Read Khoekhoegowab Jesajab 19 Bible Online

Jesajab 19 - Khoekhoegowab bible

Jesajab 19

¹ǂHôas Egipteb xa hâs: Mû, ǃKhūb ra ǃhae ǃâus ai ǃgapi, tsîb ge Egipteb ǃnâ nîra hā. O gu ge ǁgôa-elogu Egipteb diga ais âb xa nîra ǀkhū, ob ge ǂgaob Egipteǁîn diba nîra tsuni ǃnāb ân ǃnâ.

²Tita ge Egipteǁîna Egipteǁîn ǀkha nîra ǂgāǁae xui-ao, o-i ge mâ-i hoa-e ǁî-i di ǃgâsaba nîra ǃkhamū, ǃāsa ǃās ǃoagu, gaosisa gaosis ǃoagu.

³Os ge gagas Egipteǁîn disa ǃnāb ân ǃnâ nîra kā tsî ǀapes âna ta ge tita nîra hapu, ǁgoasin ge ǁîn di ǁgôa-elogu tsî ǁgâuanū-aon tsî ǁō hân gagadi tsî aimûǀgaru-aon tsîn ai nîra dî.

⁴Tsî tita ge Egipteǁîna karosa ǀhonkhoen ǃomǁae nîra mā tsî ǁkhō gao-aob ge ǁîna nîra gaoǂam, tib ra ǃKhūb ǂnubidi di ǃKhūba mî.

⁵Tsî gu ge ǁgamgu hurib diga nîra ǀari tsî Nylǃāb ge ǀari tsî nîra ǂnâ.

⁶Tsî gu ge ǁkhāti Egipteb ǃāga nîra ǁkhaedawahe; tsî gu nîra xuriǂuihe, tsî ǁkhaeǀhaohe hâ dâuga nîra ǀari. ǂĀb tsî ǀharub tsîkha ge nîra ǃū.

⁷Tapirǀgâb, Nylǃāb tawa Nylǃāb amǃgâ mâb, tsî Nylǃāb amǃgâ tsorohe hân hoan ge nîra ǂnâ, ǃhaebēhe tsîn ge nîra kā.

⁸O gu ge ǁauǃkhō-aoga nîra ǃoa, o gu ge ǁnāgu, ǁauǃkhō-ūǀurisa Nylǃāb ǃnâ ra aoǂgāga nîra ǃoa, tsî ǀûide ǁgamgu ai ra aoǂuigu ge nîra tsanaǁkhui.

⁹O gu ge ǀui vlasa ra sîsenga nîra tao, wevergu ǃuri ǃkhaib digu ona.

¹⁰Tsîn ge ǃgaoǃgaodi ân ǀkha nîra ǂkhūǂkhūhe ǁnān sîsenamǃnâs ama ra sîsenn ge nî ǃoaǃoahe.

¹¹Amase gu ge Soans di gaosaga a gâre, ǀapes gā-aigu Faraob di ǀapemā-aogu dis ge go ǁnâuǃāo xū kai. Mati du kha ǁnâi Faraob ǃoa: Tita ge gā-aigu di ôa ta, kai gao-aogu di ôata, ti nî mî?

¹²Mapa gu ǁnâi hâ sa gā-aiga? A gu ǁnâi satsa ǂanǂan, î gu mûǂan, tare-eb ǃKhūb ǂnubidi diba Egipteba ǂâibasenū hâ ǃkhaisa.

¹³Gaosagu Soans digu ge go gâre, gaosagu Memfis digu ge gāhe hâ; ǁîgu ge Egipteb ona ra ǂhapu kai, ǃhaodi âb di ǀkhâuǀams kōse.

¹⁴ǃKhūb ge ama ǂkhaba gaga-e ǁîn ǁaegu ge ǂnâǂgā; tsîn ge Egipteba ge ǂhapu kai, ǁîb di dīb hoab ǃnâ, āǀhoro hâ khoeb ra ǀkhûib âb ǃnâ ǁnā khami.

¹⁵Sîsenni xareb ge Egipteba hâba tide, danas kas, ǂareb kas, ǂgonab kas, ǀharub kas hoas xa ga dīheba.

¹⁶ǁNātsēn ge Egipteǁîna tarase nîra ī, tsîn ge ǀkhū tsî nîra ǃao, gons ǃKhūb ǂnubidi dib di ǃommi ǁînab nî gongonǀîb dis ǃaroma.

¹⁷Tsî ǃhūb Judab dib ge Egipteǁîna ǃhurise nîra ība, ǁî ǃkhaisa ga ǂhôa-i hoa-i, ǁnā-i ge ǁî-i ǂû-i ǃnâ nîra ǃao, ǃKhūb ǂnubidi dib di ǂâibasens ǁînab ǂâibasenū hâs xa.

¹⁸ǁNā tsēdi ǃnâ di ge koro ǃāde Egipteǃhūb ǃnâ nîra hâ, Kanaanni di gowaba ra ǃhoade, tsî ǃKhūb ǂnubidi diba ra nūbade. ǀGuis ge hîǀhurus di ǃā ti nîra ǂgaihe.

¹⁹ǁNātsēb ge ǃKhūba altar-e nîra ūhâ Egipteǃhūb di ǁaegub ǃnâ, tsî ǃKhūba ǂnûikhâibahe hâ sao-e ǁîb di ǀkharib tawa.

²⁰Tsî i ge ǃKhūb ǂnubidi diba saose tsî ǀhûǀguitimîse nîra ība Egipteǃhūb ǃnâ. ǁÎn ge ǃKhūb ǃoa nîra ǂgai xui-ao, ǁgâiǀā-aon ǂama, tsî ǁîb ge ǁîna Hui-ao tsî ǀHonkhoese nîra ība, ǁîna nîra oreba.

²¹Tsî ǃKhūb ge Egipteǁîna nîra ǂansaba, tsî Egipteǁîn ge ǃKhūba ǁnātsē nîra ǂan, tsîn ge ǁîba nîra ǃoaba ǂāǁguibas ǀkha tsî ǂûǁguibas ǀkha, tsîn ge ǃKhūba mîmâi-e mîmâiba tsî nîra matare.

²²Tsî ǃKhūb ge Egipteǁîna ǃgarise nîra ǂnau; xaweb ge ǁkhāti nîra ǂgauǂgau, tsîn ge ǃKhūb ǃoa nîra ǃhobasen, tsî ǁîb ge ǁîna nîra ǁnâu-am tsîb ge ǁîna nîra ǂuruǂuru.

²³ǁNātsē i ge ǂhauǂhauhe hâ dao-e nîra hâ, Egipteba xu Asiriab ǃoa, on ge Asiriaǁîna Egipteb ǃnâ tsî Egipteǁîna Asiriab ǃnâ nîra sī ǁkhā; on ge Egipteǁîna Asiriaǁîn ǀkha ǃKhūba nîra ǃoaba.

²⁴ǁNātsēb ge Israela ǃnonaǁîse nîra ī Egipteǁîn ǀkha tsî Asiriaǁîn ǀkha ǀkhaeb ase ǃhūb di ǁaegub ǃnâ.

²⁵ǃKhūb ǂnubidi dib ge ǁîna nîra ǀkhae tsî: As ǀkhaehe ti ǁaes Egipteǁîsa tsî Asiriaǁîs, ti ǃomkha di sîsenna tsî Israeli ti ǀumi-amǃnâs tsîna, ti nîra mî.