Read Khoekhoegowab Jesajab 2 Bible Online

Jesajab 2 - Khoekhoegowab bible

Jesajab 2

¹Nēs ge mîs Jesajab Amob ôab ge mûsa, Judab tsî Jerusalems tsîra ǂama.

²Tsî i ge ǀuni tsēdi ai nîra ī, ǃhommi ǃKhūb ommi dib nî ǂaob ǃhomgu dib ai mâiǁapoǁapohe ǃkhaisa, ob ge ǃnomde nîra ǃnā, o di ge ǁaedi hoade ǁîb tawa nîra ǃkhoeǀhao.

³O di ge ǂgui ǁaedi hā tsî nîra mî: Hā î da ǃhommi ǃKhūb dib ai ǃapa, ommi Jakob di Elob dib ǃoa, îb ǁîba ǁkhāǁkhā da daogu âb xa, î da ǁîb di daogu ǃnâ ǃgû. Sionsa xub ǂhanuba nîra ǂoa, tsî ǃKhūb mîsa Jerusalemsa xu xuige.

⁴Tsî ǁîb ge ǁaedi ǃnâ nîra ǀgoraǃgâ tsî ǂgui ǁaede nîra ǁkhara; on ge gôagu âna nîra ǃhūǃkhāxū kai tsî ǁhâigôagu âna nîra ǃgao-ūgôa kai, os ge ǀgui ǁaesa nau ǁaes ǃoagu gôaba ūkhâi tide tsîn ge ǃaruǀî torodīsa ǁkhāǁkhāsen tide.

⁵Hā, Jakob omtse, î da ǃgû ǃKhūb di ǃnâb ǃnâ!

⁶Xawe sats ge sa ǁaes, Jakob di omma ge ǁnāxū. ǁÎn ge aiǂoas di xūn xa ǀoa hâ; tsîn ge a ǃgaidī-ao Filisteǁîn xase tsîn ge ǃhaokhoen di ôan ǀkha ra ǃgaeǁaesen.

⁷Tsî ǃhūb ân ge ǀhaiǀurib tsî ǃhuniǀurib tsîkha xa ǀoa hâ; tsî ǁuigu ân ge a ǀamo. Tsî ǃhūb ân ge ǁkhāti hān xa ǀoa hâ; tsî kunidi ân ge a ǀamo.

⁸ǃHūb ân ge ǁkhāti ǁgôa-elogu xa ǀoa hâ; sîsengu ǁîn ǃomgu digu aiǃân ra ǃhonǁgoa, ǀkhunugu ân ge dī xūgu aiǃâ.

⁹ǁNāpab ra ǁau khoeba ǃgamǃgâ tsî kai khoeb ra ǃhonǁgoa, ǁnā-amagats ge satsa ǁîna ǀûba tide.

¹⁰ǂGâ ǃhaob ǃnâ, îts tsarab ǃnâ gaugausen ǃhurib ǃKhūb dib xa tsî ǂkhaisib ǁîb ǃanusib dib xa!

¹¹ǀGapi mûdi khoen didi ge nîra ǃgamǃgamhe tsî ǀgapisib aogu dib ge nîra ǃgamǃgâ kaihe; tsî ǃKhūb ǀguib ge ǁnātsē nîra ǀgapi.

¹²Tsēs ǃKhūb ǂnubidi dis ge ǃguriǂgaoxan tsî ǀgapiǂâixan hoan ǃoagu nîra hâ, mâ ǀgapi xū-i hoa-i ǃoagu, ǁî-i nî ǃgamǃgamhese;

¹³tsî ǀgapi tsî ǃguri sederhaidi Libanonni didi ǃoagu tsî mâ aik-haidi Basanni didi ǃoagu,

¹⁴tsî mâ ǀgapi ǃhomgu hoagu ǃoagu tsî mâ ǀgapi ǃnomdi hoadi ǃoagu,

¹⁵tsî mâ ǀgapi ǂgō-ommi hoab ǃoagu, tsî mâ ǀgapi ǂnubiǂgoab hoab ǃoagu,

¹⁶tsî mâ doe-omgu Tarsis digu hoagu ǃoagu, tsî ǂhâbasa anixūn hoan ǃoagu.

¹⁷Tsî ǃgurixasib khoeb dib ge nîra ǃgamǃgâ kaihe tsî ǀgapisib aogu dib ge nîra ǃgamǃgamhe; tsî ǃKhūb ǀguib ge ǁnātsē nîra ǀgapi,

¹⁸tsî mâb hoab ǁgôa-elogu dib ge nîra kāǃari.

¹⁹ǃNubai gu ge ǁhāgu ǃhaogu digu ǃnâ nîra ǂgâ, tsî ǃhūbaib di ǁhoaǃnāgu ǃnâ ǃhurib ǃKhūb dib ǃaroma tsî ǂkhaisib ǁîb anusib dib ǃaroma, ǁîb ga khâi ǃnubai, ǃhūbaibab nî ǃhuriǃhurise.

²⁰ǁNātsēb ge khoeba ǁîb di ǀhaiǀuriǁgôa-elogu tsî ǁîb ǃhuniǀuriǁgôa-elogu, hîan nî kurubasen hâga, ǁîgu aiǃân nî ǃhonǁgoase, soretsiǃgubedi tsî tsuxudurugu tsîna nîra aoxūba,

²¹ǃhaogu di ǀaragu tsî ǃhaogu di ǁhāgu ǃnâ ra ǃgûǂgâǃâ, ǃhurib xa tsî anusib âb di ǂkhaisib xa ǃhūbaibab nî kaise ǃhuri kaiseb ga khâi ǃnubai.

²²ǁNāxū ǁnā khoeb ǀommi âb ǁîb ǂguis ǃnâ hâba, matikōseb a ǀgapiǃgôasasa du a ǀū xuige.