Read Khoekhoegowab Jesajab 21 Bible Online

Jesajab 21 - Khoekhoegowab bible

Jesajab 21

¹ǂHôas ǃgaroǃhūb hurib amǃgâ ǁgoeb xa hâs: Saregu ǃkhawagasa ra ǃgomǃnâǃganu khami i ge ǃgaroǃhūba xu ra ǀkhī, ǃaoǃaosa ǃhūba xu.

²Karosa ai-e ta ge tita go ǂhaiǂhaibahe: ǂGomǂgomsa tama-i ge ǂgomǂgomsa tamase ra dī, hîǀhuru-ao-i ge ra hîǀhuru. ǂOaxa Elamtse, xāǂgā si Mediatse! Tita ge ǀhâimâinǀoms âsa go ǀû kai.

³ǁNā-amagab ge ti kamanaba kai ǁō-i xa ǀoa hâ, tsûgu ge tita go ǃkhō, tsûgu xas ra ǁnās ǁora rasa ǃkhōhe xase; tita ge ǁnâus xa ra ǃgamǃgâ, tita ge kōǀîs xa go ǃhurigâ.

⁴Ti ǂgaob ra ǁhapu, ǃhurib xa ta ge go hāǂamhe; tsuxub ǁkhore ta hâbab ra ǀkhūǀkhūxū kaiba te.

⁵Tāba ǁāǁā îts kōǃgâ, ǃûi-aotse; ǂû î du ā! Khâi gaosago, î go khōsikhōba ǂkhauǀkhā!

⁶Nētib ge ǃKhūba tita ǃoa mî xuige: ǃGû, îts ǃûi-ao-e ǂnûi, î mû i nî xū-e mîba.

⁷Tsîb ge kuni-e ge mû, ǀnî ǃgapi-aoga, eselkuni-e, ǃnaikuni-e, tsî ǂōseb ge kō tsî ǀāse ǃgaoǃgâ,

⁸ob ge xammi khami ge ǂgai: Ti ǃKhūtse, tita ge tsēa hugaǀgui ǃûiǂgō-ommi ai ra mâ; tsî tsuxub hoaba ta ti ǃûisa ra ǃûi.

⁹Tsî kō, ǁnāpas ra kunisa hā aogu ǀkha tsî ǀnî ǃgapi-aogu tsîna. ǃNubaib ge ǁîba ǃeream tsî ge mî: Babilons ge go ǁnā, ǁîs ge go ǁnā! Tsî ǃgaohesa īgu ǁîs elogu digu hoagab ge ǃhūb ai go ǂnauǂkhū.

¹⁰Okha, ti dāǃnâhe rase tsî ti dāǃnâǃkhais di ǃhorotse, ǃKhūb ǂnubidi dib, Israeli di Elob xa ta go ǁnâu ǃkhais, ǁîsa ta go mîba du.

¹¹ǂHôas Dumab xa hâs: Seira xun ra ǂgaiǀî te: ǃÛi-aotse, matikōb a tsuxuba? ǃÛi-aotse matikōb a tsuxuba?

¹²Ob ge ǃûi-aoba ge mî: ǁGoas go ǁgoa, xawe i ge ganupe a ǃkhae. Dî ǂgao du kao, dî du re; ǁkhawa oa, î du hā re.

¹³ǂHôas Arabiab xa hâs: ǁOes Arabiab dis ǃnâ du ge nîra hâǂkhai, sadu Dedanǁî ǃgû-aodo.

¹⁴ǁGâ hâba du ǃgûǃoa re ǁgam-i ǀkha; ǁansaben Temab di ǃhūb din ge ǁhâsabena pereb ǀkha ge ǃgûǃoa.

¹⁵Gôagan ra ǁhâxū xui-ao, ǂgaeǂuihesa gôaba xu, ǂgaeǃnâhesa khāsa xu tsî ǃgommi torob diba xu.

¹⁶Nētib ge ǃKhūba tita ǁga ge mî xui-ao: Ganupe ǀgui kurib ǀguib, ǃgaesab di kurigu ī khami, ob ge ǂkhaisib Kedari diba nîra kā.

¹⁷Tsî ǃgau ka ǀgaus ǁkhâu-aogu dis, Kedarǁîn di ǁē-aogu ge nîra ǂkhari; ǃKhūb Israeli di Elob go ǃhoa xui-ao.