Read Khoekhoegowab Jesajab 14 Bible Online

Jesajab 14 - Khoekhoegowab bible

Jesajab 14

¹ǃKhūb ge Jakob ǂama nîra ǀkhom xui-ao; tsî ǁîb ge Israela ganupe nîra ǁhûiǂuibasen, tsî ǁîb ge ǁîna ǃhūb ân ǃnâ nîra ǂnûi. Tsî ǃhao khoeb ge ǁîna nîra ǁaeǁaesen, tsîn ge Jakob omma nîra ǂae-ai.

²Tsî ǁaedi ge ǁîna ū tsî nîra ūsī ǁîn di ǃkhais ai. Tsî Israeli ommi ge ǁîna ǃKhūb di ǃhūb ǃnâ ǀumise nîra ūhâ, ǃgāgu tsî ǃgādi ase, tsîn ge ǃkhōsase nîra ūhâ, ǁnān ǁîna ǃkhōsase ge ūhâ ina, tsîn ge doeǁga-aon âna nîra gaoǂam.

³Tsî i ge ǁnātsē nîra ī, ǃKhūb ga sa tsûba xu sâba mā tsi tsî sa gongonǃnâsa xu tsî ǁnā karosa ǃoabas, hîats ge ǃoaba kaihesa xuo,

⁴ǃnubaits ge nē ǂkhoamî-e nî tsoatsoa Babilons di gao-aob ǂama tsî nîra mî: Matisa doeǁga-aob go ǀûsa? Matisa ǃhuniǀuriǃās go ǀûsa?

⁵ǃKhūb ge haib eloxoresan diba go khôa, gaosabegu di gaohaisa,

⁶ǁnāb, ǁaede ǁgôasib ǃnâ ǀamo ǁnora-ai-i ǀkha ge ǁnorab, ǁaib ǃnâ ge ǀūbeǁaede gaoǂammi, ǁnāb ra ǃgôaǃgonhe, khoe-i xare-i ǁî ǃkhaisa a ǂkhā ǁoas kōse.

⁷ǃHūbaib hoab ra sâ tsî a ǃnōsa; xawe nēsin ra kaise dâxase ra ǁnaese ǀkhī.

⁸Denehaidi on ra dâǂam tsi tsî sederhaidi Libanonni dide, mî raǃâ: Sats ge ǁnāǁgoesa xu i khoe-i xare-e sise ǃoa hā tama, sise i nî ǁhāǁnâga.

⁹ǀAmo ǀaeb hîa ǃnaga hâb ge sats ǂama ge gongonǃnâhe; satsab nî ǃoase, hāts geo; ǁîb ra sats ǂama ǁō hâna ǂkhaiǂkhaikhâi, pirin ǃhūbaib din hoana, gao-aogu ǁaedi digu hoagab ra trondi âga xu khâi kai.

¹⁰ǁÎn hoan ge ǃeream tsî nîra mîǀî tsi: Sats on ge go ǀaesen sida khami, sats ge sida ǀkha go ǀguiti-ī.

¹¹Sa ǃguriǂgaoxasib ge ǀamoǀaeb ǃnâ go tsorosen, luitn âts di ǀōb ǀkha; ǀō ǂuniron ge sa ǃnaga nîra tsorohe, tsî ǂunin ge nîra ǃgū-ai tsi.

¹²Matits kha ǀhomma xu go ǁnā, ǁgoaǀgamirotse, ǁgoaǂnobos ôatse! Matits kha ǃhūb ai go ǁhāǁguihe sats ǁaedi di danaotse?

¹³Tsî ǂgaob âts ǃnâ ge mîtse: Tita ge ǀhommi ǃoa nî ǃapa; tita ge ti tronsa ǀgamirodi Elob dide nî ǀgapiǀgapiǃnâ, tsî tita ge nî ǂnû ǃhommi ǀhûs dib ai, ǀApas di ǀkhāgu ai.

¹⁴Tita ge ǀgapigu ǀnanudi diga nî ǃapaǃnâ; tita ge Hoan xa ǀGapib ǀkha nî ǀguiti-ī.

¹⁵Xawets ge satsa ǀamoǀaeb ǃnâ nîra ǂhāǁguihe, āb di ǀkhāga-ū.

¹⁶Satsa ga mûn ge nîra kōǀî tsi, ǁîna ǃgaoǃgâ tsîn nîra mî: ǁNā aoba kha nēb ǃhūbaiba ge gongonǃnâb, gaoside ge ǀkhū kaiba?

