Read Khoekhoegowab Jesajab 22 Bible Online

Jesajab 22 - Khoekhoegowab bible

Jesajab 22

¹ǂHôas ais di ǃgoaǃnāb xa hâs: Tare-e du kha ǁnâi hō hâ, o du hoatsama omǂamaidi ai ra ǃapa?

²Sas kai ǀōb xa ge hâ is, sas ǂkhupixa ǃās, sas dâxa ǃāse. Sa ǃgamhesan ge gôab ǀkha ǃgamhe tama hâ, tsî ǃkhammi ǃnâ ǁō tama hâ.

³Sa ǂamsagu ge ǀhûpe ge ǃhū; ǁîgu ge ǁkhâu-aogu xa ge ǃkhōhe, sa ǃnâ ge hōhen hoan ge ǃgaeǀhûhe hâ, ǁîn ge ǃnūse ge ǁhâ.

⁴ǁNā-amaga ta ge tita ge mî: Aisa tita xu unu, î ta ause ā. Tā ǁgūǀkhā te, ǁkhaeǂgao te du nîga hîǀhurus ti ǁaes di ôas dis ǂama.

⁵Nēs ge tsēs gongonǃnâs dis, tsî dāǃgâs dis, tsî ǂkhupib dis, ǃKhūb ǂnubidi di ǃKhūba xu go hāsa xuige, ais di ǃgoaǃnāb ǃnâ, tsēs ǂnubiǂgoab ra khôahes dis tsî ǃhommiǀî ra ǀō ǃaus disa.

⁶Elammi ge ǂāǁhōba ge ū, aob ge kunis ai hâ, ǃgapi-aogu on ge hâ; tsî Kiri ge khōsikhōba ra napanapa.

⁷Tsî i ge nîra ī, ǃkhōǂuihesa ǃgoaǃnāgu âs kunidi xa nîra ǀoa tsî ǃgapi-aogu ǁābǀî nîra mâsī ǃkhaisa.

⁸Tsîb ge ǂganais Judab disa nîra ūǁnâ. O du ge ǁnātsē ommi ǁoes dib di ǀāxūna nîra mû;

⁹o du ge ǂapagu Davib ǃās diga nîra mû, ǁîgu a ǂgui ǃkhaisa; tsî du ge ǁgamgu ǃnaga ǁgoe ǀaus diga nîra ǀhaohao.

¹⁰Tsî du ge ǁkhāti omdi Jerusalems dide nîra ǃgôa, tsî du ge omde nîra khôaǁnâ, ǂnubiǂgoaga du nî ǁapoǁapose.

¹¹Tsî du ge ǁkhāti ǀhû-ā-e nîra dī ǀgam ǂgoakha ǁaegu, ǀoro ǀhôa ra gu di ǁgamgu ǂama, xawe du ge ǁNāb, nēna ra dīb ai kōǃapa tide, tsî du ge ǁkhāti ǁNāb, hugasa xu nēna ge kurub ai ǃgaoǃgâ tide.

¹²Ob ge ǃKhūb, ǂnubidi di ǃKhūba ǁnātsē nîra ǂgai, ās ǁga tsî ǃgaes ǁga tsî ǃgoradanasib ǁga tsî ǁhōǃgaesens ǁga.

¹³Xawe kō, ǃgâiaǂgaob tsî dâb tsîkha ge hâ, gomana ǃgams ǃnâ, gūna ǃgaoxadoms ǃnâ, ǁgansa ǂûs ǃnâ tsî ǂauxûiba ās ǃnâ tsî: A da ǂû tsî ā, ǁari da nî ǁō xuige, ti mîs ǃnâ.

¹⁴Xawe ǃKhūb ǂnubidi dib ge ti ǂgaera ǃnâ ǂhaiǂhaisen: Nē ǂhanuoǃnâsiba du ǀûbahe tide, ǁō du nîs kōse, tib ra ǃKhūb ǂnubidi di ǃKhūba mî, ti.

¹⁵Nētib ra ǃKhūb ǂnubidi di ǃKhūba mî: ǃGû îts ǂgâ ǁnā ǁuiǃkhōmâi-aob Sebnab ommûǂamaob tawa îts mî:

¹⁶Tare-ets nēpa ūhâ, tari-ets nēpa ūhâ, ots nēpa ǁao-e go ǁhāǂuibasen, ǁnāb ǁaos âba ǀgapiseb ǃnâ ra ǁhāǂuibasenni xase, ǁanǃkhai-e ǃhaob ǃnâ ra xoaǂgā kaib xase?

¹⁷Mû, ǃKhūb ge satsa nîra ǃgombē aorekhoesi ǃgombē-i ǀkha, tsî ǁîb ge nîra ǃgomǂnûi tsi.

¹⁸ǁÎb ge nîra gababē tsi, sats khoets ra bolsa gaba khami, ǃhū-i hîa hara-i ǃoa, ǁnāpats ge satsa nîra ǁō, tsî ǁnāpa di ge sa îkunide nîra hâ, sats, sa ǀhonkhoeb ommi di taoxūse ītse!

¹⁹Tsî tita ge satsa nîra ǂhāǁnâ, hâts a ǃkhaisa xu, tsî sa sîsenǃkhaisa xuts ge nîra hîkākāhe.

²⁰Tsî i ge ǁnātsē nîra ī, ti ǃgāb Eljakimmi, Hilkiab ôaba ta nîra ǂgai ǃkhaisa.

²¹Tsî tita ge ǁîba sa saraba nîra ǂgaeǂgā, tsî tita ge ǁîba sa ǃgaesenni ǀkha nîra ǀgaiǀgai. Tsî gaosis âtsa ta ge tita ǁîb ǃomǁae nîra mā, ob ge ǁîba Jerusalems di ǁansaben tsî Judab di omma ǁgûse nîra ība.

²²Tsî tita ge ǁkhowa-ammi Davib ommi diba ǁîb di ǃhōkha ai nîra ǁgui, ob ge ǁîba nîra ǁkhowa-am, tsî khoe-i xare-i ge ǂganam tide, tsî ǁîb ge nîra ǂganam, tsî khoe-i xare-i ge ǁkhowa-am tide.

²³Tita ge ǁîba ǀurida-i khami ǁaposa ǃkhai-i ǃnâ nîra ǃgâuǂgā, ob ge ǂnû-aiǃnaos ǃgôasib dise ǁgûb di omma nîra ība.

²⁴Tsîn ge ǁîb tawa nîra ǂgāmâi ǁgûb ommi di ǂkhaisib hoab, ūǀkhīn tsî surib dib hoaba, ǁkhāti ǂkhari xapan hoana, xapan ǃoredi dina xu ǂgoaxapan hoan kōse.

²⁵ǁNā tsēs ge, tib ra ǃKhūb ǂnubidi diba mî, ǁnā ǀurib, ǁaposa ǃkhai-i ǃnâ ge ǃgâuǂgāhe hâ iba, nîra ūbēhe, ob ge khôa tsî nîra ǁnā, ob ge ǃgommi, ǁîb ai hâba, nîra ǃgaoǁnâhe. ǃKhūb go ǁîsa mî xui-ao.