Read Khoekhoegowab Jesajab 16 Bible Online

Jesajab 16 - Khoekhoegowab bible

Jesajab 16

¹ǁKhaoga du sî re Selaǃhūb di gaosabeba xu ǃgaroǃhūbǀî, Sionni ôas di ǃhommi ǃoa.

²ǁNā tamas ka io, o i ge nîra ī, ǀgôadi Moab didi ǁkhanama ra ani-i omsa xu doeǁgaǂuihe hâ-i khami Arnonni di xanuǃkhaidi tawa nîra hâ ǃkhaisa.

³ǀApemā î du ǀgoraǃgâ, î du sadu di sommi tsēas diba tsuxub dib khami ī kai, ǃhaexūhe hâna gaugau, î du ǁhâma rana tā ǀapexū.

⁴An ti ǃhaexūhesana sadu tawa hâ; Moatse, îts satsa ǁîna ǁhaiǁhâǃkhaise ība hîkākā-aon ǃaroma. ǁGâiǀā-aob ge a ǀkhai, hîkākās ge ra kā, dāǃgâ-aon ǃhūba xu hîǀhuruhe hâ xuige.

⁵Trons ǃhūb ai nîra ǁapoǁapohe xuige ǀkhomxaǂgaosiba xu; tsî ǁîb aib ge ǀguiba nîra ǂnûhâhâ, Davib di tentoms ǃnâ, ǀguib hîa ǂhanuse ra ǀgoraǃgâb tsî ǂhanuba ra ôab tsî ǂhanu-aisiba dīsa a ôasababa.

⁶Sida ge ǃguriǂgaoxasib Moab dib xa ge ǁnâu; kaiseb a ǃgurixasa, ǃgurib âb tsî ǃguriǂgaoxasib âb tsî ǁgôasib âb ge ǁau koasens ǀguisa, ti.

⁷ǁNāxab ge Moaba Moab ǂama nîra ā, hoatsaman ge nîra ā, ǃgaoǃgaodi Kir-Haresets didi ǂama du ge nîra ǀhâimâinǀom, ǁîdi khôaǃarihe hâ xui-ao.

⁸ǃAugu Hesbons digu ge ǃū hâ, ǂauxûiǂûhais Sibmas dis ona. ǁAedi di ǀhonkhoegu ge ǁîs di ǂhûiǂuihesa ǂgāxūna ge ǂnauǂkhūǂkhū, ǁîn ge Jasers kōse ge sī, ǁîn ra ǁhapuma ǃgaroǃhūb ǃnâ: ǁÎn di ǂgonagu ge ge khoraǂuisen, ǁîn ge huriba ge īǂam.

⁹ǁNā-amaga ta ge Jasers di ās ǀkha ǂauxûiǂûhais Sibmab disa ra āba, tita ge ti ǁgamron ǀkha ra ǀâǀâǃganu ro, saro Hesbons tsî Eleales tsîro, dâǃaus saro di ǁkhunaǂûn dis tsî saro ǃgaos dis go ǁnā xui-ao.

¹⁰ǃGâiaǂgaob tsî dâb tsîkha ge ǂûtanixa ǃauba xu go ūbēhe tsî ǂauxûiǂûǃhanagu ǃnâ i ge ǁnaehe tsî dâhe tama hâ; ǂauxûiǂûdāǃnâ-aob ge ǂauxûi-i xare-e dāǃnâ tama hâ ǂauxûiǃoregu ǃnâ, tita ge dâǃausa ǀû kai amaga.

¹¹ǁNā-amagan ra ti ǃnāxūna ā Moab ǂama harps khami, tsî ti ǃnāb din Kir-Heres ǂama.

¹²Tsî i ge nîra ī, mûn kao, Moab ǀhupu hâsa ǀgapigu ai, ob ge ǃanusib âb ǃnâ nîra ǂgâ, ǀgoreǀîb nîga, xaweb ge dī ǁkhā tide.

¹³Nēs ge ǁnā mîs, ǃKhūb ge Moaba ǃhoa-ūsa ǁnā ǃnūba xu.

¹⁴Xawe nēsib ge ǃKhūba ǃhoa tsî go mî: ǃNona kurigu ǃnâ, ǃgaesab di kurigu ī xase, ob ge ǂkhaisib Moab diba nîra sorahe ǁnā ǂguib hoab ǀkha; ob ge ǃgau nî ǃâba îbe-îbe ǂkhari tsî nîra ǁkhāoǃnâ.