¹⁷ǃHūbaiba ge ǃgaroǃhū kaib tsî ǃādi âba ge hîkākāb, ǃkhōsan âba ǁaru kai tamaba?

¹⁸Gao-aogu ǁaedi digu hoagu ge ǃgôab ǀkha ǁgoe, mâb hoaba ǁîb di ommi ǃnâ,

¹⁹xawe sats ge ǀhobas âtsa xu ǃnūse aoxūhe hâ, ǁgaisi ǂgona-i khami, sara-i ǃgamhe hân gôab ǀkha ǃkhāǃganuhe hân di-i khami, ā-i ǃnâ ra ǁgôan khami, dāǂkhūǂkhūhe hâ ǁō hâ soro-i khami.

²⁰Sats ge ǁîna ǁaeǁaesen tide ǁkhōs ǃnâ, sa ǃhūbats ge ǁgaoǁgao tsî sa ǁaesa ǃgam xui-ao. Surib ǂkhabadī-aon dib ge ǀamosib kōse ǂgaihe tide.

²¹ǂĀ-ai-e ǂhomiba ǁîb di ôana, ǁîn îgu di ǂhanuoǃnâsib ǃaroma, în tā khâi, în ǃhūba tā ǀumi, în ǃhūbaiba tā ǃādi ǀkha ǀoaǀoa.

²²Tita ge ǁîn ǃoagu nîra khâi xuige tib ra ǃKhūb ǂnubidi diba mî, tsî tita ge Babilons di ǀons tsî ǃgau nî-i, tsî ǀgôab di ôab tsîna nîra ǃhūǃnoma tib ra ǃKhūba mî.

²³Tsî tita ge ǁîna ǀumis ǀhonedi dis ase nîra ǂnûi, ǁgomǁgams ase; tsî tita ge ǁîna ǀnapus ǁgaoǁgaos dis ǀkha nîra ǀnapubē, tib ra ǃKhūb ǂnubidi diba mî.

²⁴ǃKhūb ǂnubidi dib ge nū tsî ge mî: Amase tita ǂâi hâ khami i ge nîra ī, tsî tita ǂâibasen hâ khami i ge nîra mâhâhâ.

²⁵Tita ge Asiriaǁîna ti ǃhūb ǃnâ nîra khôaǂkhūǂkhū; tsî ti ǃhomgu ai ǁîba nîra dāǂkhūǂkhū, ǁîb di ǃnaob ǁîga xu nî ǁgôase, tsî ǁîb di ǃgommi ǃhōb âga xu nî ǁgôase.

²⁶Nēs ge ǂâibasens, ǃhūb hoaragab ǂama ǂâibasenhe hâsa, tsî nēb ge ǁnā ǃommi ǁaedi hoadi ǂama ǀhōǂuihe hâba.

²⁷ǃKhūb ǂnubidi dib ge ǁîsa ǀapes âb ǃnâ ge ǂâibasen xui-ao, tari-e ǁîsa nî khôa? Tsî ǁîb di ǃommi ge ǀhōǂuihe hâ, tari-e ǁîba nî ǁkhaedawa?

²⁸ǁNā kurib, gao-aob Axasi ge ǁîb ǃnâ ǁōb ǃnâs ge nē mîs ge īsa:

²⁹Tā dâ, sats Filisteǁîn ǃhūts hoatse, ǁnā ǂnauhaib, satsa ge ǂnaub khôahe hâ ǃkhais xa; ǃnomab ǀaob diba xub ge basiliska nîra ǀkhī xuige, tsî ǂûtanib âb ge ǀaexa ǁkhana ra drakse nîra ī.

³⁰Tsî ǂguroǃnaesaben ǀgâsan din ge nîra ǃû, tsî ǂhâ hân ge sâusase nîra ǁgoe. Xawe ǃnomab âtsa ta ge tita ǃâtsūǀkhāb ǀkha nîra ǃgam; tsî ǃgau ka-i, ǁnā-eb ge ǁîba nîra xandom.

³¹Ā, sats ǁātse! ǃAu sas ǃāse! Tsuni, sats Filisteǁîn ǃhūts hoatse, ǀapasa xub ra ǀanna hā xuige, tsî ǃū-aihâ-i xare-i ge ǀhûdi âb ǃnâ a ǀkhai.

³²Tare-e kha sîsabegu ǁaes diga nî ǃereamhe? ǃKhūb ge Sionna ǃgaoǃgaosa, ǁgâiǀāhesan ǁaes âb din nî ǁîb ǃnâ ǁhaiǁhâ-e ūhâga.