesajab 13 - Khoekhoegowab bible

Jesajab 13

¹ǂHôas Babilons xa hâs, Jesajab, Amob ôab ge ǃkhōǃoas.

²ǃKhau-e ǃkhā ǀgapi ǃhommi ai, domma ǃhâkhâi ǁînǀî; ǃomma ǀhōǃapa, în hā ǂgâxa gaosabegu di dao-amde-ū!

³Tita ge ti khaihesana mîmāsa ge mā; tita ge ti ǁaib ona ge ǂgai, ti ǁē-aogu ti ǀgapisib ǃnâ ǃgâiaǂgao hâgu tawa.

⁴ǃGâ, ǂkhupixa dommi ge ǃhomgu ai hâ, kai ǁaes dib axase. ǃGâ, dommi gaosidi ǂkhupib ǀhû hâ ǁaedi dib axase. ǃKhūb ǂnubidi dib ra toroǂnubisa kōǃgâ.

⁵ǁÎn ra hā ǃnū ǃhūba xu, ǀhommi di ǀkhâuǀamsa xu: ǃKhūb tsî sîsenūdan ǁgôasib âb din tsîna ǁnā ǃhūb hoaragaban nî hîkākāse.

⁶Ā du re, ǃKhūb di tsēs a ǀgū; hîǀhuru nîseb ra hā Hoaǀgaixaba xu xuige!

⁷ǁÎ ǃkhais xa gu ge ǃomgu hoaga nîra ǃopo, tsî khoen hoan di ǂgaogu ge nîra tsuni;

⁸tsîn ge nîra ǃhuri; tsûgu tsî ǂōǂōsigu tsîgu xan ge nîra ǃkhōhe; tsîn ge ǁora ra tara-i khami nîra tsû. Mâ-i hoa-i ge ǀgūkhoeb â-i ǂama nîra burugâ, ǁîn di aidi ge ǁhapu ra ai-i xase nîra ī.

⁹Mû, tsēs ǃKhūb dis ge ǃgoaxa ǃaoroxase ǁgôasib tsî ǀaexa ǁaib tsîkha ǀkha, ǃhūbaibab nî ǃgaroǃhū kaise, tsî ǁore-aon âbab nî ǁîba xu hîkākāse.

¹⁰ǀGamirodi ǀhommi didi tsî ǁîb di ǀkhûsedi ǃnâb âdi ǃnâ kai tide xui-ao. Sores ge nîra ǃkhae, ǁhais kao, tsî ǁkhâb ǃnâb âba ǂkhai kai tide xui-ao.

¹¹Tita ge ǃhūbaiba ǂkhabasib âb ǃaroma nîra ôaǃnâ, tsî eloxoresana ǂhanuoǃnâsib ân ǃaroma. Tsî ta ge ǃgurib ǁgaoǂgaoxan diba nîra ǀû kai tsî ǃguriǂgaoxasib tirangu diba nîra ǃgamǃgam.

¹²Tita ge nîra dī, aob ǀui ǃhuniǀurib ǃgâ-ai nî ǃgâi ǃkhaisa, tsî khoe-e ǀui ǃhuniǀurib Ofiri dib ǃgâ-ai.

¹³ǁNā-amaga ta ge tita ǀhomma nîra gongon; ob ge ǃhūbaiba nîra gongonhe, ǃkhais âba xu, ǃKhūb ǂnubidi dib di ǁgôasib xa, tsî ǀaexa ǁaib âb di tsēs xa.

¹⁴Tsî mâ-i hoa-i ge ǃhaexūhe hâ ǁgû-i khami nîra ī, tsî gū-i khoe-i xare-i xa ǀhaoǀhaohe tama-i khami, mâ-i hoa-i ge ǁî-i di ǁaesǀî nîra kōnǃgâ, tsî mâ-i hoa-i ge ǁî-i di ǃhūb ǃoa nîra ǃhū.

¹⁵Hōhe ka-i hoa-i, ǁî-i ge nîra ǃkhāǃganuhe; tsî ǁîna ga ǁaeǁaesen-i hoa-i ge gôab xa nîra ǁnā.

¹⁶ǁKhātin ge ǁîn ôarona ǁîn mûdi aiǃâ nîra ǂkhūǂkhūhe; ǁîn omdi ge nîra khôaǂkhūǂkhūhe tsî ǁîn di taradi ge nîra ǀuriǀurihe.

¹⁷Mû, tita ge Medeǁîna ǁîn ǃoagu nîra ǂkhaiǂkhaikhâi, ǁîn hîa ǀhaiǀuriba ǃgôa tama hân tsî ǃhuniǀurib ǃnâ ǃgâiǃgâisen tamana.

¹⁸Tsî khādi ân ge ǂkham khoega nîra ǂkhūǂkhū, tsîn ge ǃnāb di ūǀkhība ǀkhom tide, ǁîn di mûs ge ǀgôana sâu tide.

¹⁹Nētis ge Babilons, gaosidi anixūsa, Xaldeaǁîn di ǂkhaisi tsî ǃguriǂgaoxasisa, Sodoms khami nîra ī, tsî Gomoras khami nîra dawaǃkhupuhe.

²⁰ǁNāpa i ge ǁanǃkhai-i xare-e hâ tide ǀamos kōse tsîs ge ǁanǃnâhe tide ǃhaosa xu ǃhaos kōse; tsî Arabiaǁîb ge ǁnāpa tentoms âba ǂnaumâi tide, tsî ǃûi-aogu ge ǁnāpa ǁgoe tide.

²¹Tsî ǀgurun ǃgaroǃhūb din ge ǁnāpa nîra ǁgoe, tsî omgu ân ge xoxon xa nîra ǀoa; tsî ǁnāpan ge ǀamina nîra ǁan, tsî ǁgâuagu ge ǁnāpa nîra ǂnāma.

²²Tsî ǀgurun ǃnāǃnuidi din ge ǁnāxūhe hâ ǃkhaidi ǃnâ nîra ǂgaiǀîgu, drakgu tsîn ǀkha, ǃgâiǃgâisens di î-omgu ǃnâ. ǁAeb âb a ǀgū, hāb nîse, tsî tsēdi âb ge ǀhape tide.